ମହାରାଷ୍ଟ୍ର: ସରଗରମ ରହିଛି ମହାରାଷ୍ଟ୍ର ରାଜନୀତି । ଆଜି ମହାରାଷ୍ଟ୍ରରେ କ୍ୟାବିନେଟର ସଂମ୍ପ୍ରସାରଣ ହୋଇପାରେ । ବିଜେପି ଓ ଏକନାଥ ସିନ୍ଦେଙ୍କ ଗୋଷ୍ଠୀରୁ ୧୪ ମନ୍ତ୍ରୀ ଭାବେ ଶପଥ ନେଇପାରନ୍ତି । ସକାଳ ୧୧ଟା ସମୟରେ ରାଜ ଭବନରେ ଶପଥ ଗ୍ରହଣ ଉତ୍ସବ ହେବା ନେଇ ଜଣାପଡ଼ିଛି । ସବୁଠାରୁ ବଡ଼ କଥା ହେଉଛି କି, ଏହି କ୍ୟାବିନେଟ୍ ସମ୍ପ୍ରସାରଣରେ ଦେବେନ୍ଦ୍ର ଫଡନାଭିସଙ୍କୁ ଗୃହ ମନ୍ତ୍ରଣାଳୟ ଭଳି ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିପାରେ ବୋଲି ଚର୍ଚ୍ଚା ହେଉଛି ।
ଗତକାଲି (ସୋମବାର) ଏନେଇ ସିନ୍ଦେ ଗଣମାଧ୍ୟମକୁ ସୂଚନା ଦେଇଥିଲେ । ମୁଖ୍ୟମନ୍ତ୍ରୀଙ୍କ ପକ୍ଷରୁ ଆହୁରି କୁହାଯାଇଥିଲା କି, ରାଜ୍ୟ ବିଧାନସଭାର ମୌସୁମୀ ଅଧିବେଶନ ଖୁବଶୀଘ୍ର ଶେଷ ହେବ । ତେଣୁ ଆମେ କ୍ୟାବିନେଟ୍ ବିସ୍ତାର କରିବାକୁ ଯାଉଛୁ । ଏହି କ୍ୟାବିନେଟ୍ ସମ୍ପ୍ରସାରଣର ଶପଥ ଗ୍ରହଣ ଉତ୍ସବରେ କିଛି ବିଧାନ ପରିଷଦ ସଦସ୍ୟ ରହିବେ ବୋଲି ସୂଚନା ଦିଆଯାଇଥିଲା । କୁହାଯାଉଛି କି ଶିବସେନାରେ ବିଦ୍ରୋହୀ ଆଭିମୁଖ୍ୟ ଗ୍ରହଣ କରି ସିନ୍ଦେ ତାଙ୍କ ଆଡ଼କୁ ବହୁ ବିଧାୟକଙ୍କ ସମର୍ଥନ ଆଣିଥିଲେ ।
ତେଣୁ ଗତ ଗୋଟିଏ ମାସ ମଧ୍ୟରେ ସିନ୍ଦେ ୭ଥର ଦିଲ୍ଲୀ ଗସ୍ତ କରିଛନ୍ତି । ପ୍ରତ୍ୟେକ ଗସ୍ତ ପରେ କ୍ୟାବିନେଟ ବିସ୍ତାରକୁ ନେଇ କଳ୍ପନାଜଳ୍ପନା ଚାଲିଛି । ହେଲେ କ୍ୟାବିନେଟର ସଂମ୍ପ୍ରସାରଣ ହୋଇପାରିନାହିଁ । ଯାହାକି ତାଙ୍କ ପାଇଁ ଏକ କଷ୍ଟସାଧ୍ୟ କାର୍ଯ୍ୟ ପାଲଟିଛି ।
ଏହି ରାଜନୈତିକ ଘଟଣାକୁ ନେଇ କିଛି ରାଜନୈତିକ ପର୍ଯ୍ୟବେକ୍ଷକ ତାଙ୍କର ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି କି ତେଲେଙ୍ଗା ଅପେକ୍ଷା ମହାରାଷ୍ଟ୍ରରେ ମନ୍ତ୍ରୀ ପରିଷଦ ଗଠନ କରିବାରେ କମ୍ ବିଳମ୍ବ ହୋଇଛି । କାରଣ ୨୦୧୯ରେ ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ ଦୁଇ ମାସରୁ ଅଧିକ ସମୟ ଧରି ମନ୍ତ୍ରୀ ମଣ୍ଡଳ ଗଠନ କରିବାକୁ ଅପେକ୍ଷା କରିଥିଲେ ।
