ଆଠଗଡ : ପ୍ରଚଣ୍ଡ ଗ୍ରୀଷ୍ମ ପ୍ରବାହ ସାଙ୍ଗକୁ ଅହରହ ବିଦ୍ୟୁତ ବିଭ୍ରାଟ ଆଠଗଡ ଅଞ୍ଚଳରେ ଜନଜୀବନ କଲବଲ ହେଉଛି । ଗତ ପ୍ରାୟ ସପ୍ତାହେ ହେଲାଣି ରୌଦ୍ରତାପ ୪୦ ଡିଗ୍ରୀ ସେଲସିୟସ ଉପରେ ରହୁଥିବାବେଳେ ଗତକାଲି ଓ ଆଜି ପାରଦ ୪୨ ଡିଗ୍ରୀ ଉପରକୁ ଯିବା ଫଳରେ ଜୀବନ ଦୁର୍ବିସହ ହୋଇପଡିବା ଦ୍ୱାରା ଜନସାଧାରଣ ବିଶେଷକରି ଗରିବ ଶ୍ରେଣୀର ଲୋକ ତ୍ରାହି ତ୍ରାହି ଡାକୁଛନ୍ତି । ସକାଳ ୯ ସୁଦ୍ଧା ତାପମାତ୍ରା ୩୬ ରୁ ୩୮ ଡିଗୀ ସେଲସିୟସ ହୋଇଯାଉଛି । ସକାଳ ୧୦ଟା ପରଠାରୁ ଲୋକ ପଦାକୁ ବାହାରିବା ବନ୍ଦ କରି ଦେବା ଫଳରେ ରାସ୍ତାଘାଟ ଶୂନଶାନ ହେବା ସହ ଦୋକାନ ବଜାରରେ ବ୍ୟବସାୟ ସନ୍ଧ୍ୟା ପର୍ଯ୍ୟନ୍ତ ବାଧାପ୍ରାପ୍ତ ହେଉଥିବାରୁ ବ୍ୟବସାୟୀ ଚିନ୍ତାରେ ରହୁଛନ୍ତି । ତା ସହ ବାରମ୍ବାର ବିଦ୍ୟୁତ ବିଭ୍ରାଟ ଯୋଗୁଁ ପରିସ୍ଥିତ ଅସହ୍ୟ ଓ ଯନ୍ତ୍ରଣାଦାୟକ ହେଉଛି । ପ୍ରତି ଘଣ୍ଟାକରେ ୩-୪ ଥର ଲାଇନ କଟୁଛି। ବାରମ୍ବାର ବିଦ୍ୟୁତ ବିଭ୍ରାଟ ଯୋଗୁଁ ପାନୀୟଜଳ ଯୋଗାଣ ମଧ୍ୟ ବାଧାପ୍ରାପ୍ତ ହେଉଥିବାରୁ ଲୋକଙ୍କ ସମସ୍ୟା ବହୁଗୁଣିତ ହୋଇଯାଉଛି । ବିଦ୍ୟୁତ ବିଭ୍ରାଟ କାହିଁକି ହେଉଛି ବୋଲି ବିଭାଗୀୟ କର୍ତ୍ତୃପକ୍ଷଙ୍କୁ ପଚାରିଲେ ଆବଶ୍ୟକତାଠାରୁ ଅଧିକ ଲୋଡ ପଡୁଥିବାରୁ ଆପଣାଛାଏଁ ଲାଇନ୍ ଟ୍ରିପ କରିଯାଉଛି ବୋଲି ଉତ୍ତର ମିଳୁଛି। ପ୍ରବଳ ଗରମ ପାଇଁ ଉପଭୋକ୍ତାମାନେ ବହୁ ସଂଖ୍ୟକ ଏସି, କୁଲର ଓ ଫ୍ୟାନ ବ୍ୟବହାର କରୁଥିବାରୁ ଟ୍ରାନ୍ସଫର୍ମର ଗୁଡିକର କ୍ଷମତାଠାରୁ ଢେର ଅଧିକ ଚାପ ପଡୁଥିବା କାରଣରୁ ଆପେ ଆପେ ବିଦ୍ୟୁତ ସରବରାହ ବ୍ୟାଘାତ ହେଉଛି । ଆଠଗଡ ସହର ଅପେକ୍ଷା ଗ୍ରାମାଞ୍ଚଳରେ ବିଦ୍ୟୁତ ବିଭ୍ରାଟ ଅଧିକ ଓ ଦୀର୍ଘ ସମୟ ଧରି ଲାଇନ କରୁଥିବାରୁ ଗାଁ ଗହଳି ଲୋକଙ୍କ ଅବସ୍ଥା ଆହୁରି ଅଧିକ ସଙ୍ଗିନ ହୋଇପଡୁଛି । ଆକାଶରେ କଳା ବାଦଲ ଦେଖିବା ମାତ୍ରେ ଟାଟା ପାୱାର କର୍ତ୍ତୃପକ୍ଷ ଲାଇନ କାଟି ଦେଉଛନ୍ତି। ଏଭଳି ପ୍ରଚଣ୍ଡ ରୌଦ୍ରତାପ ଓ ଗୁଳୁଗୁଳି ସମୟରେ ଯଦି କାଳବୈଶାଖୀ ପ୍ରଭାବରେ ବର୍ଷା ପବନ ହେଉଛି, ତେବେ ଘଣ୍ଟା ଘଣ୍ଟା ଧରି ବିଦ୍ୟୁତ ସରବରାହ ବ୍ୟାହତ ହେଉଛି । ଆଠଗଡ ସହରରେ ଯଦି ଏପରି ଅବସ୍ଥା ତେବେ ଗ୍ରାମାଞ୍ଚଳ ଗୁଡିକର ଅବସ୍ଥା କଣ ହେଉଥିବ ସହଜରେ ଅନୁମେୟ ହେଉଛି । ଏହିପରି ଦୁର୍ବିସହ ପରିସ୍ଥିତିରୁ କେବେ ତ୍ରାହି ମିଳିବ ତାହା ଏବେ ସମସ୍ତଙ୍କ ମନରେ ଉଙ୍କି ମାରୁଛି । ଉପଖଣ୍ଡ ପ୍ରଶାସନ ସମ୍ଭାବ୍ୟ ଅଂଶୁଘାତର ମୁକାବିଲା ପାଇଁ କୌଣସି ପ୍ରସ୍ତୁତି ବା ଲୋକଙ୍କୁ ସଚେତନ କରାଯାଉ ନାହିଁ, କୌଣସି ଯାଗାରେ ଜଳଛତ୍ର ନାହିଁ । କେବଳ ଆଠଗଡ ଉପଖଣ୍ଡ ଡାକ୍ତରଖାନାରେ ଅଂଶୁଘାତ ଆକ୍ରାନ୍ତଙ୍କ ପାଇଁ ଏକ ଶୀତତାପ ନିୟନ୍ତ୍ରିତ କକ୍ଷ ସହ କିଛି ଶଯ୍ୟା ପ୍ରସ୍ତୁତ ରଖାଯାଇଥିବା ଜଣାପଡିଛି । ରଜ ପରେ ଦକ୍ଷିଣ ପଶ୍ଚିମ ମୌସୁମୀ ବାୟୁ ଓଡ଼ିଶାରେ ପ୍ରବେଶ କରିବା ପରେ ତାପମାତ୍ରା କିଛିଟା ହ୍ରାସ ପାଇବ ବୋଲି ଆଶା କରାଯାଉଛି।
Popular Categories
Previous article
Next article