ଝାରସୁଗୁଡ଼ା: ଏକ ବାଣ କାରଖାନାରେ ଭୟଙ୍କର ବିସ୍ଫୋରଣ ଘଟି ଜଣେ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଥିବା ସୂଚନା ମିଳିଛି । ଖବର ପାଇ ତୁରନ୍ତ ଘଟଣାସ୍ଥଳରେ ବ୍ରଜରାଜନଗର ଥାନା ପୁଲିସ ଓ ଦମକଳ ଗାଡ଼ି ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ମୃତ ଶ୍ରମିକ ଜଣଙ୍କ ହେଲେ ୨୫ ବର୍ଷୀୟ ସୁଶାନ୍ତ ଧୁରୁଆ ଏବଂ ତାଙ୍କ ଘର ବେଲପାହଡରେ ବୋଲି ଜଣାପଡିଛି ।
ସୂଚନାଯୋଗ୍ୟ, ବେଲପାହଡ଼ ଥାନା ଅନ୍ତର୍ଗତ ଛୁଆଳିବେର୍ଣ୍ଣା- ମିର୍ଦ୍ଧାଡିହି ମଧ୍ୟରେ ଥିବା ଜଗନ୍ନାଥ ସ୍ପାର୍କେଲ ନାମକ ଏକ ବାଣ କାରଖାନାରେ ଦିନ ପ୍ରାୟ ୧୧ଟା ବେଳେ ଭୟଙ୍କର ଶବ୍ଦ କରି ବିସ୍ଫୋରଣ ଘଟିଥିଲା। ବିସ୍ଫୋରଣ ଏତେ ଭୟଙ୍କର ଥିଲା ଯେ କାରଖାନାର କାନ୍ଥ ଭୁଶୁଡି ପଡିବା ସହ ମୃତ ଶ୍ରମିକଙ୍କ ଶରୀରର କିଛି ଅଂଶ ଅନ୍ୟ ସ୍ଥାନରେ ପଡିଥିବା ଦେଖିବାକୁ ମିଳିଥିଲା । ଏଥିରେ ଅନେକ ଶ୍ରମିକ ଆହତ ହୋଇଥିବା ବେଳେ ସଠିକ୍ ସଂଖ୍ୟା ଜଣାପଡି ନଥିବା ପୁଲିସ କହିଛି । ଖବର ଲେଖା ହେଲା ବେଳକୁ ଘଟଣାସ୍ଥଳରେ ପୁଲିସ ଓ ଦମକଳ ବାହିନୀ କର୍ମଚାରୀଙ୍କ ସହାୟତାରେ ଉଦ୍ଧାର କାର୍ଯ୍ୟ ଜାରି ରହିଥିଲା ।
