ବେଙ୍ଗାଲୁରୁ : ଲଗାଣ ବର୍ଷା ଯୋଗୁଁ କର୍ଣ୍ଣାଟକର ରାଜଧାନୀ ବେଙ୍ଗାଲୁରୁ ଉବୁଟୁବୁ ହୋଇଛି। ସହରର ବିଭିନ୍ନ ସ୍ଥାନରେ ଜଳବନ୍ଦୀ ସମସ୍ୟା ଦେଖାଯିବା ସହିତ ଜୀବନଯାତ୍ରା ପ୍ରଭାବିତ ହୋଇଛି। ରବିବାର ସାରା ରାତି ସହରରେ ବର୍ଷା ଲାଗି ରହିଥିଲା। ଫଳରେ ସକାଳୁ ସହର ଜଳାର୍ଣ୍ଣବ ହୋଇଯାଇଥିଲା। ରାସ୍ତାଘାଟରେ ପାଣି ଜମି ରହିବାରୁ ଯାନବାହନ ଚଳାଚଳ ଅସମ୍ଭବ ହୋଇପଡିଥିଲା। ମୁନ୍ନେକୋଲାଲୁର ବେଲ୍ଲାନ୍ଦୁର ବସ୍ତିର ୧୫୭୦ଟି ଘର ପାଣିରେ ବୁଡି ଯାଇଥିବାବେଳେ ୩୦୦୦ ଲୋକ ପ୍ରଭାବିତ ହୋଇଛନ୍ତି। ଜଳ ନିଷ୍କାସନ ନିମନ୍ତେ ବୃହତ୍ ବେଙ୍ଗାଲୁରୁ ମହାନଗର ପାଳିକା (ବିବିଏମପି) ପକ୍ଷରୁ ମୋଟର ଲଗାଯାଇଥିଲା। ବିଭିନ୍ନ ସ୍ଥାନରେ ଉଦ୍ଧାର କାର୍ଯ୍ୟ ନିମନ୍ତେ ଏସଡିଆରଏଫ୍ର ୨ଟି ବାହିନୀକୁ ନିୟୋଜିତ କରାଯାଇଥିଲା। ବର୍ଷାଯୋଗୁଁ ସହରରେ କାର୍ଯ୍ୟ କରୁଥିବା ଆଇଟି କମ୍ପାନୀଗୁଡ଼ିକର ୨୨୫ କୋଟି ଟଙ୍କା କ୍ଷତି ହୋଇଥିବା ଆକଳନ କରାଯାଇଛି। ଏ ସମ୍ପର୍କରେ କମ୍ପାନୀଗୁଡିକ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ବର୍ଷା ପରିସ୍ଥିତି ଉପରେ ମୁଖ୍ୟମନ୍ତ୍ରୀ ସମୀକ୍ଷା କରିଛନ୍ତି ା ପାଣିପାଗ ବିଭାଗର ଆକଳନ ଅନୁଯାୟୀ ଆଗାମୀ ଦିନରେ ମଧ୍ୟ ପ୍ରବଳ ବର୍ଷା ହେବ ା
Comments are closed.