ନରସିଂହପୁର : ନରସିଂହପୁର ଥାନା ଅର୍ନ୍ତଗତ ଗୁହାଳସାହି ଗ୍ରାମର କିଛି ଦୂରରେ ସ୍କୁଟିରେ ଯାଉଥିବା ଦୁଇଜଣ ବ୍ୟକ୍ତି ଏକ ହାଇୱା ସହ ଧକ୍କା ହୋଇ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଜଣଙ୍କୁ ଗୁରୁତର ଅବସ୍ଥାରେ କଟକ ବଡ଼ ଡାକ୍ତରଖାନାକୁ ପଠାଯାଇଛି । ମିଳିଥିବା ସୂଚନା ଅନୁଯାୟୀ ଶୁକ୍ରବାର ରାତିରେ ଗୁହାଳସାହି ଗ୍ରାମର ପ୍ରଫୁଲ ବେହେରା (୬୦) ଓ ଏହି ଥାନାର ଅରଖବାଡି ଗ୍ରାମର ତାଙ୍କ ପୁତୁରା ଅଜିତ କୁମାର ବେହେରା(୨୬)ମିଶି ଏକ ସ୍କୁଟିରେ ଏକ ଚାଉଳବସ୍ତା ନେଇ ଗୁହାଳ ସାହିରୁ ଅରଖବାଡିକୁ ଯାଉଥିଲେ। ଗୁହାଳସାହିଠାରୁ କିଛି ଦୂର ଯିବାପରେ ବିପରୀତ ଦିଗରୁ ଆସୁଥିବା ଏକ ହାଇୱା ଗାଡି ସହିତ ସ୍କୁଟିଟି ଧକ୍କା ହୋଇଥିଲା। ଯେଉଁଠାରେ ଦୁର୍ଘଟଣା ଘଟିଥିଲା ସେହି ସ୍ଥାନଟି ନିର୍ଜନ ଓ ଅନ୍ଧାରୁଆ ରହିଥିଲା। ହାଇୱାଟି ପଳାଇଯାଉ ଥିବାବେଳେ ଜୈନେକ ବ୍ୟକ୍ତି ଦେଖି ନରସିଂହପୁର ପୁଲିସକୁ ଖବର ଦେଇଥିଲେ। ଏହାପରେ ଗୁହାଳସାହି ଗ୍ରାମବାସୀ ଜାଣିବାପରେ ଘଟଣା ସ୍ଥଳରେ ପହଞ୍ଚି ଦେଖିଲା ବେଳକୁ ପ୍ରଫୁଲର ଘଟଣାସ୍ଥଳରେ ମୃତ୍ୟୁ ହୋଇ ଯାଇଥିବା ବେଳେ ପୁତୁରା ଅଜିତ୍ ଗୁରୁତର ଅବସ୍ଥାରେ ଛଟପଟ ହେଉଥିଲା । ତୁରନ୍ତ ଅଜିତ୍କୁ ନରସିଂହପୁର ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ ଓ ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ବଡଡାକ୍ତରଖାନାକୁ ପଠାଇ ଦେଇଛନ୍ତି । ଅପରପକ୍ଷରେ ଗ୍ରାମବାସୀ ଘଟଣାସ୍ଥଳରେ ଟାୟାର ନିଆଁ ଜାଳି ନରସିଂହପୁର-ଅନୁଗୁଳ ମୂଖ୍ୟରାସ୍ତାରେ ଶବରଖି କ୍ଷତି ପୂରଣ ଦାବିରେ ରାସ୍ତା ଅବରୋଧ କରିଛନ୍ତି। ଘଟଣା ସ୍ଥଳରେ ନରସିଂହପୁର ପୁଲିସ ପହଞ୍ଚି ଉତ୍ତେଜିତ ଗ୍ରାମବାସୀଙ୍କୁ ବୁଝାସୁଝା କରୁଛନ୍ତି ପୁଲିସ ହାଇୱାଟିକୁ ଜବତ କରିବା ସହିତ ଚାଳକକୁ ଥାନାରେ ଅଟକ ରଖିଛନ୍ତି। ବର୍ତ୍ତମାନ ଘଟଣା ସ୍ଥଳରେ ତହସିଲଦାର ଆଲୋକ କୁମାର ଦେହୁରୀ, ଥାନା ଅଧିକାରୀ ଅଭୟ ବେହେରା,ଏଏସଆଇ ଏନ. ପଣ୍ଡା ଓ କିଛି ଭଦ୍ରବ୍ୟକ୍ତିଙ୍କ ଉପସ୍ଥିତିରେ ଆଲୋଚନା ଜାରି ରହିଛି ।
Comments are closed.