ହରଭଙ୍ଗା: ଦଶାହ କାର୍ଯ୍ୟ ସାରି ଘରକୁ ଫେରିବାବେଳେ ଦୁର୍ଗମ ପାହାଡିଆ ରାସ୍ତାରେ ବାଇକ୍ ଦୁର୍ଘଟଣାରେ ଚାଲିଗଲା ଜଣେ ଯୁବକଙ୍କ ଜୀବନ। ହରଭଙ୍ଗା ବ୍ଲକ ଦୁର୍ଗମ କଣ୍ଡରା, କାଚପାଜୁ ଘାଟି ରାସ୍ତାରେ ଘଟିଥିବା ମର୍ମନ୍ତୁଦ ବାଇକ୍ ଦୁର୍ଘଟଣାରେ ମୃତ ଯୁବକ ଜଣଙ୍କ ନାମ ହେମନ୍ତ ନାଏକ(୩୧) ବୋଲି ଜଣାପଡିଛି। ହେମନ୍ତଙ୍କ ପିତା ହଜାରୀ ନାଏକ ହରଭଙ୍ଗା, ପୁରୁଣାକଟକ, ବୌଦ୍ଧ, କଂଟାମାଳ ଭଳି ପୁଲିସ ଷ୍ଟେସନରେ ଜଣେ ପୁଲିସ କର୍ମଚାରୀ ଭାବେ କାର୍ଯ୍ୟକରନ୍ତି। ହେମନ୍ତ ଥିଲେ ହଜାରୀଙ୍କ ସାନପୁଅ। ହରଭଙ୍ଗା ବ୍ଲକରେ ହେମନ୍ତଙ୍କ ସହିତ ସମସ୍ତେ ପ୍ରାୟ ପରିଚିତ ଥିଲେ। ଗତକାଲିର ଘଟଣା ହେମନ୍ତ ଏକ ଦଶାହ କାର୍ଯ୍ୟରେ ଯୋଗଦେବାକୁ ଦୁର୍ଗମ ପାହାଡିଆ ଅଂଚଳ କଣ୍ଡରାକୁ ଏକ ପଲସର ବାଇକରେ ଯାଇଥିଲେ। ସେଠାରୁ ସଂନ୍ଧ୍ୟା ସମୟରେ ଫେରିବାବେଳେ ପାହାଡିଆ ଗଡାଣି ରାସ୍ତାରେ ଗାଡିଟି ଖସିପଡିବାରୁ ସେ ଦୁର୍ଘଟଣାଗ୍ରସ୍ତ ହୋଇଥିଲେ। ସେଠାକୁ କୌଣସି ଯୋଗାଯୋଗ ନଥିବାରୁ ପରିବାର ଲୋକେ ବହୁ ବିଳମ୍ବରେ ଖବର ପାଇଥିଲେ। ତାଙ୍କୁ ସେଠାରୁ ରାତିରେ ଆଡେଣିଗଡ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ମାତ୍ର ତାଙ୍କର ମୃତ୍ୟୁ ଘଟିଥିବା ଜଣାପଡିଛି। ହେମନ୍ତଙ୍କ ନିଜ ଘର ନୟାଗଡ ଜିଲା ବାଣିଗୋଛା ଥାନା ଅର୍ନ୍ତଗତ ବୁରପାଲ ବୋଲି ଜଣାପଡିଛି।
Popular Categories
Previous article
Next article