ଗଞ୍ଜାମ: ଟ୍ରାନ୍ସଫରମର ସଂସ୍ପର୍ଶରେ ଆସି ବିଦ୍ୟୁତ ଆଘାତରେ ଜଣେ ଯୁବକଙ୍କ ମୃତ୍ୟୁ ଘଟିଛି । ଭଞ୍ଜନଗର ଥାନା ଅନ୍ତର୍ଗତ ମହୁଲପାଲି ପଞ୍ଚାୟତର ଭାଲିଆଖାଇ ଗାଁରେ ଏହି ଅଭାବନୀୟ ଘଟଣା ଘଟିଛି । ଟ୍ରାନ୍ସଫରମର ଅନ୍ୟତ୍ର ସ୍ଥାନାନ୍ତର ଓ ମୃତକଙ୍କ ପରିବାରକୁ ଉପଯୁକ୍ତ କ୍ଷତିପୂରଣ ଦାବିରେ ଶୁକ୍ରବାର ସକାଳୁ ଗ୍ରାମବାସୀମାନେ ବ୍ରହ୍ମପୁର- ଭଞ୍ଜନଗର ରାସ୍ତାରେ ଟାୟାର ଜାଳି ଅବରୋଧ କରିଛନ୍ତି।
ସୂଚନାଯୋଗ୍ୟ, ମୃତକଙ୍କ ଘର ନିକଟରେ ଥିବା ଏକ ଛୋଟ୍ ଟ୍ରାନ୍ସଫରମର ରହିଛି। କୌଣସି କାମ ପାଇଁ ଏକ ଲୁହା ପାଇପ ଧରି ଯାଉଥିବା ବେଳେ ଅସାବଧାନତା ବଶତଃ ଏହି ଲୁହା ପାଇପ୍ଟି ଟ୍ରାନ୍ସଫରମର ସହ ସଂଯୋଗ ହୋଇ ଯାଇଥିଲା। ଫଳରେ ବିଦ୍ୟୁତ ଆଘାତରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ତେବେ ଏହାକୁ ନେଇ ଗ୍ରାମରେ ଉତ୍ତେଜନା ପ୍ରକାଶ ପାଇଥିଲା । ଉତ୍ତ୍ୟକ୍ତଲୋକେ ଟ୍ରାନ୍ସଫରମରକୁ ତୁରନ୍ତ ସେଠାରୁ ହଟାଇବା ସହ ମୃତକଙ୍କ ପରିବାରକୁ କ୍ଷତି ପୂରଣ ଦେବାକୁ ଦାବି କରିଛନ୍ତି । ଘଟଣାସ୍ଥଳରେ ପୁଲିସ ପହଞ୍ଚି ଉତ୍ତ୍ୟକ୍ତଲୋକଙ୍କୁ ବୁଝାସୁଝା କରିବାକୁ ଚେଷ୍ଟ ଚଳାଇଛି ।