ମୁମ୍ବଇ: ସେଲ୍ଫି ନେବାକୁ ଆସିଥିବା ପ୍ରଶସଂକଙ୍କୁ ଚାପୁଡ଼ା ମାରିବା ମହଙ୍ଗା ପଡ଼ିଲା। ଭିଡିଓ ଭାଇରାଲ ହେବା ପରେ ସାମାଜିକ ଗଣମାଧ୍ୟମରେ ଲୋକଙ୍କ ଆକ୍ରୋଶର ଶିକାର ହୋଇଛନ୍ତି ବଲିଉଡ଼ ଅଭିନେତା ନାନା ପାଟେକର। ଏହି ଘଟଣାକୁ ନେଇ ଏବେ ନିଜ ପ୍ରତିକ୍ରିୟା ରଖିଛନ୍ତି ନାନା ପାଟେକର। ଇନ୍ଷ୍ଟାଗ୍ରାମରେ ଏକ ଭିଡିଓ ଶେୟାର କରି ସମ୍ପୂର୍ଣ୍ଣ ଘଟଣା ବିଷୟରେ କହିଛନ୍ତି ଅଭିନେତା।
ଭିଡିଓରେ ନାନା ପାଟେକର କହିଛନ୍ତି, ‘‘ଦେଖନ୍ତୁ, ଗୋଟିଏ ଭିଡିଓ ଭାଇରାଲ ହେଉଛି। ଯେଉଁଥିରେ ମୁଁ ଗୋଟିଏ ପିଲାକୁ ମାରୁଥିବା ଦେଖାଯାଉଛି। ତେବେ ଏହା ଆମ ଚଳଚ୍ଚିତ୍ରର ଏକ ଅଂଶ। ଏହା ଆମ ଅଭ୍ୟାସ ସମୟର ଏକ ଦୃଶ୍ୟ। ପଛରୁ ଜଣେ ଯୁବକ ଆସି କହୁଛି, ‘ଏହି ଖରାପ ଟୋପି ବିକିବେ ? ମୁଁ ଟୋପି ପିନ୍ଧିଛି। ମୁଁ ତାକୁ ମାରୁଛି। ତାକୁ କହୁଛି, ଅଭଦ୍ରାମୀ ବନ୍ଦ କର। ଶାଳୀନତାର ସହ କଥା ହୁଅ। ଏମିତି କଥାବାର୍ତ୍ତା କରନ୍ତି ନାହିଁ। ଏହାପରେ ସେ ପଳାଉଛି। ଥରେ ଅଭ୍ୟାସ କରି ସାରିଥିଲୁ। ନିର୍ଦେଶକ କହିଲେ ଆଉ ଥରେ କରିବା। ଆମେ ଆରମ୍ଭ କରିଥିଲୁ, ଆଉ ଏତିକି ବେଳେ ଏହି ପିଲା, ଯିଏ ଭିଡିଓରେ ଦେଖାଯାଉଛି ସେ ଭିତରକୁ ଆସିଗଲା।’’ ଭିଡିଓ ଶେଷରେ ନାନା ପାଟେକର କହିଛନ୍ତି ଯେ, ଯଦି ସେ ପୁଅ ତାଙ୍କ ସାମ୍ନାକୁ ଆସେ ତେବେ ସେ ନିଜେ କ୍ଷମା ମାଗିବେ। ଫିଲ୍ମର ଶୁଟିଂ କାଶୀରେ ହୋଇଥିଲା।
ସୂଚନାଯୋଗ୍ୟ, ସାମାଜିକ ଗଣମାଧ୍ୟମରେ ଏକି ଭିଡିଓ ଭାଇରାଲ ହୋଇଥିଲା। ଭିଡିଓରେ ଅଭିନେତାଙ୍କୁ ବ୍ରାଉନ୍ ଟୋପି ଏବଂ କୋଟରେ ଦେଖିବାକୁ ମିଳିଛି। ନାନା ପାଟେକରଙ୍କ ଚାରିପଟେ ଲୋକଙ୍କ ଭିଡ଼ ଜମିଛି। ଏହି ସମୟରେ ଜଣେ ପ୍ରଶଂସକ ତାଙ୍କ ପାଖକୁ ଆସୁଛନ୍ତି। ସେ ନାନା ପାଟେକରଙ୍କ ସହ ସେଲ୍ଫି ନେବାକୁ ଚେଷ୍ଟା କରୁଛନ୍ତି, ଏତିକି ବେଳେ ଅଭିନେତା କ୍ରୋଧିତ ହୋଇ ତାଙ୍କୁ ଚାପୁଡ଼ା ମାରୁଛନ୍ତି। ଏହି ଘଟଣାର ଭିଡିଓ ଭାଇରାଲ ହେବା ପରେ ଅନେକ ଲୋକ ଏଥିରେ କମେଣ୍ଟ କରି ପ୍ରତିକ୍ରିୟାରେ ଅଭିନେତାଙ୍କୁ ଖୁବ୍ ସମାଲୋଚନା କରିଛନ୍ତି।
