ବାଙ୍କୀ: ଆଗାମୀ ତ୍ରିସ୍ତରୀୟ ପଞ୍ଚାୟତ ନିର୍ବାଚନକୁ ସଠିକ ପରିଚାଳନା ଏବଂ ଜାନୁଆରୀ ୧୭ ତାରିଖ ଠାରୁ ପ୍ରତି ପଞ୍ଚାୟତରେ ଆରମ୍ଭ ହେବାକୁ ଥିବା ପାର୍ଥୀ ନାମାଙ୍କନ ପତ୍ର ଗ୍ରହଣକୁ ପରିଚାଳନା କରିବା ପାଇଁ ପଞ୍ଚାୟତ ନିର୍ବାଚନ ଅଧିକାରୀ ମାନଙ୍କୁ ପ୍ରଶିକ୍ଷଣ ପ୍ରଦାନ କରାଯାଇଛି। ଶନିବାର ଦିନ ଅପରାହ୍ନରେ ବାଙ୍କୀ ପଞ୍ଚାୟତ ସମିତି ସମ୍ମିଳନୀ ପ୍ରକୋଷ୍ଠରେ ଆୟୋଜିତ ପ୍ରଶିକ୍ଷଣ ଶିବିର ବାଙ୍କୀ ବିଡିଓ ପ୍ରଦୀପ୍ତ କୁମାର ଶତପଥୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ନିର୍ବାଚନ ଦାୟିତ୍ୱରେ ଥିବା ଅତିରିକ୍ତ ବିଡିଓ ସୂଚିସ୍ମିତା ନାୟକ ଏହି ପ୍ରଶିକ୍ଷଣ ଶିବିରକୁ ପରିଚାଳନା କରିଥିଲେ। ପ୍ରଶିକ୍ଷକ ଭାବରେ ବ୍ଲକ ମଙ୍ଗଳ ଅଧିକାରୀ ଚିତରଂଜନ ବେହେରା ସବିଶେଷ ପ୍ରଶିକ୍ଷଣ ପ୍ରଦାନ କରିଛନ୍ତି।
ଆଗାମୀ ୧୭ ତାରିଖ ଠାରୁ ୨୧ ତାରିଖ ମଧ୍ୟରେ ପଞ୍ଚାୟତ କାର୍ଯ୍ୟାଳୟ ପରିସରରେ ସରପଞ୍ଚ ଏବଂ ଓାର୍ଡ ପାର୍ଥୀ ମାନେ ନିଜ ନିଜର ନାମାଙ୍କନ ପତ୍ର ଦାଖଲ କରାଯିବା ସମ୍ପର୍କରେ ଆଲୋଚନା ଓ ସମସ୍ତ ବିଧି ସମ୍ପର୍କରେ ପ୍ରଶିକ୍ଷଣ ଦିଆଯାଇଛି। ବାଙ୍କୀ ବ୍ଲକ ଅଧିନ ସମସ୍ତ ୨୦ଗୋଟି ପଞ୍ଚାୟତରେ କିଭଳି ଭାବରେ ଶୃଙ୍ଖଳିତ ନାମାଙ୍କନ ପତ୍ର ଦାଖଲ ଓ ଯାଞ୍ଚ ପ୍ରକ୍ରିୟା ସୁବିଧାରେ କରାଯାଇ ପାରିବ ସେ ସମ୍ପର୍କରେ ବିଡିଓ ଆଲୋକପାତ କରିଛନ୍ତି। ସେହିପରି ସମସ୍ତ ସମିତିସଭ୍ୟ ପାର୍ଥୀ ମାନେ ନିଜର ନାମାଙ୍କନ ପତ୍ର ବ୍ଲକ ପରିସରରେ ଅତିରିକ୍ତ ବିଡିଓଙ୍କ ପାଖରେ ଦାଖଲ କରିବେ ବୋଲି ପ୍ରଶିକ୍ଷଣରେ ସୂଚନା ଦିଆଯାଇଛି।
