ସୁଆଣ୍ଡୋ: ପୁରୀ ଜିଲା ସାକ୍ଷୀଗୋପାଳ ମନ୍ଦିର ନିକଟସ୍ଥ ଶ୍ରୀରାମଚନ୍ଦ୍ରପୁର ଗ୍ରାମର ଲିଙ୍ଗରାଜ ବେହେରାଙ୍କୁ ସୃଜନ ତରଫରୁ ଚଳିତବର୍ଷର ଗୁରୁ କେଳୁଚରଣ ମହାପାତ୍ର ସମ୍ମାନ ପ୍ରଦାନ କରାଯିବାକୁ ସ୍ଥିର କରାଯାଇଛି । ଏଥିପାଇଁ ଖାଲି ସାକ୍ଷୀଗୋପାଳ ନୁହେଁ ସାରାରାଜ୍ୟର କଳାପ୍ରେମୀଙ୍କ ମନରେ ଆନନ୍ଦ ଖେଳି ଯାଇଛି । ଶ୍ରୀ ବେହେରା ଏବେ ମଧ୍ୟ ୭୮ ବର୍ଷ ବୟସରେ ସତ୍ୟବାଦୀ ସଙ୍ଗୀତ ମହାବିଦ୍ୟାଳୟରେ ଦାୟୀତ୍ବ ନିର୍ବାହ କରି ଆସୁଛନ୍ତି। ଗୋଟିପୁଅ ନୃତ୍ୟ, ଓଡିଶୀ, କଥକ ନୃତ୍ୟ ଠାରୁ ଆରମ୍ଭ କରି ମୃଦଙ୍ଗବାଦ୍ୟ, ସଙ୍ଗୀତ ଆଦି ଉତ୍କଳୀୟ କଳାର ବହୁମୁଖୀ ପ୍ରତିଭାରେ ମହିମା ମଣ୍ଡିତ ହୋଇ ପାରିଛନ୍ତି । ଯୁବକ ଲିଙ୍ଗରାଜ ଗାଁ ଗହଳିରେ ଗୀତ ବୋଲୁଥିବା ନୃତ୍ୟ ଅଭିନୟ କରୁଥିବା ମଣିଷଟି କଳାବିକାଶ କେନ୍ଦ୍ରରେ ନାମ ଲେଖାଇ କଳା ବିଶାରଦ ପ୍ରମାଣପତ୍ର ଗ୍ରହଣ କରି ଓଡ଼ିଶାର ସୁରଭାରତୀ, ଶ୍ୟାମସୁନ୍ଦର ସଙ୍ଗୀତ ମହାବିଦ୍ୟାଳୟ, କସ୍ତୁରୀ ଆଦି ଅନୁଷ୍ଠାନମାନଙ୍କରେ ଶିକ୍ଷକତା କରିଥିଲେ। ତାଙ୍କ ନିକଟରୁ ଶିକ୍ଷାଗ୍ରହଣ କରି ଶହଶହ ଛାତ୍ରଛାତ୍ରୀ ଆଜି ରାଜ୍ୟର କଳାକ୍ଷେତ୍ରରେ ସୁନାମ ଅର୍ଜନ କରିଛନ୍ତି। ରାଜ୍ୟର ବହୁ ପ୍ରତିଷ୍ଠିତ ଅନୁଷ୍ଠାନ ପକ୍ଷରୁ ତାଙ୍କୁ ମଧ୍ୟ ସମ୍ମାନିତ କରାଯାଇଛି ।
