କଲମପୁର: କେବୁଲ ପୋତିବା ନାଁରେ ହେଉ କି ପାଣି ପାଇପ ବିଛାଇବା ନାଁରେ, ମନ ଇଛା ଖୋଳାଯାଉଛି ରାସ୍ତା। ସେ ରାସ୍ତା ପୂର୍ତ୍ତ ବିଭାଗର ହୋଇଥାଉ କି ଗ୍ରାମ ଉନ୍ନୟନ ବିଭାଜନର ଅଥବା ପଂଚାୟତ କି ସମିତି ସବୁ ରାସ୍ତା ଉପରେ କେବୁଲ ପୋତା ଅଥବା ପାଇପ ବିଛାଉଥିବା ସଂସ୍ଥା ମନ ଇଛା ଖୋଳି ଚାଲିଛି। ଏହି ରାସ୍ତା ଖୋଳାଯାଇ ଦିନ ଦିନ ଧରି ରଖି ଦିଆଯାଉଥିବାରୁ ଅନେକ ସମୟରେ ରାସ୍ତା ଦୁର୍ଘଟଣାର ଅନ୍ୟ ଏକ କାରଣ ପାଲଟିଛି। ଏନେଇ ରାସ୍ତା ଖୋଳାରେ ନିୟୋଜିତ କର୍ମଚାରୀଙ୍କୁ କହିଲେ ଉତର ମିଳେ ଆମେ ଅନୁମତି ଆଣିଛୁ। କିନ୍ତୁ ଲୋକଙ୍କ ସୁରକ୍ଷା ପାଇଁ ରାସ୍ତା ଖୋଳାଯାଇଥିବା ସ୍ଥାନରେ କୌଣସି ନିରାପତା ଅଥବା ସଚେତନତା ନେଇ କୌଣସି ପ୍ରତୀକାତ୍ମକ ସୂଚନା ଦିଆଯାଉ ନାହିଁ। ଯେଉଁଥିପାଇଁ ଦୁର୍ଘଟଣା ବୃଦ୍ଧି ପାଉଛି। ଅନେକ ସମୟରେ କଲମପୁର ଜୁନାଗଡ଼, କଲମପୁର ମୁଖିଗୁଡା ମୁଖ୍ୟ ରାସ୍ତା ସମେତ କଲମପୁର କୋଟଗାଁ, କଲମପୁର ବଡକୁଟୃ ଆଦି ରାସ୍ତାରେ ଦୁର୍ଘଟଣା ବୃଦ୍ଧି ପାଉଛି। ଅନେକ ସମୟରେ ଦୁର୍ଘଟଣା ଯୋଗୁଁ ଲୋକଙ୍କ ଜୀବନ ହାନୀ ହେଉଛି ପୁଣି କିଛି ଲୋକଙ୍କ ହାତ ଗୋଡ ଭାଙ୍ଗିଯିବା ଯୋଗୁଁ ଅକର୍ମଣ୍ୟ ହେବାକୁ ପଡୁଛି। ଏହାସହ ରାସ୍ତା କଡ଼ରେ ଗଦା ହେଇଥିବା ମାଟିକୁ ସଫେଇ କରାଯାଉ ନ ଥିବାରୁ ଅଳ୍ପ ବର୍ଷା ହେଲେ ଚିକିଟା ମିଟି ରାସ୍ତା ଉପରେ ଜମି ରହୁଛି। ଯାହାରି ଫଳରେ ବାଇକ ଚାଳକ ଦୁର୍ଘଟଣାର ଶିକାର ହେଉଛନ୍ତି। ଗ୍ରାମାଞ୍ଚଳ ଗଳି ରାସ୍ତାରେ ସିମେଣ୍ଟ କଂକ୍ରିଟ ରାସ୍ତାକୁ ଖୋଳି ଦିଆଯାଉଛି। କିନ୍ତୁ ଏହାର ମରାମତି ଦିଗରେ କୌଣସି ପଦକ୍ଷେପ ନିଆଯାଉ ନାହିଁ। ଯେଉଁଥିପାଇଁ ନୂଆ ତିଆରି ରାସ୍ତାର ଅବସ୍ଥା ଦୟନୀୟ ହେଉଛି। ରାସ୍ତା ଦାୟିତ୍ୱରେ ଥିବା ଅଧିକାରୀ ମାନେ ମଧ୍ୟ ନିରବ ଦର୍ଶକ। ଏପରିକି ରାସ୍ତା ନିର୍ମାଣର ୩ମାସ ନପୁରୁଣୁ ରାସ୍ତା ଖୋଳାଯାଉଥିବାରୁ ସରକାରଙ୍କ ଅର୍ଥ ଅପବ୍ୟବହାର କରାଯାଉଛି। ଏନେଇ କୌଣସି ଉତର ଦାୟିତ୍ୱ ଥିବା ଅଧିକାରୀ ସମ୍ବନ୍ଧରେ ଗ୍ରାମବାସୀ ଜାଣି ପାରୁନାହାନ୍ତି। ଯେଉଁଥିପାଇଁ ଏନେଇ କୌଣସି ଅଭିଯୋଗ ହେଉନାହିଁ। ଜିଲା ପ୍ରଶାସନ ଏଥିପ୍ରତି ଗୁରୁତ୍ୱ ଦେଲେ ସାଧାରଣ ଜନତା ଉପକୃତ ହୋଇପାରିବେ ବୋଲି କହିଛନ୍ତି।
Comments are closed.