ଆଲୋଚନା ପୁଣି ବିଫଳ, ସରକାରଙ୍କ ପ୍ରସ୍ତାବ କୃଷକ ମୋର୍ଚ୍ଚାକୁ ଆସିଲାନି ପସନ୍ଦ
![](https://samajalive.in/wp-content/uploads/2024/02/Capture-123-750x430.jpg)
ନୂଆଦିଲ୍ଲୀ : କେନ୍ଦ୍ର ସରକାରଙ୍କ ପ୍ରସ୍ତାବକୁ ଖାରଜ କଲା କିଷାନ ମୋର୍ଚ୍ଚା । କେନ୍ଦ୍ର ସରକାରଙ୍କ ତରଫରୁ ଏମଏସପିରେ ୫ ବର୍ଷର ଚୁକ୍ତିର ପ୍ରସ୍ତାବ ଦିଆଯାଇଥିଲା । ଚାଷୀଙ୍କ କହିବାନୁସାରେ କେନ୍ଦ୍ର ସରକାର ଏ୨+ଏଫଏଲ୍+୫୦ ପ୍ରତିଶତ ଆଧାରରେ ଏମଏସପିରେ ଅଧ୍ୟାଦେଶ ଆଣିବା ପାଇଁ ଯୋଜନା କରୁଛନ୍ତି । କିନ୍ତୁ ଚାଷୀ ସଙ୍ଗଠନ ସଂଯୁକ୍ତ କିଷାନ ମୋର୍ଚ୍ଚା କହିଛି କି ସି୨+୫୦ ପ୍ରତିଶତରୁ ତଳକୁ କିଛି ବି ସ୍ବୀକାର କରାଯିବନି । ଏଭଳି ଭାବେ ଚାଷୀ ସହ ସରକାରଙ୍କ ଚତୁର୍ଥ ଥର ଆଲୋଚନା ମଧ୍ୟ ବିଫଳ ହୋଇଛି ।
ଚାଷୀଙ୍କ ସାମ୍ନାରେ ମକା, କପା, ହରଡ ଡାଲି, ମସୁର ଡାଲି ଓ ମୁଗ ସମେତ ୫ଟି ଫସଲର କ୍ରୟକୁ ନେଇ ୫ ବର୍ଷର ଚୁକ୍ତି ପ୍ରସ୍ତାବ ରଖାଯାଇଛି । କିନ୍ତୁ ଚାଷୀ ମୋର୍ଚ୍ଚା ସ୍ପଷ୍ଟ କରିଛିକି ସେମାନେ ସି୨+୫୦ ପ୍ରତିଶତର ନିୟମ ଆଧାରରେ ଏମଏସପିର ପ୍ରତିଶ୍ରୁତି ଚାହୁଁଛନ୍ତି । ୨୦୧୪ ନିର୍ବାଚନରେ ନିଜ ଘୋଷଣାନାମାରେ ବିଜେପି ସରକାର ଏହାର ପ୍ରତିଶ୍ରୁତି ଦେଇଥିଲା ବୋଲି ଦାବି କରିଛି ଚାଷୀ ସଙ୍ଗଠନ । କିନ୍ତୁ ଏବେ ହେଉଥିବା ଚର୍ଚ୍ଚାରେ କୌଣସି ପାରଦର୍ଶିତା ନାହିଁ ଏବଂ ବାରମ୍ବାର ଚର୍ଚ୍ଚା ହେଉଛି । ଏହା ଦିଲ୍ଲୀ ସୀମାରେ ୨୦୨୦-୨୧ ର ଐତିହାସିକ ଚାଷୀ ଆନ୍ଦୋଳନ ସମୟରେ ସଂଯୁକ୍ତ କିଷାନ ମୋର୍ଚ୍ଚା ଦ୍ବାରା ସ୍ଥାପିତ ଗଣତାନ୍ତ୍ରିକ ସଂସ୍କୃତିର ବିରୁଦ୍ଧ ବୋଲି କହିଛି ଚାଷୀ ସଙ୍ଗଠନ ।
ସଂଯୁକ୍ତ କିଷାନ ମୋର୍ଚ୍ଚା କେନ୍ଦ୍ରମନ୍ତ୍ରୀଙ୍କୁ ଏହା ସ୍ପଷ୍ଟ କରିବା ପାଇଁ ଦାବି କରିଛି କି ମୋଦୀ ସରକାର ଋଣ ଛାଡ କରନ୍ତୁ । ଏହା ସହ ବିଜୁଳିର ଘରୋଇକରଣ ନକରିବା, ସାର୍ବଜନିକ କ୍ଷେତ୍ରର ଫସଲ ବୀମା ଯୋଜନା, ୬୦ ବର୍ଷରୁ ଅଧିକ ବୟସର ଚାଷୀଙ୍କୁ ୧୦ ହଜାର ଟଙ୍କା ମାସିକ ପେନସନ୍ ମଧ୍ୟ ଦାବି କରିଛି ସଂଯୁକ୍ତ କିଷାନ ମୋର୍ଚ୍ଚା ।
Comments are closed.