ପାଟଣା: ଢେଙ୍କିକୋଟ ଫାଣ୍ଡି ଅନ୍ତର୍ଗତ ସାନ୍ତରାପୁର ଡଙ୍ଗାଦର ପୋଲ ନିକଟରେ ଆଜି ସଂଧ୍ୟା ପାଖାପାଖି ୮ଟା ସମୟରେ ହାଇୱା ପଛରେ ଏକ ବାଇକ୍ ପିଟି ହୋଇ ଦୁର୍ଘଟଣା ଗ୍ରସ୍ତ ହୋଇଛି। ଦୁର୍ଘଟଣାରେ ବାଇକ୍ ଥିବା ଜଣଙ୍କର ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି। ଉଭୟ ଙ୍କୁ ଅଗ୍ନିଶମ ବାହିନୀ ଉଦ୍ଧାର କରି ଘଟଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ରେ ଭର୍ତ୍ତି କରିଛି। ସେଠାରେ ଜଣେ ବ୍ୟକ୍ତିଙ୍କୁ ଡାକ୍ତର ମୃତ ଘୋଷଣା କରିଛନ୍ତି। ମୃତ ବ୍ୟକ୍ତି ଜଣଙ୍କ କରଞ୍ଜିଆ ଥାନା ଅଞ୍ଚଳ ପିଙ୍ଗୁ ଗ୍ରାମର ରାଜେନ୍ଦ୍ର ଚାତାର ବୋଲି ଜଣାପଡ଼ିଛି । ରାଜେନ୍ଦ୍ର ଶଶୁର ଘରକୁ ରକ୍ଷା ବନ୍ଧନ ପାଇଁ ଆସିଥିଲେ। ସଂଧ୍ୟାରେ ଢେଙ୍କିକୋଟରୁ ବୁଲାବୁଲି କରି ଫେରିବା ସମୟରେ ଏହି ଦୁର୍ଘଟଣା ଘଟିଛି। ଗୁରୁତର ଆହତ ଜଣଙ୍କ ଘଟଗାଁ ଥାନା ଅନ୍ତର୍ଗତ ତରା ପଞ୍ଚାୟତ ନିଶ୍ଚିନ୍ତପୁର ଗ୍ରାମର ସାହୁ ମୁଣ୍ଡା ବୋଲି ଜଣାପଡ଼ିଛି। ତାଙ୍କ ଅବସ୍ଥା ସଂକଟାପନ୍ନ ରହିଛି। ଉଭୟ ଢେଙ୍କିକୋଟ ରୁ ବାଇକ୍ ଯୋଗେ ନିଜ ଗ୍ରାମକୁ ଫେରୁଥିବା ସମୟରେ ଡଙ୍ଗାଦର ନାଳ ନିକଟରେ ରାସ୍ତା ପାର୍ଶ୍ବରେ ଛିଡା ହୋଇଥିବା ଏକ ହାଇଓ୍ବା ପଛରେ ବାଇକଟି ଧକ୍କା ଦେଇଥିଲା। ଖବର ପାଇ ଘଟଣାସ୍ଥଳରେ ଢେଙ୍କିକୋଟ ପୁଲିସ ପହଞ୍ଚି ହାଇଓ୍ବା କୁ ଜବତ କରି ଘଟଣାର ତଦନ୍ତ ଜାରି ରଖିଛି।
Comments are closed.