ସମ୍ବଲପୁର – ସମ୍ବଲପୁରର ଉପକଣ୍ଠସ୍ଥ ଶ୍ରୀ ଶ୍ରୀ ତାରକେଶ୍ୱର ବାବା ଙ୍କ ଶୀତଳ ଷଷ୍ଠୀ ଅବସରରେ ଦେବ ବିବାହ ଉତ୍ସବ ପାଇଁ ଥାଳ ଉଠା ନୀତି ସମ୍ପନ୍ନ ହୋଇଯାଇଛି । ମଙ୍ଗଳବାର ପବିତ୍ର ଅକ୍ଷୟ ତୃତୀୟା ତିଥିରେ ପରମ୍ପରା ଅନୁଯାୟୀ ମନ୍ଦିର ଠାରେ ଥାଳ ଉଠା ପର୍ବ ଓ ଚଳିତ ବର୍ଷ ପାଇଁ କନ୍ୟ ପିତାମାତା ଙ୍କ ଚୟନ ମଧ୍ୟ କରାଯାଇଛି ।
ଚଳିତ ବର୍ଷ କନ୍ୟା ପିତାମାତାର ଦାୟିତ୍ୱ ସୁବାଷ ପ୍ରଧାନ ଓ ତାଙ୍କର ଧର୍ମପତ୍ନୀ ମାମି ପ୍ରଧାନ ଏବଂ ଶ୍ରୀ ତାରକେଶ୍ୱର ବାବା ଙ୍କ ପିତାମାତାର ଦାୟିତ୍ୱ ବ୍ରଜମୋହନ ବଢ଼େଇ ଓ ଧର୍ମପତ୍ନୀ ପଦ୍ମିନୀ ବଢ଼େଇ ଙ୍କୁ ପ୍ରଦାନ କରାଯାଇଛି । ପଣ୍ଡିତ ସୁଶାନ୍ତ ସାହୁ ଙ୍କ ଦ୍ୱାରା ପାରମ୍ପରିକ ରିତିନୀତି ଅନୁଯାୟୀ ପୂଜାର୍ଚ୍ଚନା କରାଯିବା ପରେ ଥାଳ ଉଠା ନୀତି ସମ୍ପନ୍ନ କରାଯାଇ ଚଳିତ ବର୍ଷର ଦେବ ବିବାହ ମହୋତ୍ସବ ପାଇଁ ଦାୟିତ୍ୱ ପ୍ରଦାନ କରାଯାଇଥିଲା । ସଭାପତି ତନ୍ମୟ ଧର, ପଦ୍ମନ ସେଠ, ପ୍ରଶାନ୍ତ କର, ପ୍ୟାରେଲାଲ ପଣ୍ଡା, ବିନୟ କର, ସନ୍ତୋଷ କେଡିଆ, ତରଣି ସେଠ, ବିଦ୍ୟାଧର ପଣ୍ଡା, ସୁଧିର ନାଥ ଙ୍କ ସମେତ ମନ୍ଦିର କମିଟିର ସଦସ୍ୟ ଓ ଅଞ୍ଚଳବାସୀ ଏହି ଧାର୍ମିକ କାର୍ଯ୍ୟକ୍ରମ ସମୟରେ ଉପସ୍ଥିତ ରହିଥିଲେ । କରୋନା ସଙ୍କଟ ପାଇଁ ବିଗତ ୨ ବର୍ଷ ହେବ ଏହି ଧାର୍ମିକ ଉତ୍ସବକୁ କେବଳ ବିଧି ରକ୍ଷାରେ ସୀମିତ ରଖାଯାଇଥିବା ବେଳେ ଚଳିତ ବର୍ଷ ଏହା ଧୁମଧାମରେ କରାଯିବ ବୋଲି ଆୟୋଜକ କମିଟି ପକ୍ଷରୁ ସୂଚନା ଦିଆଯାଇଛି ।
