ବିଜାପୁର: ଛତିଶଗଡର ବିଜେପୁରରେ ନକ୍ସଲଙ୍କ ଦ୍ବାରା ଲ୍ୟାଣ୍ଡମାଇନ୍ ବିସ୍ଫୋରଣରେ ସିଆରପିଏଫ ର ୪ ଜଣ ଯବାନ ସହିଦ୍ ହୋଇଛନ୍ତି । ଏଥିରେ ଅନ୍ୟ ଦୁଇ ଜଣ ଯବାନ ଆହତ ହୋଇଛନ୍ତି । ବିଜେପୁର ଜିଲାର ପୁଲିସ ଅଧିକାରୀଙ୍କ ସୂଚନା ଅନୁଯାୟୀ ଆବାପଲ୍ଲୀ ଥାନା ଅନ୍ତର୍ଗତ ମୁରଡଣ୍ଡା ଗାଁରେ ଥିବା ସିଆରପିଏଫ ୧୬୮ବି ବଟାଲିୟନ୍ ଶିବିର ନିକଟରେ ନକ୍ସଲମାନେ ଲ୍ୟାଣ୍ଡମାଇନ୍ ଖଞ୍ଜି ଥିଲେ । କୁମ୍ବଂ ଅପରେସନ ପାଇଁ ଯବାନମାନେ ବାହାରି ଥିବା ବେଳେ ଶିବିରର ପ୍ରାୟ ଏକ କିମି ଦୂରରେ ନକ୍ସଲମାନେ ବିସ୍ଫୋରଣ କରିଥିଲେ ।
ଅଧିକାରୀଙ୍କ ସୂଚନା ଅନୁଯାୟୀ, ବିସ୍ଫୋରଣ ବିଷୟରେ ଜଣାପଡିବା ପରେ ଘଟଣାସ୍ଥଳରୁ ଯବାନମାନଙ୍କୁ ଉଦ୍ଧାର କରାଯାଇଥିଲା। ଆହତ ଯବାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା ଆରମ୍ଭ ହୋଇଛି । ଏହା ସହ ସହିଦ୍ ଯବାନଙ୍କ ମୃତଦେହ ଜବତ କରାଯାଇଛି । ଛତିଶଗଡର ବିଧାନସଭା ନିର୍ବାଚନ ପାଇଁ ୧୨ ନଭେମ୍ବରରେ ମତଦାନ ହେବ । ରାଜ୍ୟର ନକ୍ସଲ ପ୍ରଭାବିତ ଅଞ୍ଚଳ ରାଜନନ୍ଦଗାବ ଜିଲାରେ ୧୮ଟି ସିଟ୍ ପାଇଁ ମତଦାନ ହେବ ।