ମୁମ୍ବଇ: ବଲିଉଡ଼ ଅଭିନେତ୍ରୀ ଆଲିଆ ଭଟ୍ଟ ଓ ଅଭିନେତା ରଣବୀର କପୁରଙ୍କ ପାଇଁ ଶୁଭେଚ୍ଛା ସୁଅ ଛୁଟୁଛି। ଏହା ସ୍ବାଭାବିକ ମଧ୍ୟ। କାରଣ ଆଲିଆ ମାଆ ହେବାକୁ ଯାଉଥିବା ନେଇ ସୋମବାର ସାମାଜିକ ଗଣମାଧ୍ୟମ ଜରିଆରେ ସୂଚନା ଦେଇଛନ୍ତି। ଏକ ଫଟୋ ଶେୟାର କରି ସେ ଏହି ଖୁସିଖବର ଦେଇଛନ୍ତି। ଫଟୋରେ ଆଲିଆ ଡାକ୍ତରଖାନାରେ ସୋନୋଗ୍ରାଫି କରାଉଥିବା ବେଳର ଦୃଶ୍ୟ ଦେଖିବାକୁ ମିଳିଛି। ଫଟୋରେ ଆଲିଆଙ୍କର ସୋନୋଗ୍ରାଫି ଚାଲିଥିବା ସମୟରେ ସ୍ବାମୀ ରଣବୀର କପୁର ତାଙ୍କ ପାଖରେ ବସିଥିବା ଦେଖିବାକୁ ମିଳୁଛି । କ୍ୟାପ୍ସନରେ ଆଲିଆ ଲେଖିଛନ୍ତି- ‘‘ଆମ ସନ୍ତାନ… ଖୁବ୍ ଶୀଘ୍ର ଆସୁଛି।’’ ଏହି ପୋଷ୍ଟ ଦେଖିବା ପରେ ତାଙ୍କ ପ୍ରଶଂସକଙ୍କ ସମେତ ଅନେକ ସେଲିବ୍ରିଟି ଉଭୟ ରଣବୀର ଓ ଆଲିଆଙ୍କୁ ଅଜସ୍ର ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି।
ସୂଚନାଯୋଗ୍ୟ, ଦୀର୍ଘ ଦିନର ପ୍ରେମ ସମ୍ପର୍କ ପରେ ଚଳିତ ବର୍ଷ ଏପ୍ରିଲ୍ ୧୪ ତାରିଖରେ ଆଲିଆ ଓ ରଣବୀର ବିବାହ ବନ୍ଧନରେ ଆବଦ୍ଧ ହୋଇଥିଲେ। ଏହି ବିବାହ ସମାରୋହରେ କେବଳ ଦୁହିଁଙ୍କ ପରିବାର ସଦସ୍ୟ ଓ କିଛି ଘନିଷ୍ଠ ବନ୍ଧୁବାନ୍ଧବ ଯୋଗ ଦେଇଥିଲେ।
Comments are closed.