ସମ୍ବଲପୁର: ସମ୍ବଲପୁରର ଦୁର୍ଗାପାଲି ଅଞ୍ଚଳରେ ରହିଥିବା ଏଫସିଆଇ ଗୋଦାମ ପଛରେ ଡକାୟତି ପାଇଁ ଯୋଜନା କରୁଥିବା ବେଳେ ପୁଲିସ ୬ ଜଣଙ୍କୁ ଗିରଫ କରିଛି। ବୁଧବାର ବିଳମ୍ବିତ ରାତିରେ ପୁଲିସ ପାଟ୍ରୋଲିଂ ସମୟରେ ଏଫସିଆଇ ଗୋଦାମ ପଛରେ ନିଛାଟିଆ ସ୍ଥାନରେ କିଛି ବ୍ୟକ୍ତି ଥିବାର ଦେଖି ଚଢ଼ଉ କରିଥିଲା। ପୁଲିସକୁ ଦେଖି ସେମାନେ ଫେରାର ହେବାକୁ ଉଦ୍ୟମ କରିବାରୁ ପୁଲିସ ସେମାନଙ୍କୁ ଗୋଡାଇ ଗୋଡାଇ ଧରିଥିଲା। ଚଢ଼ଉ ସମୟରେ ଷ୍ଟେସନପଡ଼ା ନିବାସୀ କାହ୍ନା ବାଗ, ପଲ୍ଲବ ବାଗ, ଦୁର୍ଗାପାଲି ନିବାସୀ ସରୋଜ ଧରୁଆ, ଉତ୍ତମ ବଗର୍ତ୍ତି, ଦଲଦଲିପଡ଼ା ନିବାସୀ ଶନି ମହାନନ୍ଦ ଓ ପନକାପଡ଼ା ନିବାସୀ ଗଣେଶ ଚୌହାନଙ୍କୁ ପୁଲିସ ଧରିଥିଲା। ସେମାନଙ୍କ ନିକଟରୁ ୩ଟି ଛୁରୀ, ଗୋଟିଏ ଲୁହା ଛଡ, ଗୋଟିଏ ରଶି, ଟର୍ଚ୍ଚ ଓ ଅନ୍ୟାନ୍ୟ ସାମଗ୍ରୀ ଜବତ କରାଯାଇଛି। ପୁଲିସର ପଚରାଉଚରା ସମୟରେ ସେମାନେ ଲକ୍ଷ୍ମୀ ଡୁଙ୍ଗୁରୀ ନିକଟରେ ଥିବା ପେଟ୍ରୋଲ ପମ୍ପରେ ଡକାୟତି କରିବାର ଯୋଜନା କରୁଥିବାର କହିଥିଲେ। କ୍ଷେତରାଜପୁର ପୁଲିସ ଏକ ମାମଲା ରୁଜୁ କରି ଅଭିଯୁକ୍ତମାନଙ୍କୁ ଗିରଫ କରିଛି।
Comments are closed.