ରାଜଗାଙ୍ଗପୁର: ପାଣିକୁ ନେଇ ତାତିଲେ ଗ୍ରାମବାସୀ, ଦେଲେ ଆନ୍ଦୋଳନ ଚେତାବନୀ। ସୁନ୍ଦରଗଡ଼ ଜିଲା ରାଜଗାଙ୍ଗପୁର ଅନ୍ତର୍ଗତ ଜାମପାଲିଠାରେ ଥିବା ଓସିଏଲ ଆଇରନ ଆଣ୍ଡ ଷ୍ଟିଲ କାରଖାନା ବିନା ଗ୍ରାମସଭାରେ ଗମାରଡିହିସ୍ଥିତ ପୁରୁଣା ପଥର ଖଣିରୁ ଜମିଥିବା ପାଣି ନେଉଥବାରୁ ସ୍ଥାନୀୟ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି। ରାଜଗାଙ୍ଗପୁର ନିକଟସ୍ଥ ଝାଡ଼ବେଡା ପଞ୍ଚାୟତବାସୀ ଏହାକୁ ନେଇ ଏକ ସ୍ବତନ୍ତ୍ର ଗ୍ରାମସଭା ମାଧ୍ୟମରେ ଗମାରଡିହି ମାଇନ୍ସରୁ ଗୋଟିଏ ବୁନ୍ଦା ପାଣି କାରଖାନାକୁ ଦେବୁ ନାହିଁ ବୋଲି ଚେତାବନୀ ଦେଇଛନ୍ତି।
ବିନା ଗ୍ରାମସଭାରେ ଗମାରଡିହିଠାରେ ଥିବା ଟାଟା କମ୍ପାନୀର ବନ୍ଦ ହୋଇଥିବା ମାଇନ୍ସରୁ ଜାମପାଲି ସ୍ପଞ୍ଜ କାରଖାନା ପ୍ରତିଦିନ ଲକ୍ଷ ଲକ୍ଷ ଲିଟର ପାଣି ନେଉଛି, ଯାହା ଫଳରେ ଆଖପାଖ ଅଞ୍ଚଳର ପ୍ରାୟ ୫/୬ ଟି ଗ୍ରାମରେ ବର୍ତ୍ତମାନଠାରୁ ପାଣି ସଙ୍କଟ ଦେଖା ଦେଇଛି। ନଳକୂପଗୁଡ଼ିକରେ ପାଣି ଆସୁନାହିଁ, ଭୂତଳ ଜଳସ୍ତର ତଳକୁ ତଳକୁ ଯାଉଛି। ଏହାକୁ ବିରୋଧ କରି ସ୍ଥାନୀୟ ସରକାରୀ ଅଧିକାରୀଙ୍କଠାରୁ ନେଇ ଜିଲାପାଳଙ୍କୁ ଲିଖିତ ଭାବରେ ଅଭିଯୋଗ କରାଯାଇଛି। ମାତ୍ର ଗତ ବିଜେଡି ସରକାର ଅମଳରୁ ଏପରି ଚାଲୁଛି, ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଦାବିକରି କରି ଝାରବେଡା ପଂଚାୟତ କାର୍ଯ୍ୟାଳୟଠାରେ ସ୍ୱତନ୍ତ୍ର ଗ୍ରାମସଭାର ଆୟୋଜନ କରାଯାଇଥିଲା। ଗ୍ରାମସଭାରେ ଶହ ଶହ ଗ୍ରାମବାସୀ ଉପସ୍ଥିତ ରହି ଖାଦାନରୁ ପାଣି ନେବାକୁ ଦେବୁନାହିଁ ବୋଲି ଚେତାବନୀ ଦେଇଛନ୍ତି।
