ନୂଆଦିଲ୍ଲୀ: ଏକ ଯୌନ ନିର୍ଯାତନା ମାମଲାରେ ଅଭିଯୁକ୍ତକୁ ମଧ୍ୟପ୍ରଦେଶ ହାଇକୋର୍ଟ ଦେଇଥିବା ସର୍ତ୍ତମୂଳକ ଜାମିନକୁ ସୁପ୍ରିମକୋର୍ଟ ରଦ୍ଦ କରିଦେଇଛନ୍ତି। ପୀଡିତା ଯୁବତୀଙ୍କ ଦ୍ବାରା ନିଜ ହାତରେ ରାଖି ବାନ୍ଧିବା ସର୍ତ୍ତରେ ହାଇକୋର୍ଟ ଅଭିଯୁକ୍ତ ଜଣଙ୍କୁ ଜାମିନ ପ୍ରଦାନ କରିଥିଲେ। ତେବେ ଏପରି ଜାମିନକୁ ବିଚାରପତି ଏଏମ୍ ଖାନୱିଲକରଙ୍କ ନେତୃତ୍ବ ସୁପ୍ରିମକୋର୍ଟଙ୍କ ପୀଠ ଗୁରୁବାର ରଦ୍ଦ କରିଦେଇଛନ୍ତି। ସୁପ୍ରିମକୋର୍ଟ କହିଛନ୍ତି ଯେ ପରମ୍ପରାଗତ ଧାରାରୁ ବିଚାରପତିମାନେ ଦୂରେଇ ରହିବା ଦରକାର। ଏହା ସହିତ ବିଚାରପତି, ଓକିଲ ଓ ସରକାରୀ ଓକିଲମାନଙ୍କୁ ଲିଙ୍ଗଗତ ସମ୍ବେଦନଶୀଳତା ବାବଦରେ ଶିକ୍ଷା ଦେବାର ବ୍ୟବସ୍ଥା କରିବାକୁ ଜୁଡିସିଆଲ ଏକାଡେମୀ ପରାମର୍ଶ ଦେଇଛନ୍ତି।
୨୦୨୦ ଜୁଲାଇ ୩୦ରେ ମଧ୍ୟପ୍ରଦେଶ ହାଇକୋର୍ଟଙ୍କ ଇନ୍ଦୋର ପୀଠ ତାଙ୍କ ଜାମିନ ସର୍ତ୍ତରେ ଅଭିଯୁକ୍ତକୁ ମିଠା ପ୍ୟାକେଟ ସହିତ ପୀଡ଼ିତାଙ୍କ ଘରକୁ ଯିବାକୁ କହିଥିଲେ। ପୀଡିତାକୁ ଅନୁରୋଧ ପୂର୍ବକ ତାଙ୍କ ଦ୍ବାରା ନିଜ ହାତରେ ରାଖି ବାନ୍ଧିବେ। ରାଖି ବାନ୍ଧିବା ପ୍ରତିବଦଳରେ ପୀଡିତାଙ୍କ ସୁରକ୍ଷା ପାଇଁ ପ୍ରତିଶ୍ରୁତି ଦେବେ ଓ ପ୍ରକ୍ରିୟାଗତ ପରମ୍ପରା ଅନୁଯାୟୀ ପୀଡିତାଙ୍କୁ ୧୧,୦୦୦ ଟଙ୍କା ଦେବେ। ହାଇକୋର୍ଟଙ୍କ ଏପରି ସର୍ତ୍ତକୁ ବିରୋଧ ପୂର୍ବକ ଓକିଲ ଅପର୍ଣ୍ଣା ଭଟ୍ଟ ଓ ଅନ୍ୟ ୮ ମହିଳା ଓକିଲ ସୁପ୍ରିମକୋର୍ଟରେ ଆବେଦନ କରିଥିଲେ। ଆବେଦନକାରୀମାନେ ଦର୍ଶାଯାଇଥିଲେ ଯେ ପୀଡ଼ିତା ଯୁବତୀ ଦ୍ବାରା ଅଭିଯୁକ୍ତ ନିଜ ହାତରେ ରାଖି ବାନ୍ଧିବା ସର୍ତ୍ତ ଅନେକ ପ୍ରଶ୍ନବାଚୀ ସୃଷ୍ଟି କରୁଛି। ଏହାଦ୍ବାରା ପୀଡିତା ଯୁବତୀ ଅଧିକ ନିର୍ଯାତିତ ହେବ। ରକ୍ଷାବନ୍ଧନ ଭାଇ-ଭଉଣୀଙ୍କ ସମ୍ପର୍କର ପର୍ବ। ଅଦାଲତ ପୀଡ଼ିତାର ଆଘାତକୁ ଉପେକ୍ଷା କରିଛି। ଆଟର୍ଣ୍ଣି ଜେନେରାଲ କେକେ ବେଣୁଗୋପାଳ ମଧ୍ୟ ଏହି ଜାମିନ ସର୍ତ୍ତକୁ ବିରୋଧ କରିଥିଲେ।
Comments are closed.