ଦୁର୍ଘଟଣାଗ୍ରସ୍ତ କାରରୁ ୧୦୪ କିଲୋ ଗଞ୍ଜେଇ ଜବତ, ଚାଳକ ଫେରାର

ମୋହନା: ସ୍ଥାନୀୟ ଥାନା ଅନ୍ତର୍ଗତ ଲୁଡ୍ରୁ ଛକଠାରେ ଏକ ଗଛରେ ପିଟି ହୋଇ ଦୁର୍ଘଟଣାଗ୍ରସ୍ତ ହୋଇଥିବା କାରରୁ ୧୦୪ କିଲେ ଗଞ୍ଜେଇ ଜବତ ହୋଇଛି। ଦୁର୍ଘଟଣା ପରେ କାରର ଚାଳକ ଘଟଣାସ୍ଥଳରୁ କେଉଁ ଆଡ଼େ ଫେରାର ହୋଇଯାଇଛି।

ଗୁରୁବାର ସକାଳ ୧୦ଟା ୩୦ରେ ଲୁଡ୍ରୁ ଛକଠାରେ ଏକ ଇଣ୍ଡିଗୋ କାର ନଂ-ଓଆର୦୨ବିୟୁ ୬୮୧୯ ଏକ ଗଛରେ ପିଟି ହୋଇ ଦୁର୍ଘଟଣାଗ୍ରସ୍ତ ହୋଇଥିବା ଖବର ପାଇ ମୋହନା ଥାନା ଏଏସଆଇ ପୀତବାସ ଶତପଥୀ, ସଞ୍ଜୟ ପ୍ରଧାନ ଓ କର୍ମଚାରୀ ଦୁର୍ଘଟଣା ସ୍ଥଳରେ ପହଞ୍ଚିଥିଲେ। କାରଟି ଏକ ଗଛକୁ ଧକ୍କା ଦେଇ ସେହି ସ୍ଥାନରେ ପଡିରହିଥିବା ବେଳେ ଚାଳକ କାରରୁ ଓହ୍ଲେଇ କେଉଁ ଆଡ଼େ ଚମ୍ପଟ ମାରିଥିଲା। ପୁଲିସ କାରଟିକୁ ତଲାସିବା ବେଳେ କାର ଡିକିରୁ ୩ଟି ଜରି ବସ୍ତାରେ ପେକିଙ୍ଗ କରି ରଖାଯାଇଥିବା ୧୦୪ କିଲୋ ଗଞ୍ଜେଇ ଓ କାରଟିକୁ ମଧ୍ୟ ଜବତ କରିଥିବା ଜଣାପଡିଛି।