ଫୁଲବାଣୀ/ବ୍ରାହ୍ମଣୀଗାଁ: ଜଣେ ଗାଈ ଚରାଳିଙ୍କୁ ଗୁଳି କରି ହତ୍ୟା କରାଯାଇଛି। ଦାରିଙ୍ଗବାଡ଼ି ବ୍ଲକ ବ୍ରାହ୍ମଣୀଗାଁ ଥାନା କାଟିଙ୍ଗିଆ ପଞ୍ଚାୟତ ଖାରିଗୁଡ଼ା ଗ୍ରାମର ଜଣେ ଗାଈ ଚରାଳିଙ୍କୁ କେହି ଦୁର୍ବୃତ୍ତ ଗୁଳିକରି ହତ୍ୟା କରିଥିବା ଅଭିଯୋଗ ହୋଇଛି। ଏନେଇ ବ୍ରାହ୍ମଣୀଗାଁ ଥାନାରେ ଅଭିଯୋଗ ହୋଇଛି । ମୃତ ବ୍ୟକ୍ତି ଜଣକ ଖାରିଗୁଡ଼ା ଗ୍ରାମର ମାଦି ପତ୍ରା(୫୫) ବୋଲି ଜଣାପଡ଼ିଛି । ବ୍ରାହ୍ମଣୀଗାଁ ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ସୂଚନାନୁଯାୟୀ, ମୃତ ମାଦି ପ୍ରତିଦିନ ଭଳି ସିତାଙ୍ଗମାଜୁ ଜଙ୍ଗଲକୁ ଗାଈ ଚରାଇବା ପାଇଁ ଗୁରୁବାର ଦିନ ସକାଳୁ ବାହାରିଥିଲେ। ଅପରାହ୍ନ ୫ ଟାରେ କେବଳ ଗାଈଗୋରୁ ଗାଁକୁ ଫେରିଥିବା ବେଳେ ମାଦି ଆସି ନଥିଲେ। ଏହାପରେ ତାଙ୍କ ପୁଅ ଧର୍ମେନ୍ଦ୍ର ଓ ସ୍ବୀ ସିକମାଙ୍ଗା ଦୁହେଁ ଜଙ୍ଗଲକୁ ଖୋଜିବାକୁ ବାହାରିଥିଲେ। ଏହି ସମୟରେ ମାଦି ଗୁଳି ବିଦ୍ଧ ହୋଇ ମୃତ ଅବସ୍ଥାରେ ପଡ଼ି ରହିଥିବା ଦେଖିଥିଲେ । ମାଆ ଓ ପୁଅ ଗାଁକୁ ଆସି ସମସ୍ତଙ୍କୁ ଜଣାଇଥବା ସହ ବ୍ରାହ୍ମଣୀଗାଁ ଥାନାରେ ଅଭିଯୋଗ କରିଥିଲେ । ପୂର୍ବ ଶତ୍ରୁତାକୁ କେନ୍ଦ୍ର କରି ପଣସପଦର ଗ୍ରାମର ଜଣେ ଯୁବକ ହତ୍ୟା କରିଥିବା ପୁଅ ଧର୍ମେନ୍ଦ୍ର ଅଭିଯୋଗ କରିଛନ୍ତି । ମାଦିଙ୍କ ଶରୀରରେ ୨ ଗୋଟି ଗୁଳି ବାଜିଥିବା ଦେଖିବାକୁ ମିଳିଛି । ଥାନା ଅଧିକାରୀ ଚାପଧାରି ପ୍ରଧାନଙ୍କ ସମେତ ପୁଲିସ ଫୋର୍ସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
