ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ୯୫ତମ ଶ୍ରାଦ୍ଧୋତ୍ସବ: ‘ସମାଜ’ ପକ୍ଷରୁ ରୋଟାରୀ ଭବନରେ ଆୟୋଜିତ ହେବ ମେଗା ରକ୍ତଦାନ ଶିବିର

କେନ୍ଦୁଝରଗଡ଼ : ଦୈନିକ ଖବରକାଗଜ ‘ସମାଜ’ର ପ୍ରତିଷ୍ଠାତା ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ୯୫ତମ ଶ୍ରାଦ୍ଧୋତ୍ସବ ପାଳନ ଅବସରରେ ରବିବାର ସକାଳ ସାଢ଼େ ୮ଟାରୁ କେନ୍ଦୁଝର ରୋଟାରୀ ଭବନ ଠାରେ ଏକ ଜିଲାସ୍ତରୀୟ ସ୍ୱେଛାକୃତ ମେଗା ରକ୍ତଦାନ ଶିବିର ଆୟୋଜିତ ହେବ। ଜିଲା ଯୋଜନା ବୋର୍ଡ ଅଧ୍ୟକ୍ଷ ତଥା ପାଟଣା ବିଧାୟକ ଜଗନ୍ନାଥ ନାଏକ, ବନଖଣ୍ଡ ଅଧିକାରୀ କେନ୍ଦୁଝର ଧନରାଜ ଏଚଡିଓ କେନ୍ଦୁଝରଗଡ ନଗରପାଳ ନିକୁ ସାହୁ ପ୍ରମୁଖ ରକ୍ତଦାନ ଶିବିର କାର୍ଯ୍ୟକ୍ରମରେ ଅତିଥି ଭାବେ ଯୋଗଦେବାର କାର୍ଯ୍ୟକ୍ରମ ରହିଛି। ଜୁନ ୧୮ରୁ ୨୫ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବାକୁଥିବା ‘ସେବା ଓ ସେବକ’ ସପ୍ତାହ ପାଳନ ପରିପ୍ରେକ୍ଷୀରେ ଆୟୋଜିତ ହେବାକୁଥିବା ଏହି ରକ୍ତଦାନ ଶିବିରରେ ଜିଲାର ବିଭିନ୍ନ ସ୍ଥାନରୁ ସ୍ୱେଛାକୃତ ରକ୍ତଦାତା ରକ୍ତଦାନ କରିବାକୁ ‘ସମାଜ’ ପରିବାର ପକ୍ଷରୁ ଅନୁରୋଧ କରାଯାଇଛି।

ସୂଚନାଯୋଗ୍ୟ ଯେ, ଗୋପବନ୍ଧୁଙ୍କ ଶ୍ରାଦ୍ଧୋତ୍ସବ ପରିପ୍ରେକ୍ଷୀରେ ରବିବାର ସକାଳ ୭.୩୦ମି.ରେ ରିଜର୍ଭ ପୋଲିସ କଲୋନୀ ପରିସରସ୍ଥିତ ପୁଷ୍କରିଣୀରେ ତିଳ ତର୍ପଣ ପରେ ସକାଳ ୮ଟାରେ ଟେଲିଫୋନ ଏକ୍ସଚେଞ୍ଜଛକସ୍ଥିତ ଗୋପବନ୍ଧୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ପୂର୍ବକ ଶ୍ରଦ୍ଧାଞ୍ଜଳି ଅର୍ପଣ କାର୍ଯ୍ୟକ୍ରମରେ ମଧ୍ୟ ବୁଦ୍ଧିଜୀବୀ, ଶୁଭେଛୁ ଓ ସହରବାସୀ ଯୋଗଦେବାକୁ କେନ୍ଦୁଝର ଜିଲା ସମାଜ ପରିବାର ପକ୍ଷରୁ ବିନମ୍ର ନିବେଦନ କରାଯାଇଛି।