ଭୁବନେଶ୍ୱର: ଘରୋଇ ଦଳ ଓଡ଼ିଶା ଏଫସିକୁ ୩-୨ଗୋଲରେ ହରାଇ ଇଷ୍ଟ୍ ବେଙ୍ଗଲ୍ ଏଫସି କଳିଙ୍ଗ ସୁପର କପ୍ ବିଜେତା ହୋଇଛି । ରବିବାର ସନ୍ଧ୍ୟାରେ ଖେଳାଯାଇଥିବା ଫାଇନାଲ ମ୍ୟାଚ ବେଶ ଚିତାକର୍ଷକ ହୋଇଥିଲା । ଡିଫେଣ୍ଡିଂ ଚାମ୍ପିଅନ ଓଡ଼ିଶା ଓ ଇଷ୍ଟ ବେଙ୍ଗଲ ଫାଇନାଲ ଖେଳିବା ପୂର୍ବରୁ କଳିଙ୍ଗ ଷ୍ଟାଡିୟମରେ ଦର୍ଶକ ଭରପୂର ରହିଥିଲେ । ଫାଇନାଲ ମ୍ୟାଚ ପ୍ରବଳ ସଂଘର୍ଷପୂର୍ଣ୍ଣ ହୋଇଥିଲା । ଶେଷରେ ୩-୨ଗୋଲରେ ଇଷ୍ଟ ବେଙ୍ଗଲ ଓଡ଼ିଶାକୁ ହରାଇ ଚାମ୍ପିଅନ ହୋଇଥିଲା । ନିର୍ଦ୍ଧାରିତ ସମୟରେ ଖେଳ ୨-୨ ଗୋଲରେ ରହିଥିବାରୁ ଅତିରିକ୍ତ ସମୟର ସହାୟତା ନିଆଯାଇଥିଲା । ୧୧୧ତମ ମିନିଟରେ ସିଲଭା ବିଜୟୀ ଗୋଲ ଦେଇ ଦଳକୁ ଚାମ୍ପିଅନ କରାଇଥିଲେ ।
ଫାଇନାଲ ମ୍ୟାଚରେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେଇଥିଲେ । ଖେଳ ଆରମ୍ଭ ହେବା ପୂର୍ବରୁ ମୁଖ୍ୟମନ୍ତ୍ରୀ ଉଭୟ ଦଳର ଖେଳାଳୀଙ୍କୁ ଭେଟି ଫାଇନାଲ ପାଇଁ ଶୁଭେଚ୍ଛା ଜଣାଇଥିଲେ । ମୁଖ୍ୟମନ୍ତ୍ରୀ କହିଥିଲେ ‘କଳିଙ୍ଗ ଷ୍ଟାଡିୟମରେ ଓଡ଼ିଶା ଆଉ ଏକ ବଡ ପ୍ରତିଯୋଗିତା ଆୟୋଜନରେ ସଫଳ ହୋଇଥିବାରୁ ଏହା ମୋତେ ଗର୍ବିତ କରିଛି । ୧୬ଟି ଦଳକୁ ନେଇ ଟୁର୍ଣ୍ଣାମେଣ୍ଟ ଆୟୋଜନ କରିବା ଏବଂ ସବୁ ଦଳକୁ ସମସ୍ତ ସୁବିଧା ସୁଯୋଗ ଯୋଗାଇ ଦେବା ପ୍ରମାଣିତ କରିଛି ଓଡ଼ିଶା ଫୁଟବଲର ବିକାଶରେ ବେଶ ସକରାତ୍ମକ ରହିଛି । ସର୍ବଭାରତୀୟ ଫୁଟବଲ ସଂଘ ସହ ଓଡ଼ିଶାର ସହଭାଗିତାକୁ ଦୃଢ କରିବା ଏବଂ ଦେଶରେ ଫୁଟବଲର ବିକାଶରେ ସହାୟକ ହେବା ଆମର ଲକ୍ଷ୍ୟ ବୋଲି ନବୀନ କହିଛନ୍ତି ।
ଉଦଯାପନୀ ଉତ୍ସବରେ ‘୫-ଟି ଓ ନବୀନ ଓଡ଼ିଶା’ ଅଧ୍ୟକ୍ଷ ଭି.କେ ପାଣ୍ଡିଆନ ମୁଖ୍ୟ ଅତିଥି ଭାବେ ଯୋଗ ଦେଇ ଚାମ୍ପିଅନ ଦଳକୁ ଟ୍ରଫି ଏବଂ ୨୫ଲକ୍ଷ ଟଙ୍କାର ଚେକ୍ ପ୍ରଦାନ କରିଥିଲେ । ଇଷ୍ଟ ବେଙ୍ଗଲକୁ ଶୁଭେଚ୍ଛା ଜଣାଇ ପାଣ୍ଡିଆନ କହିଥିଲେ ‘ଓଡ଼ିଶା ଏଫସିର ପ୍ରଦର୍ଶନ ଆରମ୍ଭରୁ ଫାଇନାଲ ପର୍ଯ୍ୟନ୍ତ ପ୍ରଶଂସନୀୟ ରହିଥିଲା । ଦେଶର ୧୬ଟି କ୍ଲବକୁ ନେଇ ଏବେ ବଡ ଟୁର୍ଣ୍ଣାମେଣ୍ଟ ଆୟୋଜନ କରିବା ଆମ ପାଇଁ ସୌଭାଗ୍ୟର ବିଷୟ । କଳିଙ୍ଗ ସୁପର କପର ଉତ୍ସାହ ଅଗଣିତ ଯୁବକଙ୍କୁ ଫୁଟବଲ ଖେଳିବାକୁ ଅନୁପ୍ରାଣିତ କରିବ ବୋଲି ମୋର ବିଶ୍ୱାସ’ ।
Comments are closed.