କଲମପୁର: ଇନ୍ଦ୍ରାବତୀ ଜଳ ବିଦ୍ୟୁତ୍ ପ୍ରକଳ୍ପ ପାଇଁ ହାତୀ ନଦୀ ଚୀର ସ୍ରୋତା । ଏହି ହାତୀ ନଦୀ ଦ୍ୱାରା କଲମପୁର ବ୍ଲକ ଦୁଇ ଭାଗରେ ବିଭକ୍ତ ହେଇଥିଲା । ବର୍ଷକ ୪ ମାସ ପରିବର୍ତ୍ତେ ୧୨ ମାସ ହାତୀ ନଦୀରେ ଇନ୍ଦ୍ରାବତୀ ଜଳ ବିଦ୍ୟୁତ୍ ପ୍ରକଳ୍ପର ବଳକା ପାଣି ପ୍ରବାହିତ ହେବାରୁ ଲୋକେ ଯାତାୟାତ ପାଇଁ ଦେଶୀ ଡଙ୍ଗା ଉପରେ ଭରସା କରୁଥିଲେ । ଅନେକ ସମୟରେ ଡଙ୍ଗାବୁଡି ଭଳି ଘଟଣା ଯୋଗୁଁ ଜନ ଜୀବନ ପ୍ରତି ବିପଦ ରହୁଥିଲା । ତେଣୁ ହାତୀ ନଦୀରେ ପୋଲ ନିର୍ମାଣ ପାଇଁ ଅଞ୍ଚଳବାସୀ ଦୀର୍ଘ ଦିନ ଧରି ଆନ୍ଦୋଳନ କରିବା ପରେ ପ୍ରଥମେ ହାତୀ ନଦୀର କର୍ମେଲ ଡଙ୍ଗରୀଗୁଡା ଘାଟ ଠାରେ ଏକ ପୋଲ ନିର୍ମାଣ କରାଯାଇଥିଲା ।
ଏହାର ପରବର୍ତ୍ତୀ ସମୟରେ ୨୦୧୪/୧୫ ଆର୍ଥିକ ବର୍ଷରେ ବିଜୁ ସେତୁ ଯୋଜନାରୁ ପ୍ରାୟ ୭ କୋଟି ଟଙ୍କା ବ୍ୟୟ ଅଟକଳରେ ହାତୀ ନଦୀର ପାତ୍ରବସା ଘାଟ ଠାରେ ଅନ୍ୟ ଏକ ପୋଲ ନିର୍ମାଣ କାର୍ଯ୍ୟ ଧର୍ମଗଡ ଗ୍ରାମ ଉନ୍ନୟନ ବିଭାଜନ ତରଫରୁ ଆରମ୍ଭ ହେଇଥିଲା । କିନ୍ତୁ ପରିତାପର ବିଷୟ ଏହି ପୋଲ ନିର୍ମାଣ କାର୍ଯ୍ୟ ଆରମ୍ଭ ହେବାର ଦୀର୍ଘ ୭ ବର୍ଷ ବିତି ସାରିଥିଲେ ମଧ୍ୟ ଲୋକାର୍ପଣ ହେଇ ପାରିନାହିଁ । ପୋଲ ନିର୍ମାଣ କାର୍ଯ୍ୟ ଶେଷ ହେଇ ସାରିଛି କିନ୍ତୁ ନିମ୍ନମାନର କାର୍ଯ୍ୟ ଯୋଗୁଁ ପୋଲ ସହିତ ସଂଯୋଗ ହେଉଥିବା ରାସ୍ତା ଦବିଯାଇ ପଥଚାରୀଙ୍କ ପାଇଁ ମରଣଯନ୍ତା ପାଲଟିଛି ।
ଏହି ଘାଟରେ ପୋଲ ନିର୍ମାଣ ହେବା ଦ୍ୱାରା ପଡୋଶୀ ଆନ୍ଧ୍ର ପ୍ରଦେଶ, ରାୟଗଡା ଜିଲ୍ଲା, ଥୁଆମୂଳ ରାମପୁର ଅଞ୍ଚଳର ଲୋକ ଜୟପାଟଣା, କୋକସରା ନବରଙ୍ଗପୁର ଓ ଛତିଶଗଡ ରାଜ୍ୟର ରାୟପୁର ଓ ଜଗଦଲପୁର ସହ ଯାତାୟାତର ସୁବିଧା ପାଇ ପାରିବେ । କିନ୍ତୁ ଲୋକାର୍ପଣ ହେବା ପୂର୍ବରୁ ଏଭଳି ରାସ୍ତା ଦବିଯିବା ପୋଲର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି କରିଛି ।
