ଚୌଦ୍ୱାର: ଓଡ଼ିଆ ଭାଷାର ସୁରକ୍ଷା ତଥା ଶିଶୁ ମାନଙ୍କ ମଧ୍ୟରେ ଓଡ଼ିଆ ଭାଷା ପ୍ରତି ଆଗ୍ରହ ସୃଷ୍ଟି କରିବା ଲକ୍ଷ୍ୟରେ ପ୍ରାଥମିକ ଶ୍ରେଣୀ ଛାତ୍ରଛାତ୍ରୀଙ୍କୁ ଛବିଳ ମଧୁ ବର୍ଣ୍ଣବୋଧ ପୁସ୍ତକ ବିତରଣ କାର୍ଯ୍ୟକ୍ରମ ଅନୁଷ୍ଠିତ ହୋଇ ଯାଇଛି। ଟାଙ୍ଗୀ- ଚୌଦ୍ୱାର ବ୍ଲକ୍ ହଳଦୀ ବସନ୍ତ ଉଚ୍ଚ ପ୍ରାଥମିକ ବିଦ୍ୟାଳୟର ଯୁବ ଶିକ୍ଷକ ପ୍ରମୋଦ କୁମାର ବେହେରା ଗତ ୨୦୦୬ ମସିହାରୁ ଛବିଳ ମଧୁ ବର୍ଣ୍ଣବୋଧ ପୁସ୍ତକ ବିତରଣ ଅଭିଯାନ ଚାଲୁ ରଖିଛନ୍ତି। ଏହି ଅଭିଯାନ ମାଧ୍ୟମରେ ଶ୍ରୀ ବେହେରା ଶୁକ୍ରବାରଦିନ ଚୌଦ୍ୱାରର କଳିଙ୍ଗ ନୋଡ଼ାଲ ଆଞ୍ଚଳିକ ସାଧନ କେନ୍ଦ୍ର ଅଧିନ ଗୋବିନ୍ଦଜୀଉପାଟଣା, ସୁଇପର କଲୋନୀ, ନୂଆସାହି, କପାଳେଶ୍ୱର, ଗଉଡ଼ସାହି ଉଚ୍ଚ ପ୍ରାଥମିକ ବିଦ୍ୟାଳୟକୁ ଯାଇ ସେଠାରେ ପ୍ରଥମ ଓ ଦ୍ୱିତୀୟ ଶ୍ରେଣୀ ପଠୁଥିବା ଛାତ୍ରଛାତ୍ରୀ ମାନଙ୍କୁ ମଧୁ ବର୍ଣ୍ଣବୋଧ ପୁସ୍ତକ ବିତରଣ କରିଥିଲେ। ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ରାଜେଶ କୁମାର ନାୟକ ଏହିକାର୍ଯ୍ୟକ୍ରମରେ ସହଯୋଗ କରିଥିଲେ।
ଶିକ୍ଷକ ପ୍ରମୋଦ କୁମାର ବେହେରାଙ୍କ ଏତାଦୃଶ ମହତ୍ ଅଭିଯାନକୁ ବିଦ୍ୟାଳୟ ଗୁଡ଼ିକର ପ୍ରଧାନ ଶିକ୍ଷକ ମାନଙ୍କ ସମେତ ସହକାରୀ ଶିକ୍ଷକ ଶିକ୍ଷୟତ୍ରୀ ଓ ଅଭିଭାବକ ମାନେ ଭୁୟସୀ ପ୍ରଶଂସା କରିଛନ୍ତି।
ସୂଚନାଯୋଗ୍ୟଯେ ଶ୍ରୀ ବେହେରା ନିଜ ସ୍ୱଳ୍ପ ବେତନରୁ କିଛି କିଛି ଅର୍ଥ ସଂଚୟ କରି ସେହି ଅର୍ଥରେ ବର୍ଣ୍ଣବୋଧ ବହି କିଣି ଛାତ୍ର ଛାତ୍ରଛାତ୍ରୀମାନଙ୍କୁ ବିତରଣ ଜାରୀ ରଖିଛନ୍ତି । ଏଯାବତ୍ ସେ ୮ହଜାରରୁ ଉର୍ଦ୍ଧ ବର୍ଣ୍ଣବୋଧ ପୁସ୍ତକ ବିତରଣ କରିଥିବାବେଳେ ବରିଷ୍ଠ ନାଗରିକ ମାନଙ୍କୁ ୩ହଜାରରୁ ଉର୍ଦ୍ଧ ଗାମୁଛା ବଣ୍ଟନ କରିଛନ୍ତି। ଏଥିସହିତ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ପରୀକ୍ଷା ଉପଯୋଗୀ ୩ ହଜାରରୁ ଅଧିକ ଇତିହାସ ଓ ନଗର ବିଜ୍ଞାନ ପୁସ୍ତକ ବଣ୍ଟନ କରିଥିବା ଜଣା ପଡ଼ିଛି। ଏଭଳି ସେବା କାର୍ଯ୍ୟପାଇଁ ତାଙ୍କୁ ବହୁ ସାମାଜିକ, ସାଂସ୍କୃତିକ ତଥା ଶିକ୍ଷାନୁଷ୍ଠାନ ସମ୍ବର୍ଦ୍ଧିତ ଏବଂ ସମ୍ମାନିତ କରିଛନ୍ତି।
