ଗୋପାଳପୁର: ଗୋଳନ୍ଥରା ଥାନା ଅନ୍ତର୍ଗତ କୁସୁମି ଅଞ୍ଚଳରେ କାର୍ଯ୍ୟରତ ବିଦ୍ୟୁତ ବିଭାଗ ସୁପରଭାଇଜରଙ୍କୁ କାତିରେ ଆକ୍ରମଣ ମାମଲାରେ ସଂପୃକ୍ତ ଅଭିଯୁକ୍ତକୁ ପୁଲିସ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଜଣକ ଜଣେ ଅଭ୍ୟାସଗତ ଶିକାରୀ ବୁଡ଼ୁ ଦାସ ଏବଂ ତା’ ଘର ସିଙ୍ଗିବାଡିରେ ବୋଲି ଜଣାପଡ଼ିଛି।
ଅଭିଯୋଗ ଅନୁଯାୟୀ, ଗତ ୧୮ ତାରିଖ ରାତିରେ ମହୁଡା ଫିଡରରେ ବାରମ୍ବାର ଟ୍ରିପ ହେବାରୁ ବିଦ୍ୟୁତ ବିଭାଗ ସୁପରଭାଇଜର ପ୍ରଦ୍ୟୁମ୍ନ କୁମାର ଜେନା ଓ ଅନ୍ୟ ୩ ଜଣ କର୍ମଚାରୀ ପାଟ୍ରୋଲିଂ କରୁଥିଲେ। ଏହି ସମୟରେ ଝାଡବାଙ୍କଠାରେ ବାରହା ଶିକାର ପାଇଁ ୧୧ କେଭି ବିଦ୍ୟୁତ ଲାଇନରୁ ତାର ଟାଣି ବିଛାଇଥିବା ଦେଖିବାକୁ ପାଇଥିଲେ। ଏହି ତାର କିଏ ବିଛାଇଛି ଜାଣିବା ପାଇଁ ଜେନାଙ୍କ ସମେତ ଅନ୍ୟ କର୍ମଚାରୀମାନେ ସେଠାରେ ଛପି ରହିଥିଲେ। ରାତି ପ୍ରାୟ ସାଢେ଼ ୨ ଟା ବେଳ ବୁଡୁ ସେଠାରେ ପହଞ୍ଚିଥିଲା। ଏ ନେଇ ଜେନା ବୁଡ଼ୁକୁ ପଚାରିବା ସମୟରେ ସେ ଉତ୍ତ୍ୟକ୍ତ ହୋଇ ଗାଳିଗୁଲଜ କରିବା ସହ ପାଖରେ ରଖିଥିବା ଏକ ଧାରୁଆ କାତିରେ କର୍ମଚାରୀମାନଙ୍କୁ ଆକ୍ରମଣ କରିଥିଲା। ଏଥିରେ ଜେନା ଆହତ ହୋଇଥିଲେ। ଘଟଣା ପରେ ବୁଡୁ ସେଠାରୁ ଚମ୍ପଟ ମାରିଥିଲା। ଏ ନେଇ ଥାନାରେ ଅଭିଯୋଗ ହେବା ପରେ ପୁଲିସ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରିଛି।
Comments are closed.