ଇସଲାମାବାଦ: ଆତଙ୍କବାଦୀ ସଂଗଠନ ତେହରିକ୍-ଇ-ତାଲିବାନ୍-ପାକିସ୍ତାନ (ଟିଟିପି)ର ସଦସ୍ୟମାନେ ଖାଇବର ପାଖତୁନ୍ଖୱା ଅନ୍ତର୍ଗତ ଚିତ୍ରାଲ ସେନା ମୁଖ୍ୟାଳୟ ଦଖଲ କରିଦେଇଥିବା ସୂଚନା ମିଳିଛି। ସଂଗଠନ ପକ୍ଷରୁ ସାମାଜିକ ଗଣମାଧ୍ୟମରେ ଏହାର ଫଟୋ ଓ ଭିଡିଓ ପ୍ରସାରିତ ହୋଇଛି। ଏଥିରେ ଆତଙ୍କବାଦୀମାନେ ସେନା ମୁଖ୍ୟାଳୟରେ ପ୍ରବେଶ କରୁଥିବା ଲକ୍ଷ୍ୟ କରାଯାଉଛି। ପୁନଶ୍ଚ ପାକିସ୍ତାନ ପତାକା ଓ ଚିତ୍ରାଲ ସେନାଳୟକୁ ଢେଲା ଫିଙ୍ଗୁଥିବା ଦେଖାଯାଉଛି। ସଂଗଠନ ଗତ ସପ୍ତାହରେ ସମ୍ପୃକ୍ତ ଅଞ୍ଚଳରେ ପ୍ରବଳ ଆକ୍ରମଣ କରିବା ସହ କିଛି ଗ୍ରାମକୁ ଦଖଲ କରିଥିବା ଖବର ପ୍ରକାଶିତ ହୋଇଥିଲା।
http://ଜି-୨୦: ସୁରକ୍ଷା ଦୃଷ୍ଟିରୁ ଦିଆଯାଇଥିଲା ଠାର ଶବ୍ଦ, ରାଜଘାଟକୁ ରୁଦ୍ରପୁର ଓ ପ୍ରଗତି ମଇଦାନକୁ ନିକେତନ
ସୂଚନାନୁଯାୟୀ, ଚିତ୍ରାଲ ସେନା ମୁଖ୍ୟାଳୟ ଦଖଲ ସମ୍ପର୍କିତ ଖବରକୁ ପାକିସ୍ତାନର ଇଣ୍ଟର ସର୍ଭିସେସ୍ ପବ୍ଲିକ ରିଲେସନ୍ସ (ଆଇଏସ୍ପିଆ) ବିଭାଗ ସ୍ବୀକାର କରିଛି। ଏହି ଦଖଲ ସମୟରେ ୪ ସେନାଧିକାରୀ ଓ ୭ ଆତଙ୍କବାଦୀ ପ୍ରାଣ ହରାଇଥିବା କୁହାଯାଇଛି। ଖାଇବର ପାଖତୁନ୍ଖୱା ଓ ବେଲୁଚିସ୍ତାନରେ ତାଲିବାନ ଆତଙ୍କବାଦୀମାନେ ନାହିଁନଥିବା ହିଂସାକାଣ୍ଡ ଘଟାଉଛନ୍ତି। ଏହି ସେନାଳୟ ଚୀନ୍ର ଜିନ୍ଜିଆଙ୍ଗ ପ୍ରଦେଶ ସଂଲଗ୍ନ। ଆଫଗାନିସ୍ତାନ ସୀମାରେ ବହୁ ସଂଖ୍ୟକ ଟିଟିପି ଆତଙ୍କବାଦୀ ଆସ୍ଥାନ ଜମାଇଥିବା ଓ ପାକିସ୍ତାନ ସେନା ଉପରେ ନଜର ରଖିଥିବା ଜଣାପଡ଼ିଛି।
(ଏହି ସମ୍ବାଦଟି ଆନ୍ତର୍ଜାତିକ ସମ୍ବାଦ ସରବରାହ ସଂସ୍ଥା ଫିଡ଼ରୁ ସଂଗୃହିତ, ତେଣୁ ଏହାର ତଥ୍ୟ ଓ ଫଟୋ ଯାଞ୍ଚ ଯୋଗ୍ୟ ଅଟେ।)
