କଲମପୁର: ଜିଲା ମୁଖ୍ୟ ଚିକିତ୍ସାଳୟରେ ବିଷ ପାନ କରି ଚିକିତ୍ସାଧିନ ଥିବା ଜଣେ ମହିଳାଙ୍କର ରବିବାର ମୃତ୍ୟୁ ଘଟିଛି। ମହିଳା ଜଣକ କଲମପୁର ବ୍ଲକ ଅଧିନସ୍ଥ ମାଟିଖାଲ ଗ୍ରାମର ୫୫ ବର୍ଷୀୟା ଲୋଚନୀ ହଂସ।
ସୂଚନା ଅନୁସାରେ, ଶନିବାର ବିଳମ୍ବିତ ରାତିରେ ମାଟିଖାଲ ଗ୍ରାମର ଲୋଚନୀ ହଂସ ପାରିବାରିକ ଅଶାନ୍ତି କାରଣରୁ ବିଷ ପିଇ ଗୁରୁତର ହୋଇଥିଲେ। ପରିବାର ଲୋକ ତାଙ୍କୁ ପ୍ରଥମେ କଲମପୁର ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। କିନ୍ତୁ ଅବସ୍ଥା ଗୁରୁତର ହେବାରୁ ବିଳମ୍ବିତ ରାତିରେ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା। କିନ୍ତୁ ଜିଲା ମୁଖ୍ୟ ଚିକିତ୍ସାଳୟଠାରେ ଚିକିତ୍ସାଧିନ ଅବସ୍ଥାରେ ଲୋଚନୀଙ୍କ ମୃତ୍ୟୁ ଘଟିଛି। ଏନେଇ କଲମପୁର ପୁଲିସକୁ ଜିଲା ମୁଖ୍ୟ ଚିକିତ୍ସାଳୟ ପକ୍ଷରୁ ସୂଚନା ମିଳିଛି। କଲମପୁର ପୁଲିସ ଏକ ଅପମୃତ୍ୟୁଜନିତ ମାମଲା ରୁଜୁ କରିଛି। ବଡକୁଟୃ ପୁଲିସ ଫାଣ୍ଡି ଅଧିକାରୀ ଏସ.ଆଇ ଶିବଶଙ୍କର ମହାନ୍ତି ଜିଲା ମୁଖ୍ୟ ଚିକିତ୍ସାଳୟରେ ପହଞ୍ଚି ମୃତଦେହ ଜବତ କରିଛନ୍ତି। ମୃତଦେହ ପଞ୍ଚନାମା କରିବା ପରେ ଜିଲା ମୁଖ୍ୟ ଚିକିତ୍ସାଳୟରେ ବ୍ୟବଚ୍ଛେଦ କରାଇଥିଲେ। ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଇଛି।
