ଚୌଦ୍ୱାର : ସୁପ୍ରତିଷ୍ଠିତ ପାରମ୍ପରିକ ଚଇତି ଘୋଡ଼ା ନୃତ୍ୟଶିଳ୍ପୀ ଡ. ଉଚ୍ଛବ ଚରଣ ଦାସ ଭାରତର ମହା ମହିମ ରାଷ୍ଟ୍ରପତିଙ୍କ ଠାରୁ ସମ୍ମାନଜନକ ପଦ୍ମଶ୍ରୀ ସମ୍ମାନ ଗ୍ରହଣ କରି ଚୌଦ୍ୱାରରେ ପହଞ୍ଚିବାପରେ ଚୌଦ୍ୱାର ଅଞ୍ଚଳବାସୀଙ୍କ ତରଫରୁ ତାଙ୍କୁ ଭବ୍ୟ ସମ୍ବର୍ଦ୍ଧନା ଦିଆ ଯାଇଛି ।ସ୍ୱେଚ୍ଛାସେବୀ ଅନୁଷ୍ଠାନ ପବ୍ଲିକ୍ ୱେଲଫେୟାର ସୋସାଇଟି ଓ ବାଜି ରାଉତ ଯୁବକ ସଂଘ ଆନୁକୁଲ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ଡ. ଦାସ ଗୁରୁବାର ସଂଧ୍ୟାରେ ଚୌଦ୍ୱାରର ପ୍ରବେଶ ପଥ ବିରୂପା ବ୍ୟାରେଜ ନିକଟରେ ପହଞ୍ଚିବା ପରେ ଅପେକ୍ଷାରତ ଯୁବଗୋଷ୍ଠି ଓ ଅଞ୍ଚଳବାସୀ ତାଙ୍କୁ ବନ୍ଦାପନା କରି ସ୍ୱାଗତ କରିଥିଲେ । ପରେପରେ ଏକ ବାଇକ୍ ଶୋଭାଯାତ୍ରାରେ ତାଙ୍କୁ ଚୌଦ୍ୱାର ଅଞ୍ଚଳ ପରିକ୍ରମା କରାଯାଇଥିଲା। ତଳ ବଜାର, ବଡ଼ ବଜାର,ମଙ୍ଗଳାସାହି,ଓଟିଏମ୍ ବଜାର,ଗାନ୍ଧୀଛକ ଆଦି ସ୍ଥାନରେ ତାଙ୍କୁ ନାଗରିକ ସମ୍ବର୍ଦ୍ଧନା ଦିଆ ଯାଇଥିଲା। ହିନ୍ଦ୍ ସେବକ ସଂଘର ରାଷ୍ଟ୍ରୀୟ ଅଧ୍ୟକ୍ଷ ଦାମୋଦର ସାହୁ ଶିଶୁ ସଦନ ଠାରେ ଡ. ଦାସଙ୍କୁ ସମ୍ବର୍ଦ୍ଧନା ଦେଇଥିଲେ। ପିଡବ୍ୁଏସ୍ ଓ ବାଜି ରାଉତ କ୍ଲବ୍ ସଦସ୍ୟ ବୃନ୍ଦ କାର୍ଯ୍ୟକ୍ରମ ପରିଚାଳନା କରିଥିଲେ। ଉଲ୍ଲେଖଯୋଗ୍ୟଯେ ଚୌଦ୍ୱାର ତଳବଜାର ନିବାସୀ ପଦ୍ମଶ୍ରୀ ଉଚ୍ଛବ ଚରଣ ଦାସ ପାରମ୍ପରିକ ଲୋକନୃତ୍ୟ ଚଇତି ଘୋଡ଼ା ନାଚର ସୁରକ୍ଷା, ବିକାଶ ଓ ପ୍ରଚାର ପ୍ରସାର ଦିଗରେ ଉଲ୍ଲେଖନୀୟ କାର୍ଯ୍ୟ କରିବା ସହିତ ଏହି ଲୋକନୃତ୍ୟକୁ ବିଶ୍ୱ ଦରବାରରେ ପହଞ୍ଚାଇ ପାରିଛନ୍ତି। ସେ ମଧ୍ୟ ଜଣେ ଉଚ୍ଚକୋଟିର ଚଇତି ଘୋଡ଼ା ଲୋକ ସଂଗୀତର ଲେଖକ ଓ ଗାୟକ ଭାବେ ପ୍ରତିଷ୍ଠା ଅର୍ଜନ କରିଛନ୍ତି। ସେ ପଦ୍ମଶ୍ରୀ ସମ୍ମାନ ଗ୍ରହଣ କରିବା ପରେ ଚୌଦ୍ୱାର ଅଞ୍ଚଳରେ ଖୁସିର ଲହରୀ ଖେଳି ଯାଇଛି।
Popular Categories
Previous article
Next article