ଗୋପାଳପୁର: ଗୋପାଳପୁର ସ୍ଥିତ ପାର୍କ ବାୟ ଜୋନ ପରିସରରେ ଓଡିଶା ସିଏସଆର ଫୋରମ୍ ପକ୍ଷରୁ ଓଡିଶା ସିଏସଆର ଏବଂ ପରିବେଶ କନକ୍ଲେଭ -୨୦୨୩ ଆଜି ଉଦଘାଟିତ ହୋଇଛି। ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବ୍ରହ୍ମପୁର ବିଶ୍ଵବିଦ୍ୟାଳୟ କୁଳପତି ପ୍ରଫେସର ଗୀତାଞ୍ଜଳି ଦାସ ଯୋଗ ଦେଇ କାର୍ଯ୍ୟକ୍ରମକୁ ଉଦଘାଟନ କରିବା ସହ ଦେଶରେ ରହିଥିବା ଶିଳ୍ପ ସଂସ୍ଥା ମାନେ ସେମାନଙ୍କ ଲାଭାଂଶର କିଛି ଅର୍ଥକୁ ଦେଶର ବିକାଶ, ଶିକ୍ଷା, ସ୍ବାସ୍ଥ୍ୟ କ୍ଷେତ୍ରରେ ସିଂହ ଭାଗ ଖର୍ଚ୍ଚ କରୁଥିବା ବେଳେ କେବଳ ୭ ଶତକଡା ପରିବେଶ ସୁରକ୍ଷା ପାଇଁ କେବଳ ଗଛ ଲଗାଇବା ପାଇଁ କରିଥାନ୍ତି। ତାହା ପରିତାପର ବିଷୟ ବୋଲି କହିବା ସହ ଏଥି ପ୍ରତି ସିଏସଆର ଫୋରମ୍ ଅଧିକ ଯତ୍ନବାନ ହେବା ସହ ପରିବେଶ ସୁରକ୍ଷା ପ୍ରତି ଅଧିକ ଧ୍ୟାନ ଦେବେ ବୋଲି ପ୍ରତିକ୍ରିୟା ରଖିଥିଲେ।
କନକ୍ଲେଭ ଆରମ୍ଭରେ ଓଡ଼ିଶା ସିଏସଆର ଫୋରମର ଆବାହକ ବି କେ ମିଶ୍ର ସ୍ବାଗତ ଭାଷଣ ପ୍ରଦାନ କରିଥିବା ବେଳେ ସମ୍ମାନିତ ଅତିଥି ଭାବେ ଏଲ ଆଇ ସି ବରିଷ୍ଠ ଡିଭିଜିନାଲ ମ୍ୟାନେଜର ଶ୍ରୀକାନ୍ତ ଦାରା ଏବଂ ମୁଖ୍ୟ ବକ୍ତା ଭାବେ ଜେଏସପିଏଲର ସିଏସଆର ଏବଂ ଶିକ୍ଷା ବିଭାଗ ସଭାପତି ପ୍ରସନ୍ନ ହୋତା ପ୍ରମୁଖ ମଞ୍ଚାସିନ ରହି ନିଜ ନିଜର ବ୍ୟକ୍ତବ୍ୟ ରଖିଥିଲେ। ସଭା ଶେଷରେ ସୁକାନ୍ତ ପଟ୍ଟନାୟକ ଧନ୍ୟବାଦ ଅର୍ପଣ କରିଥିଲେ। ଏହି କାର୍ଯ୍ୟକ୍ରମରେ ବିଭିନ୍ନ ଶିଳ୍ପ ସଂସ୍ଥାର ପ୍ରତିନିଧି ସମେତ ବିଶେଷଜ୍ଞ ମାନେ ଯୋଗଦେଇ ଆଲୋଚନାରେ ସାମିଲ ହୋଇଥିଲେ। ଅପରାହ୍ନରେ ଅନୁଷ୍ଠିତ ଆଲୋଚନା ଚକ୍ରରେ ପ୍ରଫେସର ସୁନ୍ଦର ନାରାୟଣ ପାତ୍ର, ନିଲାମ ମିଶ୍ର, ଡ଼ ବିଶ୍ବ ବନ୍ଦିତା କର, ଓମ୍ ପ୍ରକାଶ ସାହୁ, ମନୋରଞ୍ଜନ ମିଶ୍ର, ଦିଲ୍ଲିପ ମହାନ୍ତି, ଡ଼ ଲୋପାମୁଦ୍ରା ପ୍ରିୟଦର୍ଶିନୀ, ଆଶୁତୋଷ ଦାସ, ଜଗନ୍ନାଥ ଖୁଣ୍ଟିଆ, ଡ଼ ଆଦର୍ଶ ରଥ, ପ୍ରଫେସର ଏନ୍ ସି ସାହୁ ପ୍ରମୁଖ ଉପସ୍ଥିତ ରହିଥିଲେ।
