ଶିକ୍ଷକ ଦମ୍ପତି ଘରୁ ଚୋରି ; ନଗଦ ୧ ଲକ୍ଷ ଟଙ୍କା, ୬ ଭରି ଓଜନର ସୁନା ଗହଣା ଚୋରି

ରସୁଲପୁର : ଶିକ୍ଷକ ଦମ୍ପତିଙ୍କ ଘରୁ ଲକ୍ଷାଧିକ ଟଙ୍କାର ସୁନା ଅଳଙ୍କାର ଓ ନଗଦ ଟଙ୍କା ଲୁଟ୍‌‌ ହୋଇଛି। ରସୁଲପୁର ବ୍ଲକର ରସୁଲପୁର (ବ୍ରାହ୍ମଣ ସାହି) ଗ୍ରାମର ଚନ୍ଦନ କୁମାର ସାହୁଙ୍କ ତଳ ମହଲା ଘରେ ଭଡାରେ ରହୁଥିବା ଏକ ଶିକ୍ଷକ ଦମ୍ପତିଙ୍କର ନଗଦ ୧ ଲକ୍ଷ ଟଙ୍କା, ପ୍ରାୟ ୬ ଭରି ଓଜନର ବିଭିନ୍ନ ସୁନା ଗହଣା (ପ୍ରାୟ ୫ ଲକ୍ଷ ଟଙ୍କା ମୂଲ୍ୟର ସମ୍ପତ୍ତି) ବୁଧବାର ବିଳମ୍ବିତ ରାତିରେ ଚୋରି ହୋଇଥିବା ନେଇ ଗୁରୁବାର ସ୍ଥାନୀୟ ମୁଗପାଳ ସରକାରୀ ଉଚ୍ଚବିଦ୍ୟାଳୟରେ ସହକାରୀ ଶିକ୍ଷକ ଭାବେ କାର୍ଯ୍ୟ କରିଥିବା ଅବିନାଶ ଆଇଚ କୁଆଖିଆ ଥାନାରେ ଅଭିଯୋଗ କରିଛନ୍ତି।
ଶିକ୍ଷକ ଶ୍ରୀ ଆଇଚ ଓ ସ୍ଥାନୀୟ ବନଦୁର୍ଗା ସରକାରୀ ଉ.ପ୍ରା ବିଦ୍ୟାଳୟରେ ସହକାରୀ ଶିକ୍ଷୟିତ୍ରୀଥିବା ଦେବକୀ ପାତ୍ରଙ୍କ ଠାରୁ ଖବର ନେବାରେ ଜଣାଯାଇଛି ରାହାମ୍ବା ଗ୍ରାମଠାରେ ହେଉଥିବା ଅପେରା ଦେଖିବାକୁ ଉକ୍ତ ଦମ୍ପତି ଓ ତାଙ୍କର ପୁଅକୁ ନେଇ ବୁଧବାର ରାତିରେ ସେଠାକୁ ଯାଇଥିଲେ। ଉକ୍ତ ଘରେ କେହି ନଥିବା ସୁଯୋଗ ନେଇ ଚୋରମାନେ ଘରର ମୁଖ୍ୟ ଦ୍ବାର ଚାବି ଓ ହ୍ୟାଣ୍ଡଲ ଭାଙ୍ଗି ଘର ମଧ୍ୟକୁ ପ୍ରବେଶ କରି ଡ୍ରଇଁ ରୁମ ଓ ବେଡ଼ ରୁମ ଚାବି ଭାଙ୍ଗି ବେଡ଼ ରୁମରେ ଥିବା ଗଡ଼ରେଜ ଭାଙ୍ଗି ତହିଁରେ ଥିବା ନଗଦ ପ୍ରାୟ ୧ଲକ୍ଷ ଟଙ୍କା, ସୁନା ହାର ୧ଟା, ମଙ୍ଗଳ ସୂତ୍ର ୧ଟା, ଚେନ ୪ଟା, ମୁଦି ୨ଟା ସାନ ଓ ବଡ଼ ଚୁଡ଼ ୪ ହଳ, କାନଫୁଲ ୮ ହଳ ଆଦି ପ୍ରାୟ ୬ ଭରି ଓଜନର ସୁନା ଗହଣା, ଦାମୀ ଶାଢ଼ୀ ଏଟିଏମ କାର୍ଡ ଇତ୍ୟାଦି ଚୋରି ହୋଇଥିବା ସେମାନେ ସୂଚନା ଦେଇଥିବାବେଳେ ଚୋରି ହୋଇଥିବା ସମ୍ପତ୍ତିର ମୂଲ୍ୟ ପ୍ରାୟ ୫ ଲକ୍ଷ ଟଙ୍କା ହେବବୋଲି ପ୍ରକାଶ କରିଛନ୍ତି ।
ଚୋରି ହୋଇଥିବା ସମ୍ପର୍କରେ ଆଜି ସକାଳେ ଥାନାରେ ଶ୍ରୀ ଆଇଚ ଅଭିଯୋଗ କରିବା ପରେ ଥାନା ଅଧିକାରୀ ଶ୍ରୀକାନ୍ତ ବାରିକ, ଏସ. ଆଇ ଦୁଷ୍ମନ୍ତ କୁମାର ଦାସ ସଦଳବଳେ ଘଟଣା ସ୍ଥଳରେ ପହଞ୍ଚି ସନ୍ଧାନୀ କୁକୁର ଓ ବୈଜ୍ଞାନିକ ଦଳ (ସାଇଣ୍ଟିଫିକ ଟିମ୍‌)ଙ୍କ ସହାୟତାରେ ଅନୁସନ୍ଧାନ ଚଳାଇଥିବା ଜଣାଯାଇଛି । ଉକ୍ତ ଶିକ୍ଷକ ଦମ୍ପତିଙ୍କ ଘର ଏହି ବ୍ଲକର ଭୋଟକା ପଞ୍ଚାୟତ ବିଲିପଡ଼ା ଗ୍ରାମରେ ହୋଇଥିବାବେଳେ ସେମାନେ ଉକ୍ତ ଘରେ ଭଡାରେ ପ୍ରାୟ ୫ ବର୍ଷ ହେଲା ରହି ଆସୁଛନ୍ତି । ଏଠାରେ ସୂଚନା ଯୋଗ୍ୟ ଶିକ୍ଷୟିତ୍ରୀ ଶ୍ରୀମତୀ ପାତ୍ର ଶିକ୍ଷକତା କରୁଥିବା ତାଙ୍କ ଭଡା ଘର ଠାରୁ ମାତ୍ର କିଛି ଦୂରରେ ଥିବା ବନଦୁର୍ଗା ଉଚ୍ଚ ପ୍ରାଥମିକ ବିଦ୍ୟାଳୟର ଅଫିସ ଓ ରୋଷେଇ ଘର ଚାବି ଭାଙ୍ଗି ୨ଟି ଗ୍ୟାସ ସିଲିଣ୍ଡର, ଗୋଟିଏ ଆହୁଜା ମାଇକ ମେସିନ ଓ ନଗଦ ୫ ହଜାର ଟଙ୍କା କେହି ଦୁର୍ବୃତ୍ତ ଫେବୃଆରୀ ୪ ତାରିଖ ରାତିରେ ଚୋରି କରି ନେଇଥିଲେ। ତହିଁ ପରଦିନ ଉକ୍ତ ବିଦ୍ୟାଳୟର ପ୍ରଧାନ ଶିକ୍ଷକ ଅରୁଣ କୁମାର ସ୍ୱାଇଁ କୁଆଖିଆ ଥାନାରେ ଅଭିଯୋଗ କରିଥିଲେ ମଧ୍ୟ ଉକ୍ତ ଚୋରି ଘଟଣାରେ ଅଦ୍ୟାବଧି କେହି ଧରାପଡ଼ିନଥିବା ଜଣାଯାଇଛି।