ନୂଆଦିଲ୍ଲୀ: ଚୀନ୍କୁ ପଛରେ ପକାଇ ବିଶ୍ୱର ସବୁଠାରୁ ଜନବହୁଳ ଦେଶ ପାଲଟିଛି ଭାରତ। ଜାତିସଂଘ ତଥ୍ୟ ଅନୁଯାୟୀ, ଭାରତର ଜନସଂଖ୍ୟା ୧୪୨.୮୬ କୋଟିକୁ ବୃଦ୍ଧି ପାଇଛି। ଅପରପକ୍ଷେ, ଚୀନର ଜନସଂଖ୍ୟା ୧୪୨.୫୭ କୋଟି ରହିଛି।
ବୁଧବାର ସକାଳେ ଜାତିସଂଘ ଏକ ରିପୋର୍ଟ ପ୍ରକାଶ କରିଛି। ଏଥିରେ କୁହାଯାଇଛି ଯେ, ଚଳିତ ବର୍ଷ ମଧ୍ୟଭାଗରେ ଭାରତ ବିଶ୍ୱର ସବୁଠାରୁ ଜନବହୁଳ ଦେଶ ପାଲଟିବ। ଏଥିସହ ମିଳିତ ଜାତିସଂଘ ଦ୍ବାରା ପ୍ରକାଶିତ ତଥ୍ୟରୁ ଜଣାପଡିଛି ଯେ, ଚୀନ୍ଠାରୁ ୩୦ ଲକ୍ଷରୁ ଊର୍ଦ୍ଧ୍ବ ଲୋକଙ୍କ ସହ ଭାରତ ସର୍ବାଧିକ ଜନସଂଖ୍ୟା ବିଶିଷ୍ଟ ଦେଶରେ ପରିଣତ ହେବ।
ୟୁନାଇଟେଡ୍ ନେସନ୍ସ ପପୁଲେସନ୍ ଫଣ୍ଡ୍(ୟୁଏନଏଫପିଏ)ର ଷ୍ଟେଟ୍ ଅଫ୍ ୱାର୍ଲ୍ଡ ପପୁଲେସନ ରିପୋର୍ଟ, ୨୦୨୩ରେ ଉଲ୍ଲେଖ ଅଛି ଯେ, ଚୀନର ଜନସଂଖ୍ୟା ୧୪୨.୫୭ କୋଟି ଥିବା ବେଳେ ଭାରତର ଜନସଂଖ୍ୟା ୧୪୨.୮୬ କୋଟି। ଅପରପକ୍ଷେ, ୩୪ କୋଟି ଜନସଂଖ୍ୟା ସହ ଆମେରିକା ତୃତୀୟ ସ୍ଥାନରେ ଥିବା ଏହି ରିପୋର୍ଟରୁ ଜଣାପଡ଼ିଛି।
ଭାରତ ଜନସଂଖ୍ୟାର ୨୫% ହେଉଛନ୍ତି ୦-୧୪ ବୟସ ବର୍ଗର, ୧୮% ହେଉଛନ୍ତି ୧୦-୧୯ ବୟସ ବର୍ଗର, ୨୬% ହେଉଛନ୍ତି ୧୦-୨୪ ବୟସ ବର୍ଗର, ୬୮% ହେଉଛନ୍ତି ୧୫-୬୪ ବୟସ ବର୍ଗର ଏବଂ ୭% ହେଉଛନ୍ତି ୬୫ ବର୍ଷରୁ ଊର୍ଦ୍ଧ୍ବ ବୟସ ବର୍ଗର। ଏଥି ସହିତ ବିଭିନ୍ନ ଏଜେନ୍ସିଗୁଡିକର ଆକଳନରୁ ଜଣାପଡିଛି ଯେ, ପ୍ରାୟ ତିନି ଦଶନ୍ଧି ପର୍ଯ୍ୟନ୍ତ ଭାରତର ଜନସଂଖ୍ୟା ବୃଦ୍ଧି ପାଇବ ବୋଲି ଆଶା କରାଯାଉଛି। ଏହାଦ୍ବାରା ଜନସଂଖ୍ୟା ୧୬୫ କୋଟି ଛୁଇଁପାରେ।
