ଡେସ୍କ: ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆଜି ହିଣ୍ଡନ ବାୟୁସେନା ଷ୍ଟେସନରେ ବାୟୁସେନାର ୪ଟି ୟୁନିଟକୁ ରାଷ୍ଟ୍ରପତି ପତାକା ଓ ମାନକ ପ୍ରଦାନ କରିଛନ୍ତି। ସେ ୨୨୧ ସ୍କ୍ୱାଡ୍ରନ୍ ଓ ୪୫ ସ୍କ୍ୱାଡ୍ରନକୁ ରାଷ୍ଟ୍ରପତି ମାନକ ପ୍ରଦାନ କରିଥିଲେ। ଏହା ସଶସ୍ତ୍ର ବାହିନୀକୁ ଦିଆଯାଉଥିବା ସର୍ବୋଚ୍ଚ ସାମରିକ ସମ୍ମାନ।
ଶାନ୍ତି ଏବଂ ଯୁଦ୍ଧ ସମୟରେ ଦେଶ ପ୍ରତି ଉଲ୍ଲେଖନୀୟ ସେବା ପାଇଁ ରାଷ୍ଟ୍ରପତି ପତାକା ଏବଂ ମାନକ ବାୟୁସେନା ୟୁନିଟ୍ ବା ସ୍କ୍ୱାର୍ଡନକୁ ପ୍ରଦାନ କରାଯାଏ। ୧୮ ବର୍ଷର ସେବା ପରେ ରାଷ୍ଟ୍ରପତି ମାନକ ପ୍ରଦାନ କରାଯାଏ ଏବଂ ୨୫ ବର୍ଷର ସେବା ପରେ ରାଷ୍ଟ୍ରପତି ପତାକା ପ୍ରଦାନ କରାଯାଏ।
ଏହି ଅବସରରେ ରାଷ୍ଟ୍ରପତି କହିଥିଲେ ଯେ ୧୯୪୮, ୧୯୬୫, ୧୯୭୧ ଓ ୧୯୯୯ ଯୁଦ୍ଧରେ ବାୟୁସେନା ଅଭୂତପୂର୍ବ ସାହସ ଓ ସମର୍ପଣ ପ୍ରଦର୍ଶନ କରିଥିଲା। ଦେଶ ବିଦେଶରେ ପ୍ରାକୃତିକ ବିପର୍ଯ୍ୟୟ ସମୟରେ ରିଲିଫ ଓ ଉଦ୍ଧାର କାର୍ଯ୍ୟରେ ବାୟୁସେନାର ଯବାନମାନେ ମଧ୍ୟ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛନ୍ତି। ଦେଶର ବୀର ବାୟୁସେନା ଯବାନଙ୍କ ନିଷ୍ଠା ଓ କର୍ତ୍ତବ୍ୟ ନିଷ୍ଠା ସମସ୍ତ ନାଗରିକଙ୍କ ପାଇଁ ପ୍ରେରଣା ବୋଲି ସେ କହିଛନ୍ତି। ରାଷ୍ଟ୍ରପତି କହିଥିଲେ ଯେ ଭାରତୀୟ ବାୟୁସେନା ମଧ୍ୟ ଦେଶର ମହାକାଶ କାର୍ଯ୍ୟକ୍ରମରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଉଛି।
Comments are closed.