ହରଭଙ୍ଗା: ଡହ ଡହ ଖରାରେ ଘରୁ ବାହାରି ହେଉନାହିଁ। ତାତି ସାଙ୍ଗକୁ ଗରମ ଗୁଳୁଗୁଳିରେ ଜନଜୀବନ ଆଉଟୁପାଉଟୁ ହେଉଛି। ପ୍ରଚଣ୍ଡ ଗ୍ରୀଷ୍ମ ତାତିରେ ସାରା ଓଡ଼ିଶା ସିଜୁଛି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ସ୍କୁଲଗୁଡିକ ୪ଦିନ ବନ୍ଦ କରିଥିଲେ। ପୁନର୍ବାର ୧୬ତାରିଖରୁ ସକାଳ ୬.୩୦ରୁ ୧୧ଟା ପର୍ଯ୍ୟନ୍ତ ସ୍କୁଲଗୁଡିକ ଖୋଲିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି। ଆବଶ୍ୟକସ୍ଥଳେ ଜିଲ୍ଲାର ଜିଲ୍ଲାପାଳ ଖରା, ଗରମକୁ ଦୃଷ୍ଟିରେ ରଖି ସ୍କୁଲ ବନ୍ଦ ନିଷ୍ପତ୍ତି ନେବେ ବୋଲି କହିଥିଲେ। ବୌଦ୍ଧ ଭଳି ଉତ୍ତପ୍ତ ଜିଲ୍ଲାରେ ଗ୍ରୀଷ୍ମ ପ୍ରବାହ ବୃଦ୍ଧି ପାଉଛି। ଦିନ ୯ଟାରୁ ୧୦ଟା ବେଳକୁ ଖରାର ପ୍ରକୋପ ଏତେ ବୃଦ୍ଧି ପାଉଛି ତାକୁ ସମ୍ଭାଳିବା ମୁସ୍କିଲ ହୋଇପଡୁଛି। ପୁଣି ଏଭଳି ଟାଣ ଖରାରେ ପ୍ରାଥମିକଠାରୁ ଆରମ୍ଭ କରି ହାଇସ୍କୁଲ ପିଲାମାନଙ୍କ ଦିନ ୧୧ଟା ପର୍ଯ୍ୟନ୍ତ ପାଠପଢ଼ାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଅଭିଭାବକମାନଙ୍କ କହିବା ଅନୁଯାୟୀ, ଅଧିକାଂଶ ପିଲା ୨/୩କିଲୋମିଟର ଦୂରରୁ ମଧ୍ୟ ସ୍କୁଲ ଆସୁଛନ୍ତି। ୧୧ଟାରେ ସ୍କୁଲ ଛୁଟିହେଲେ ପିଲାଙ୍କୁ ଘରେ ପହଞ୍ଚିଲା ବେଳକୁ ୧୨ଟା ବାଜୁଛି। ଏମିତିକି ହରଭଙ୍ଗା ପଂଚାୟତ କୋଡାଶିଙ୍ଗା ଗ୍ରାମର ପିଲାମାନେ କୋଡାଶିଙ୍ଗାରୁ ପାଖାପାଖି ୩ କିଲୋମିଟର ଚାଲି ଚାଲି ହରଭଙ୍ଗା ଉଚ୍ଚ ମାଧ୍ୟମିକ ବିଦ୍ୟାଳୟ ନିକଟସ୍ଥ ଜାମଝୋଲିଠାରେ ଥିବା କୋଡାଶିଙ୍ଗା ପ୍ରାଥମିକ ବିଦ୍ୟାଳୟକୁ ପାଠପଢ଼ିବା ପାଇଁ ଆସୁଛନ୍ତି। ସ୍କୁଲ ଛୁଟି ପରେ ଛୋଟ ଛୋଟ ପିଲାମାନେ ଖରାରେ ୩ କିଲୋମିଟର ଚାଲି ଚାଲି ଘରକୁ ଫେରୁଥିବାବେଳେ ପାଖାପାଖି ୧୨ଟା ବାଜୁଛି। ସେତେବେଳକୁ ଖରାର ପ୍ରକୋପ ୩୭/୩୮ଡିଗ୍ରୀ ପାଖାପାଖି ରହୁଥିବାରୁ ପିଲା ଅଂଶୁଘାତର ଶିକାର ହେବାର ଯଥେଷ୍ଟ ଆଶଙ୍କା ରହିଛି। ତେଣୁ ଖରା/ଗରମକୁ ଦୃଷ୍ଟିରେ ରଖି ସ୍କୁଲ ପାଠପଢ଼ା ସମୟରେ ପରିବର୍ତନ ଦିଗରେ ବୌଦ୍ଧ ଜିଲ୍ଲାପାଳ ସମୀକ୍ଷା କରିବାର ଆବଶ୍ୟକତା ରହିଛି ବୋଲି ବୁଦ୍ଧିଜୀବୀ ମହଲରେ ଦୃଢୋକ୍ତି ପ୍ରକାଶ ପାଇଛି।
Popular Categories
Previous article
Next article