ପିପିଲି: ଭୁବନେଶ୍ୱର-ପୁରୀ ଜାତୀୟ ରାଜପଥର ମଙ୍ଗଳପୁର ବଜାରରେ ଶନିବାର ବିଳମ୍ବିତ ରାତି ପ୍ରାୟ ୩ଟାରେ ଏକ ଟ୍ରକ୍କୁ ଅନ୍ୟ ଏକ ବାଲି ବୋଝେଇ ହାଇୱା ପଛପଟୁ ଧକ୍କା ଦେଇଥିଲା। ଘଟଣାସ୍ଥଳରେ ହାଇୱା ମାଲିକଙ୍କ ମୃତ୍ୟୁ ଘଟିଥିବାବେଳେ ଚାଳକ ଗୁରୁତର ହୋଇଛନ୍ତି। ତାଙ୍କୁ ପ୍ରଥମେ ପିପିଲି ଓ ପରେ ଭୁବନେଶ୍ୱରସ୍ଥିତ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି। ମୃତକ ହେଲେ ପ୍ରଦୀପ ପରିଡା (୩୭)। ଘର ବ୍ରହ୍ମଗିରି ଥାନା ଗଡ଼ରୋଡଙ୍ଗ ପଞ୍ଚାୟତ ହାଣ୍ଡିଆଳି ଗ୍ରାମରେ ବୋଲି ଜଣାପଡ଼ିଛି।
ସୂଚନା ମୁତାବକ, ଉକ୍ତ ବାଲି ବୋଝେଇ ହାଇୱା ପୁରୀ ଅଭିମୁଖେ ଯାଉଥିବାବେଳେ ମଙ୍ଗଳପୁର ବଜାର ରାସ୍ତା ଉପରେ ଥିବା ଉକ୍ତ ଟ୍ରକ୍ ପଛପଟେ ପିଟି ହୋଇଥିଲା। ପ୍ରଦୀପଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ଅପରପକ୍ଷରେ ପିପିଲି ପୁଲିସ ଓ ଦମକଳ ବାହିନୀ ୩ ଘଣ୍ଟା କାଳ ପରିଶ୍ରମ କରି ହାଇୱା ମଧ୍ୟରୁ ଚାଳକ ହରେକୃଷ୍ଣ ପରିଡାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ମେଡିକାଲ ପଠାଇଥିଲେ। ଅପରପକ୍ଷରେ ଦୁର୍ଘଟଣାଗ୍ରସ୍ତ ଦୁଇଟିଯାକ ଗାଡ଼ି ସହ ମୃତଦେହ ପୁଲିସ ଜବତ କରିଛି। ଶବ ବ୍ୟବଚ୍ଛେଦ ଲାଗି ପୁରୀ ପଠାଯାଇଛି। ଘଟଣାର ତଦନ୍ତ ଜାରି ରହିଛି।
