ଚୌଦ୍ୱାରରେ ପୁଣି ପଶିଲା ଛୁଆହାତୀ

ଚୌଦ୍ୱାର : ମଙ୍ଗଳବାର ମଧ୍ୟରାତିରୁ ଜଗତପୁରରେ ଆତଙ୍କ ଖେଳାଇ ୨ଜଣଙ୍କୁ ମାରିବା ସହିତ ୩ଜଣଙ୍କୁ ଆହତ କରିଥିବା ୩ଟି ହାତୀଙ୍କ ମଧ୍ୟରୁ ଗୋଟିଏ ମହାନଦୀରେ ଭାସିଯାଇ ମୃତ୍ୟୁ ବରଣ କରିଥିବାବେଳେ ଆଉ ଗୋଟାକୁ ବନ କର୍ମଚାରୀ ମାନେ ଟ୍ରାଙ୍କୁଲାଇଜର ମାରି କାବୁ କରିଛନ୍ତି ।ଅନ୍ୟ ଗୋଟିଏ ଛୁଆ ଦନ୍ତା ହାତୀ ବନ କର୍ମଚାରୀ ଓ ପୋଲିସକୁ ଚକମା ଦେଖେଇ ସାରାଦିନ ଜଗତପୁର ଅଞ୍ଚଳର ବିଭିନ୍ନ ସ୍ଥାନରେ ଘୁରି ବୁଲିବା ସହିତ ସଂଧ୍ୟାରେ ଫକୀରପୁର ପାଖଦେଇ ଚାଲିଆସି ଚୌଦ୍ୱାର ଅଞ୍ଚଳରେ ପ୍ରବେଶ କରିଛି ।

ଅତିମାତ୍ରାରେ ଭୟଭୀତ ହୋଇ ମାକୁ ହରାଇଥିବା ଛୁଆ ହାତୀଟି ଏଣେତେଣେ ଦୌଡ଼ାଦୌଡ଼ି କରିବା ସହିତ ରାତି ୮ଟାରେ ବନ୍ଦ ପଡ଼ିଥିବା ଓଟିଏମ୍‌ ଭିତରେ ପଶି ଯାଇଛି । ହାତୀକୁ ଦେଖିବାପାଇଁ ଓଟିଏମ୍‌ ଚାରିପଟେ ଭିଡ଼ ଜମିଯିବା ଫଳରେ ହାତୀଟି ମିଲ ପରିସରରେ ଥିବା ବୁଦୁ ବୁଦୁକିଆ ଜଙ୍ଗଲ ଭିତରେ ଲୁଚି ରହିଛି ।ସ୍ଥାନୀୟ ବନ କର୍ମଚାରୀ ଓ ପୁଲିସ ଘଟଣାସ୍ଥଳରେ ଜଗିରହି ହାତୀଟିର ଗତିବିଧି ଉପରେ ନଜର ରଖିଛନ୍ତି ।