୩ଟି ମଡେଲର ସପ୍ଲାଇ ବନ୍ଦ କରିବ ଟୋୟୋଟା, ଇଞ୍ଜିନରେ ରହିଛି ତ୍ରୁଟି
![](https://samajalive.in/wp-content/uploads/2024/01/Capture-50-750x430.jpg)
ନୂଆଦିଲ୍ଲୀ : ଗାଡି ନିର୍ମାତା କମ୍ପାନୀ ଟୋୟୋଟା କିର୍ଲୋସ୍କର ନିଜର କିଛି ଗାଡିର ସପ୍ଲାଇ ରୋକିବାକୁ ପ୍ରସ୍ତୁତ ହେଉଛି । କମ୍ପାନୀ ନିକଟରେ ଏକ ବୟାନରେ ଏନେଇ ସୂଚନା ଦେଇଛି । ଟୋୟୋଟା ଇନୋଭା କ୍ରିଷ୍ଟା, ଟୋୟୋଟା ଫର୍ଚ୍ୟୁନର ଏବଂ ଟୋୟୋଟା ହାଇଲକ୍ସର ସପ୍ଲାଇ ଆଗାମୀ କିଛି ମାସ ପର୍ଯ୍ୟନ୍ତ ବନ୍ଦ ରହିବ । କମ୍ପାନୀ ଜଣାଇଛି କି ଅସ୍ଥାୟୀ ରୂପେ ଏହି ୩ ମଡେଲର ସପ୍ଲାଇ ଉପରେ ରୋକ ଲଗାଇଦିଆଯାଇଛି । ଏହି ୩ ମଡେଲର ଡିଜେଲ ଇଞ୍ଚିନରେ କିଛି ତ୍ରୁଟି ନଜର ଆସିଛି । ଏହି କାରଣରୁ କମ୍ପାନୀ ଏମିତି ନିଷ୍ପତ୍ତି ନେଇଛି । କମ୍ପାନୀ ଆଗାମୀ କିଛି ଦିନ ପର୍ଯ୍ୟନ୍ତ ଏହି ୩ ମଡେଲର କୌଣସି ସପ୍ଲାଇ କରିବନି । ଯଦି ଆପଣ ଏହି ୩ଟି ମଡେଲରୁ କୌଣସିକୁ କିଣିବାକୁ ପ୍ରସ୍ତୁତ ହେଉଥିଲେ ତେବେ ଏହି ଖବର ଥରେ ପଢିଦିଅନ୍ତୁ ।
ଗାଡି ନିର୍ମାତା ଟୋୟୋଟା କିର୍ଲୋସ୍କର ମୋଟର ଡିଜେଲ ଇଞ୍ଜିନରେ କିଛି ତ୍ରୁଟି ଦେଖିବାକୁ ପାଇବା ପରେ ଏମିତି ନିଷ୍ପତ୍ତି ନେଇଛି । କମ୍ପାନୀ ଦିନକ ପୂର୍ବରୁ କହିଥିଲା କି ଡିଜେଲ ଇଞ୍ଜିନ୍ ବିଶିଷ୍ଟ ୩ ମଡେଲର ହର୍ସ ପାଓ୍ବର ଆଉଟପୁଟ ସମ୍ବନ୍ଧିତ ପରୀକ୍ଷଣରେ ଅନିୟମିତତା ସାମ୍ନାକୁ ଆସିଛି । ଭାରତରେ ଏହି ଇଞ୍ଜିନର ବ୍ୟବହାର ଇନୋଭା କ୍ରିଷ୍ଟା, ଫର୍ଚ୍ୟୁନର ଓ ହାଇଲକ୍ସ ମଡେଲରେ କରାଯାଏ । ବୈଶିକ ସ୍ତରରେ ୧୦ଟି ମଡେଲରେ ଏହି ଇଞ୍ଜିନକୁ ବ୍ୟବହାର କରାଯାଏ । ଏଥିରେ ଜାପାନର ୬ ମଡେଲ ମଧ୍ୟ ସାମିଲ ।
ଏସମ୍ପର୍କରେ ଟୋୟୋଟା କିର୍ଲୋସ୍କର ମୋଟରର ମୁଖପାତ୍ର କହିଛନ୍ତି କି ଏହି ତ୍ରୁଟି ଇଞ୍ଜିନର ପାଓ୍ବର ଏବଂ ଟର୍କରେ ରହିଛି । କିନ୍ତୁ ହର୍ସପାଓ୍ବର, ଟର୍କ ବା ଇଞ୍ଜିନ ସମ୍ପର୍କିତ ଅନ୍ୟ ମାମଲାରେ କୌଣସି ସମସ୍ୟା ଦେଖାଦେଇନି । ତେବେ ସମସ୍ୟାର ସମାଧାନ ପାଇଁ କମ୍ପାନୀ କିଛି ମାସ ପର୍ଯ୍ୟନ୍ତ ଗାଡିର ସପ୍ଲାଇ ବନ୍ଦ କରିବାକୁ ନିଷ୍ପତ୍ତି ନେଇଛି । ତେବେ ଏହା ମଧ୍ୟରେ କମ୍ପାନୀ ଏହି ୩ଟି ମଡେଲର ଅର୍ଡର ନେବା ଜାରି ରଖିବ ।
Comments are closed.