ଆଠଗଡ : ଆଠଗଡ ସହରର ୫ନଂ ୱାର୍ଡ ଅନ୍ତର୍ଗତ ରାସରସିକପୁରଠାରେ ଗୃହନିର୍ମାଣ ପାଇଁ ନିର୍ମାଣ ସାମଗ୍ରୀ ଗଦାକରି ରାସ୍ତା ଅବରୋଧ କରାଯାଇଥିବାରୁ ଯାତାୟତରେ ବହୁ ସମସ୍ୟା ସୃଷ୍ଟି ହେବା ସହ ପ୍ରତିଦିନ ଛୋଟବଡ ଦୁର୍ଘଟଣା ଘଟୁଥିବା ଦେଖାଯାଉଥିବାବେଳେ ଆଠଗଡ ଏନଏସି ପ୍ରଶାସନ ନୀରବଦ୍ରଷ୍ଟା ସାଜିଛି। ରାସରସିକପୁରର ଷ୍ଟାଡିୟମ ଛକ ନିକଟରେ ଗୋଟିଏ ପରିବାରର ୩ଜଣଙ୍କର ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହନିର୍ମାଣ ପାଇଁ ଖୋଳାଖୋଳି କରି ରାସ୍ତା ଉପରେ ମାଟି ଗଦା କରିବା, ଭଙ୍ଗାଘରର ପଥର, ଗୋଡି ଓ ବାଲି ଦୀର୍ଘ ପ୍ରାୟ ୨୫ଦିନ ହେବ ଗଦାହୋଇ ରହିଥିବାରୁ ଅଧାରୁ ଅଧିକ ରାସ୍ତା ଅବରୋଧ ହୋଇ ରହିଛି । ଲଗାଣ ବର୍ଷା ସମୟରେ ମାଟି ଗଦାରୁ ମାଟି ଧସି ରାସ୍ତା ଉପରେ ବିଛାଡି ହୋଇ ପଡିଥିବାରୁ ସେହି ରାସ୍ତା ଦେଇ ଯାଉଥିବା ବାଇକ ଆରୋହୀ ଏବଂ ସାଇକେଲରେ ସ୍କୁଲ ଓ କଲେଜକୁ ଯାଉଥିବା ବିଦ୍ୟାର୍ଥୀ ଦୁର୍ଘଟଣାର ସମ୍ମୁଖୀନ ହେଉଛନ୍ତି । ଏ ସଂପର୍କରେ ଏନଏସିର କନିଷ୍ଠ ଯନ୍ତ୍ରୀ ଓ ଅନ୍ୟ ଅଧିକାରୀଙ୍କୁ ବାରମ୍ବାର ଜଣାଇବା ପରେ ମଧ୍ୟ କୌଣସି ପ୍ରତିକାର ହେଉନାହିଁ । ଉକ୍ତ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ନିର୍ମାଣ କାର୍ଯ୍ୟ ଜଣେ ଶାସକ ଦଳୀୟ ସମର୍ଥିତ ଠିକାଦାର କରୁଥିବାରୁ ସେ କାହାରିକୁ ଖାତିର କରୁନାହାଁନ୍ତି । ୧୮ଫୁଟ ଚଉଡା ବିଶିଷ୍ଟ ଉକ୍ତ କଂକ୍ରିଟ ରାସ୍ତା ଉପରେ ଏତେ ମାତ୍ରାରେ ମାଟି, ପଥର, ମେଟାଲ ଓ ବାଲି ଗଦା ହୋଇଛି ଯେ ଯିବାଆସିବା କରିବା ପାଇଁ ମାତ୍ର ୭-୮ଫୁଟ ସ୍ଥାନ ଉପଲବ୍ଧ ରହିଛି । ଫଳରେ ବଡଗାଡି ବା କାର ଯିବାଆସିବା ମଧ୍ୟ କଷ୍ଟକର ହୋଇପଡୁଛି । ଏନଏସି କର୍ତ୍ତୃପକ୍ଷ ଏହା ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ରାସରସିକପୁର ସାହିବାସୀ ଦାବି କରିଛନ୍ତି।
Popular Categories
Previous article
Next article