ନବରଙ୍ଗପୁର: ନବରଙ୍ଗପୁର ଫାଷ୍ଟ ଟ୍ରାକ ସ୍ବତନ୍ତ୍ର ପୋକ୍ସୋ ଅଦାଲତ ବିଚାରପତି ନିରଞ୍ଜନ ସାହୁ ନାବାଳିକା ଅପହରଣ ଓ ବଳାତ୍କାର ମାମଲାରେ ଅଭିଯୁକ୍ତ ତୁଲାରାମ ହରିଜନଙ୍କୁ ୧୦ ବର୍ଷ ସଶ୍ରମ କାରାଦଣ୍ଡ ସହିତ ୧୦ ହଜାର ଟଙ୍କା ଜରିମାନାରେ ଦଣ୍ଡିତ କରିଛନ୍ତି । ଜରିମାନା ଅନାଦେୟରେ ଅଧିକ ୧ ବର୍ଷ କାରାଦଣ୍ଡ ଭୋଗିବେ ବୋଲି ରାୟ ଶୁଣାଇଛନ୍ତି।
ପାପଡାହାଣ୍ଡି ଥାନା ଅନ୍ତର୍ଗତ ମୈଦଲପୁର ଅଂଚଳର ଜଣେ ୧୫ ବର୍ଷୀୟ ନାବାଳିକାଙ୍କୁ ପାପଡାହାଣ୍ଡିର ତୁଲାରାମ ହରିଜନ(୩୫) ଅପହରଣ କରି ନେଇ ଶାରୀରିକ ସମ୍ପର୍କ ରଖିଥିଲେ। ତୁଳାରାମ ବିବାହିତ ଏବଂ ତାଙ୍କର ଗୋଟିଏ ପୁଅ ଓ ଗୋଟିଏ ଝିଅ ରହିଛନ୍ତି। ଏନେଇ ପୀଡିତା ନାବାଳିକାଙ୍କ ମାଆ ପାପଡାହାଣ୍ଡି ଥାନାରେ ୨୪ ଅକ୍ଟୋବର ୨୦୧୬ରେ ଏତଲା ଦେଇଥିଲେ । ପୁଲିସ କେସ ନମ୍ବର ୧୮୦/୧୬ ରେ ଏକ ମାମଲା ରୁଜୁ କରି ଅଭିଯୁକ୍ତ ତୁଳାରାମକୁ ଗିରଫ କରି କୋର୍ଟ ଚାଲାଣ କରିଥିଲା । କୋର୍ଟ କେସ ନମ୍ବର ସିଟି ୨୩୧/୧୬ ରୁଜୁ ହେବା ପରେ ଟ୍ରାଇଲ ନମ୍ବର ୨୫/୨୦୨୧ ଅନୁଯାୟୀ ମାମଲାଟି ବିଚାରାଧୀନ ଥିଲା। ସମସ୍ତ ୧୭ ଜଣ ସାକ୍ଷୀ ପ୍ରମାଣକୁ ଭିତ୍ତି କରି ଫାଷ୍ଟ ଟ୍ରାକ ସ୍ବତନ୍ତ୍ର ପୋକ୍ସୋ ଅଦାଲତ ବିଚାରପତି ଶ୍ରୀ ସାହୁ ଅଭିଯୁକ୍ତ ତୁଳାରାମଙ୍କୁ ୧୦ ବର୍ଷ କାରାଦଣ୍ଡ ସମେତ ୧୦ ହଜାର ଟଙ୍କା ଜରିମାନା ଓ ଜରିମାନା ଅନାଦେୟ ୧ ବର୍ଷ ଅଧିକ କାରାଦଣ୍ଡାଦେଶ ଦେଇଛନ୍ତି। ଏହାସହ ପୀଡିତାଙ୍କୁ କ୍ଷତିପୂରଣ ବାବଦକୁ ୫ ଲକ୍ଷ ଟଙ୍କା ପ୍ରଦାନ କରାଯିବାକୁ ଜିଲା ଆଇନ ସେବା ପ୍ରାଧିକରଣଙ୍କୁ ନିର୍ଦ୍ଦେଶ ଦେଇଛନ୍ତି। ସରକାରଙ୍କ ପକ୍ଷରୁ ସ୍ୱତନ୍ତ୍ର ପବ୍ଲିକ ପ୍ରସିକ୍ୟୁଟର ସଚି ନନ୍ଦନ ସ୍ୱାଇଁ ଓ ଅତିରିକ୍ତ ପବ୍ଲିକ ପ୍ରସିକ୍ୟୁଟର ସନ୍ତୋଷ ମିଶ୍ର ମାମଲା ପରିଚାଳନା କରିଥିଲେ।
Comments are closed.