ବଡ଼ମ୍ବା : ବେପରୁଆ ଟ୍ରକ ଚାଳନା ଯୋଗୁଁ ଦୁର୍ଘଟଣାର ସମ୍ମୁଖୀନ ହୋଇ ଜଣେ ଲୋକର ଶୋଚନୀୟ ମୃତ୍ୟୁ ଘଟିଛି । ମୃତକ ହେଲେ ବଡ଼ମ୍ବା ବ୍ଲକ ଅଧିନସ୍ଥ ଅମାନ୍ତିଆ ଗ୍ରାମର ମେଘନାଦ ବେହେରା(୫୨) । ଘଟଣାରୁ ପ୍ରକାଶ ମେଘନାଦ ବଡ଼ମ୍ବା-ନରସିଂହପୁର ମୁଖ୍ୟ ସଡ଼କପଥର ବାମ ପାର୍ଶ୍ବରେ ସୋମବାର ମଧ୍ୟାହ୍ନରେ ସାଇକେଲ ଯୋଗେ ନିଜ ଘରକୁ ଯାଉଥିଲେ। ମାତ୍ର କିଛିବାଟ ଘର ଅଛି ଏହି ସମୟରେ ବିପରିତ ଦିଗରୁ ଆସୁଥିବା ଏକ ଦ୍ରୁତଗାମୀ ଟ୍ରକ ଭାରସାମ୍ୟ ହରାଇ ମେଘନାଦଙ୍କ ସାଇକେଲକୁ ପଛରୁ ଧକ୍କା ଦେଇଥିଲା । ଫଳରେ ମେଘନାଦ ଟ୍ରକର ବାମପାଖ ଆଗ ଚକତଳେ ପଡ଼ିଯାଇଥିଲେ। ଏହି ଦୁର୍ଘଟଣାରେ ମେଘନାଦଙ୍କ ମୁଣ୍ଡ ସମେତ ହାତ ତଥା ଶରିରର ବିଭିନ୍ନ ଅଙ୍ଗରେ ଗଭୀର ଆଘାତ ଲାଗି ପ୍ରଚୁର ରକ୍ତସ୍ରାବ ହୋଇଥିଲା। ଗ୍ରାମବାସୀ ଉଦ୍ଧାର କରି ଆହତଙ୍କୁ ସଙ୍ଗେସଙ୍ଗେ ବଡ଼ମ୍ବା ଡାକ୍ତରଖାନାକୁ ଚିକିତ୍ସା ଲାଗି ପଠାଇଥିଲେ। ତେବେ ସେଠାରେ ତାଙ୍କର ମୃତ୍ୟୁ ଘଟିଥିଲା।
ଏହି ଘଟଣାପରେ ଘଟଣାସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଥିଲା। ଗ୍ରାମବାସୀ ଦୁର୍ଘଟଣା ଘଟାଇଥିବା ଟ୍ରକକୁ ଅଟକ ରଖିବା ସହ ମୃତକଙ୍କୁ କ୍ଷତିପୁରଣ ଦାବି କରିଥିଲେ । ଖବରପାଇ ବଡ଼ମ୍ବା ତହସିଲଦାର ନୀଳକଣ୍ଠ ବେହେରା, ଥାନା ଅଧିକାରୀ ସ୍ନିଗ୍ଧାମୟୀ ବରାଳ, ଜିଲାପରିଷଦ ସଭ୍ୟ ରବିନ୍ଦ୍ର କୁମାର ସାହୁ, ସ୍ଥାନୀୟ ସରପଞ୍ଚ ରୁନୁ ଦାସ, ବ୍ଲକ ଉପାଧ୍ୟକ୍ଷାଙ୍କ ପ୍ରତିନିଧି ସୁଶାନ୍ତ କୁମାର ଜେନା ପ୍ରମୁଖ ପହଞ୍ଚି ଉତ୍ୟକ୍ତ ଜନତାଙ୍କ ସହିତ ଆଲୋଚନା କରିଥିଲେ। ପରେ ପରେ ଏହି ଘଟଣା ସମ୍ପର୍କରେ ବିଧାୟକ ଦେବୀପ୍ରସାଦ ମିଶ୍ରଙ୍କୁ ଅବଗତ କରାଯାଇଥିଲା। ବିଧାୟକ ଶ୍ରୀ ମିଶ୍ର ଏଥିରେ ଗଭୀର ଶୋକପ୍ରକାଶ କରିବାସହ ମୃତକଙ୍କ ପରିବାରକୁ ତତ୍କାଳ ସହାୟତା ଯୋଗାଇଦେବାକୁ ଜିଲାପାଳଙ୍କୁ ଯୋଗାଯୋଗ କରିଥିଲେ। ଫଳସ୍ୱରୁପ ଜିଲାପାଳ ଭବାନୀଶଙ୍କର ଚୟିନୀଙ୍କ ସୁପାରିଶ କ୍ରମେ ମୃତକଙ୍କୁ ଜିଲା ରେଡକ୍ରସ ପାଣ୍ଠିରୁ ୩୦ହଜାର ଟଙ୍କାର ସହାୟତା ଯୋଗାଇ ଦିଆଯିବ ବୋଲି ତହସିଲଦାର ଘୋଷଣା କରିବାରେ ଉତ୍ତେଜନା ହ୍ରାସ ପାଇଥିଲା । ସେହିଭଳି ବ୍ଲକ ଅଧ୍ୟକ୍ଷ ରଘୁପତି ମହାନ୍ତି ଏହି ଘଟଣାରେ ଦୁଃଖପ୍ରକାଶ କରିବା ସହ ଗରିବ ମେଘନାଦଙ୍କ ପରିବାରକୁ ତତ୍କାଳ ହରିଶ୍ଚନ୍ଦ୍ର ସହାୟତା ଯୋଗାଇ ଦେବାନେଇ ସରପଞ୍ଚଙ୍କୁ ଯୋଗାଯୋଗ କରିଥିବା ଜଣାଇଛନ୍ତି । ଶବ ବ୍ୟବଛେଦ ପରେ ଶୋକାକୁଳ ପରିବେଶରେ ଗ୍ରାମ୍ୟ ଶ୍ମଶାନରେ ମୃତକଙ୍କ ଅନ୍ତିମ ସଂସ୍କାର କରାଯାଇଛି । ପୁଲିସ ଦୁର୍ଘଟଣା ଘଟାଇଥିବା ଟ୍ରକକୁ ଜବତ କରିବାସହ ଡ୍ରାଇଭରକୁ ଗିରଫ କରି ଏହି ଘଟଣାର ତଦନ୍ତ ଚଳାଇଥିବା ଜଣାଯାଇଛି।
