ନୂଆଦିଲ୍ଲୀ : ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ‘ତଦନ୍ତରେ ଉତ୍କର୍ଷ ପଦକ-୨୦୨୩’ ପାଇଁ ୧୪୦ ଜଣ ପୁଲିସ୍ କର୍ମଚାରୀଙ୍କୁ ମନୋନୀତ କରାଯାଇଛି । ପ୍ରତିବର୍ଷ ଅଗଷ୍ଟ ୧୨ ତାରିଖରେ ଏହି ପୁରସ୍କାର ଘୋଷଣା କରାଯାଇଥାଏ। ୨୦୧୮ରେ ଏହି ପୁରସ୍କାର ସ୍ଥାପନ କରାଯାଇଥିଲା। ଅପରାଧ ତଦନ୍ତରେ ପେଶାଦାରୀତା ବୃଦ୍ଧି ଓ ତଦନ୍ତରେ ଉତ୍କୃଷ୍ଟ କାର୍ଯ୍ୟର ସ୍ୱୀକୃତି ପ୍ରଦାନ ପାଇଁ ଏହି ପୁରସ୍କାର ପ୍ରଦାନ କରାଯାଉଛି ।
ସ୍ୱରାଷ୍ଟ୍ର ମନ୍ତ୍ରଣାଳୟର ଅନୁସାରେ ଚଳିତଥର ଏହି ପୁରସ୍କାର ପାଇଥିବା କର୍ମଚାରୀଙ୍କ ମଧ୍ୟରେ ସିବିଆଇରୁ ୧୫ ଜଣ, ଏନ୍ଆଇଏରୁ ୧୨ ଜଣ, ଉତ୍ତରପ୍ରଦେଶରୁ ୧୦ଜଣ, କେରଳ ଓ ରାଜସ୍ଥାନରୁ ୯ ଜଣ ଲେଖାଏଁ, ତାମିଲନାଡୁରୁ ୮ ଜଣ, ମଧ୍ୟପ୍ରଦେଶରୁ ୭ ଜଣ , ଗୁଜରାଟରୁ ୬ ଜଣ ଓ ଚାରି ଜଣ ଓଡ଼ିଆ ପୁଲିସ କର୍ମଚାରୀ ଅଛନ୍ତି। ଅବଶିଷ୍ଟ ରାଜ୍ୟ, କେନ୍ଦ୍ରଶାସିତ ଅଞ୍ଚଳ ଓ ଅନ୍ୟ ସଂଗଠନ ଗୁଡ଼ିକରୁ ଅବଶିଷ୍ଟ କର୍ମଚାରୀ ରହିଛନ୍ତି । ପୁରସ୍କାର ବିଜେତା କର୍ମଚାରୀମାନଙ୍କ ମଧ୍ୟରେ ୨୨ ଜଣ ମହିଳା ପୁଲିସ୍ ଅଫିସର ରହିଛନ୍ତି ।
ଓଡ଼ିଶାରୁ ଉପ ଅଧିକ୍ଷକ ପ୍ରଭାତ କୁମାର ବିଶ୍ବାଳ ଓ ମାନସ ରଞ୍ଜନ ପ୍ରଧାନ ଏବଂ ଇନିସପେକ୍ଟର ପ୍ରଶାନ୍ତ କୁମାର ସାହୁ ଓ ଦୁର୍ଗେଶ ନନ୍ଦିନୀ ମହାନ୍ତି ପ୍ରମୁଖ ପୁରସ୍କାର ପାଇଁ ମନୋନୀତ ହୋଇଛନ୍ତି।
