କଲମପୁର: ଜଣେ ବୃଦ୍ଧ ନିଜ ଚାଷ ଜମିର ପାକଳ ଧାନ ଖାଉଥିବା ଷଣ୍ଢକୁ ଘଉଡାଇବାକୁ ଯାଇ ଆକ୍ରମଣରେ ଗୁରୁତର ହେବା ଭଳି ଅଭାବନୀୟ ଘଟଣା ଅଂଚଳରେ ଆଲୋଡନ ସୃଷ୍ଟି କରିଛି। ରକ୍ତାକ୍ତ ଅବସ୍ଥାରେ ସମ୍ପର୍କୀୟ ମାନେ ଉଦ୍ଧାର କରି କଲମପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରିଛନ୍ତି।
ସୁଚନା ଅନୁସାରେ ଗୁରୁବାର ସଂଧ୍ୟାରେ ମଣ୍ଡଳ ଗ୍ରାମର ଡେଙ୍ଗା ମାଝୀ ନାମକ ବୃଦ୍ଧ ନିଜ ଚାଷ ଜମି ଠାରେ ପାକଳ ଧାନକୁ ଖାଉଥିବା ଏକ ଷଣ୍ଢକୁ ଘୌଡାଇବାକୁ ଯାଇଥିଲେ। ଯାହା ତାଙ୍କ ପାଇଁ କାଳ ହେଇଛି। ବୃଦ୍ଧ ଜଣକ ଷଣ୍ଢକୁ ଘଉଡାଉଥିବା ବେଳେ ଷଣ୍ଢ ଉତ୍ୟକ୍ତ ହେଇ ବୃଦ୍ଧଙ୍କୁ ଆକ୍ରମଣ କରିଥିଲା। ଷଣ୍ଢର ସିଙ୍ଘ ବୃଦ୍ଧଙ୍କ ଛାତି ଭିତରେ ଭୁଷି ହେଇଯାଇଥିଲା। ଗଭୀର ଆଘାତ ଯୋଗୁଁ ରକ୍ତାକ୍ତ ହେଇ ନିଜ ଜୀବନ ବଂଚାଇବା ପାଇଁ ପ୍ରାଣ ବିକଳରେ ବୃଦ୍ଧ ଡେଙ୍ଗା ମାଝୀ ନିକଟସ୍ଥ ଜଣକ ଘରକୁ ଦୌଡି ଯାଇଥିଲେ ମଧ୍ୟ ଷଣ୍ଢଟି ପୁଣି ଆକ୍ରମଣ କରିବା ପାଇଁ ଜଗି ରହିଥିଲା। ସମ୍ପର୍କୀୟ ମାନେ ବୃଦ୍ଧଙ୍କୁ ଉଦ୍ଧାର କରି କଲମପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରିଛନ୍ତି। ବର୍ତମାନ ବୃଦ୍ଧଙ୍କ ଚିକିତ୍ସା ଜାରି ରହିଛି। ପୂର୍ବରୁ ମଧ୍ୟ ଉକ୍ତ ଷଣ୍ଢଟି ଗ୍ରାମର ଅନ୍ୟ ଦୁଇ ଜଣକୁ ଆକ୍ରମଣ କରି ସାରିଛି। ବର୍ତମାନ ମଣିଷ ମରା ଷଣ୍ଢ ଭୟରେ ଗ୍ରାମବାସୀ ଭୟଭୀତ ହେଉଛନ୍ତି।
