ଭୁବନେଶ୍ବର: ସବୁଆଡ଼େ ଉତ୍ସବର ମାହୋଲ ଚାଲିଥିବା ବେଳେ ସ୍ଥାନୀୟ ଭିଏସଏସ ନଗର ୱାର୍ଡ଼ ନଂ-୧୧ ଆସିଛି ଏକ ଦୁଃଖ ଦାୟକ ଖବର। ସୂଚନା ଅନୁସାରେ ଭି.ଏସ୍.ଏସ୍ ନଗର ପାଣିଟାଙ୍କି ସମ୍ମୁଖରେ ଥିବା ଏକ ଫଳ ଦୋକାନରେ ଦୋକାନୀ ରୋଷେଇ କରୁଥିବା ସମୟରେ ଗ୍ୟାସ୍ ଫାଟି ଅଗ୍ନିକାଣ୍ଡ ହୋଇଥିଲା। ଅଗ୍ନିକାଣ୍ଡର ଭୟାବହତା ଏତେ ଅଧିକ ଥିଲା ଯେ ଆଖି ପିଛୁଳାକେ ତାହା ତତ୍ସଂଲଗ୍ନ ଏକ ପାନ ଦୋକାନ ଓ ଅନ୍ୟ ଏକ ଦୋକାନକୁ ମାଡ଼ି ଯାଇଥିଲା। ଅଗ୍ନିକାଣ୍ଡ ଯୋଗୁ ପ୍ରାୟ ୧ଲକ୍ଷରୁ ଅଧିକ ଟଙ୍କାର କ୍ଷୟକ୍ଷତି ହୋଇଥିବା ନେଇ ଅନୁମାନ କରାଯାଉଛି। ଅଗ୍ନିକାଣ୍ଡର ଖବର ପାଇ ତୁରନ୍ତ ୱାର୍ଡ଼ ନଂ-୧୧ର ସ୍ଥାନୀୟ କର୍ପୋରେଟର୍ ପ୍ରଭାସିନୀ ମହାନ୍ତି ଘଟଣା ସ୍ଥଳରେ ପହଞ୍ଚି ଅଗ୍ନିଶମ ବାହିନୀଙ୍କୁ ଯୋଗାଯୋଗ କରିଥିଲେ। କିଛି ସମୟ ମଧ୍ୟରେ ଚନ୍ଦ୍ରଶେଖରପୁର ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ଜଳୁଥିବା ନିଆଁକୁ ଆୟତ୍ତ କରିଥିଲେ। ଏହି ଘଟଣା ନେଇ ସ୍ଥାନୀୟ କର୍ପୋରେଟର ଦୁଃଖ ପ୍ରକାଶ କରିବା ସହ ଦୋକାନୀମାନଙ୍କୁ ଆଶ୍ୱସନା ଦେଇଥିଲେ।
Comments are closed.