ପ୍ରତିବର୍ଷ ୧୬ ଡିସେମ୍ବରରେ ଆମେ ‘ବିଜୟ ଦିବସ’ ପାଳନ କରିଥାଉ। କାରଣ ୧୯୭୧ମସିହା ଏହି ଦିନରେ ହିଁ ଭାରତ-ପାକ୍ ମଧ୍ୟରେ ହୋଇଥିବା ରକ୍ତରଞ୍ଜିତ ଯୁଦ୍ଧରେ ଭାରତ ବିଜୟ ହାସଲ କରିଥିଲା। ସେହିଦିନଠାରୁ ପ୍ରତ୍ୟେକ ବର୍ଷ ଡିସେମ୍ବର ୧୬କୁ ‘ବିଜୟ ଦିବସ’ ଭାବେ ପାଳନ କରାଯାଉଛି। ତେବେ ଚାଲନ୍ତୁ ଜାଣିବା ୧୯୭୧ ମସିହାର ସେହି ବିଜୟର ଦିନ ବିଷୟରେ କିଛି –
୧୯୭୧ ମସିହାରେ ଭାରତ ଓ ପାକିସ୍ତାନ ମଧ୍ୟରେ ହୋଇଥିବା ଯୁଦ୍ଧରେ ପାକିସ୍ତାନ ପରାଜିତ ହୋଇଥିଲା ଓ ୧୬ଡିସେମ୍ବର ଢାକାରେ ୯୩୦୦୦ ପାକ୍ ସେନା ଭାରତୀୟ ସେନା ନିକଟରେ ଆତ୍ମସମର୍ପଣ କରିଥିଲେ। ୧୩ଦିନ ଧରି ଚାଲିଥିବା ଏହି ଯୁଦ୍ଧରେ ପ୍ରାୟ ଅନେକ ଭାରତୀୟ ଯବାନ ଶହୀଦ ହେବା ସହ ହଜାର ହଜାର ଯବାନ ଆହତ ହୋଇଥିଲେ। ପାକ୍ ସେନାର ନେତୃତ୍ୱ ନେଇଥିବା ଲେ. ଜେନେରାଲ ଏକେ ନିୟାଜୀ ନିଜ ୯୩ହଜାର ସୈନିକଙ୍କ ସହ ଭାରତୀୟ ସେନାର କମାଣ୍ଡର ଲେ. ଜେନେରାଲ ଜଗଜୀତ ସିଂହ ଅରୋଡ଼ାଙ୍କ ନିକଟରେ ଆତ୍ମସମର୍ପଣ କରି ପରାଜୟ ସ୍ୱୀକାର କରିଥିଲା। ସେହି ସମୟରେ ଜେନେରାଲ ସାମ୍ ମାନେକ୍ଶା ଭାରତୀୟ ସେନାର ମୁଖ୍ୟ ଥିଲେ। ଏହି ଯୁଦ୍ଧ ପରେ ବିଶ୍ୱ ମାନଚିତ୍ରରେ ବଙ୍ଗଳାଦେଶ ଭାବେ ଗୋଟିଏ ନୂଆ ଦେଶର ଉଦୟ ହେଲା।
