ତିଗିରିଆ : ଏକ ପିକ୍ଅପ୍ ଭ୍ୟାନରେ ବେଆଇନ ଗୋରୁ ଚୋରାଚାଲାଣ ହେଉଥିବା ବେଳେ ରବିବାର ବିଳମ୍ବିତ ରାତିରେ ତିଗିରିଆ ଥାନା ପୁଲିସ ଜବତ କରିଛି । ଗାଡ଼ିରେ ଚାଲାଣ ହେଉଥିବା ୧୮ଟି ଗୋରୁଙ୍କୁ ପୁଲିସ ଉଦ୍ଧାର କରିବା ସହିତ ଗାଡ଼ି ଚାଳକ ଏବଂ ପାଖରେ ଥିବା ଅନ୍ୟ ଜଣେ ସହଯୋଗୀକୁ ଗିରଫ କରି ଅଦାଲତ ଚାଲାଣ କରିଛି।
ଥାନା ସୂତ୍ରରୁ ମିଳିଥିବା ସୂଚନା ଅନୁଯାୟୀ ପୁଲିସ ଗତକାଲି ରାତିରେ ପଇଁତରା ମାରୁଥିବା ବେଳେ ନୂଆପାଟଣା ପଟରୁ ଏକ ଗୋରୁ ବୋଝେଇ ଗାଡ଼ି ଆସୁଥିବାର ବିଶ୍ଵସ୍ଥ ସୂତ୍ରରୁ ଖବର ପାଇଥିଲେ। ଏହି ଖବର ପାଇବା ପରେ ପୁଲିସ ବିନ୍ଧାଣିମା ବାଇପାସ୍ ଠାରେ ଜଗି ରହିଥିଲେ। ଉକ୍ତ ଗୋରୁ ବୋଝେଇ ଗାଡ଼ିକୁ ସେଠାରେ ଅଟକାଇ ଜବତ କରି ଥାନାକୁ ଆଣିଥିଲେ। ଭ୍ୟାନରେ ୧୮ ଟି ଗୋରୁ ଅତି ଅମାନୁଷିକ ଭାବେ ବୋଝେଇ କରି ଚାଲାଣ ହେଉଥିବାରୁ ସେଥି ମଧ୍ୟରୁ ଗୋଟିଏ ଗୋରୁ ମୁତ୍ୟୁ ବରଣ କରିଥିବା ବେଳେ ଅନ୍ୟ ସମସ୍ତ ଖଣ୍ଡିଆ ଖାବରା ହୋଇଥିଲେ। ଏଣୁ ସମସ୍ତ ଗୋରୁଙ୍କୁ ଥାନା ପରିସରରେ ଚିକିତ୍ସା କରାଯାଇ ଛଡାଯାଇଥିଲା। ଏହି ଘଟଣାରେ ପୁଲିସ ଏକ ମାମଲା ରୁଜୁ କରି ଗାଡିର ଚାଳକ ନରସିଂହପୁର ଥାନା ଅଞ୍ଚଳର ପ୍ରସନ୍ନ ବେହେରା (୫୨) ଏବଂ ସାଥିରେ ଥିବା ସହଯୋଗୀ କାନପୁର ଥାନା ଅଞ୍ଚଳର ଦେବାଶିଷ ବାରିକ୍ (୨୮)କୁ ଅଦାଲତ ଚାଲାଣ କରିଥିବା ଜଣାପଡ଼ିଛି।
