ନୂଆଦିଲ୍ଲୀ: ଜମିଜମା ରେକର୍ଡ ସଂରକ୍ଷଣ କ୍ଷେତ୍ରରେ କେନ୍ଦ୍ର ସରକାର ରବିାବର ନୂଆ ପଦକ୍ଷେପ ନେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ସ୍ବାମୀତ୍ବ ଯୋଜନାର ଶୁଭାରମ୍ଭ କରିଛନ୍ତି। ହିତାଧିକାରୀଙ୍କୁ ଜମିପଟ୍ଟା ପ୍ରଦାନ କରିବାସହ ଭିଡିଓ କନଫରେନ୍ସିଂ ଜରିଆରେ ପ୍ରଧାନମନ୍ତ୍ରୀ ହିତାଧିକାରୀଙ୍କ ସହ ଆଲୋଚନା କରିଛନ୍ତି । ଏହି ଯୋଜନା ଅଧୀନରେ ପ୍ରାୟ ୧, ୩୨,୦୦୦ ଲୋକଙ୍କୁ ଭୂ-ସମ୍ପତ୍ତିର ବିବରଣୀ ଥିବା କାର୍ଡ ମିଳିଛି। ସେମାନଙ୍କ ମୋବାଇଲ୍ ଫୋନକୁ ଆସିଥିବା ଏସଏମଏସ ଲିଙ୍କ୍ ମାଧ୍ୟମରେ ସେମାନଙ୍କ ସମ୍ପତ୍ତି ବିବରଣୀ ଥିବା କାର୍ଡଗୁଡ଼ିକୁ ଡାଉନଲୋଡ୍ କରିପାରିବେ। ଏହି ଯୋଜନାକୁ ଲକଡାଉନ୍ ସମୟରେ ପ୍ରଧାନମନ୍ତ୍ରୀ ମୋଦୀ ଘୋଷଣା କରିଥିଲେ ଏବଂ ଆଜି ଏହାର ପ୍ରଥମ ପର୍ୟ୍ୟାୟ ଆରମ୍ଭ ହୋଇଛି।
A historic effort towards rural transformation. #SampatiSeSampanta https://t.co/VYNk6nTcg6
— Narendra Modi (@narendramodi) October 11, 2020
ସୂଚନା ଅନୁଯାୟୀ, ଏହାଦ୍ବାରା କାହାକୁ ଆଉ ନିଜ ପାଖରେ କବଲା କିମ୍ବା ପଟ୍ଟା ରଖିବାକୁ ପଡ଼ି ନ ପାରେ। ଆଧାର କାର୍ଡ ଭଳି ଏକ ଡିଜିଟାଲ କାର୍ଡରେ ସମସ୍ତ ଭୂସମ୍ପତ୍ତିର ରେକର୍ଡ ବା ବିବରଣୀ ଉପଲବ୍ଧ ହେବ। ଏହାକୁ ଆବଶ୍ୟକ ସମୟରେ ଏଟିଏମ୍ କାର୍ଡ ଭଳି ମଧ୍ୟ ବ୍ୟବହାର କରାଯାଇପାରିବ। ଡ୍ରୋନ କ୍ୟାମେରା ମ୍ୟାପିଂ ମାଧ୍ୟମରେ ଭୂସମ୍ପତ୍ତିର ବିବରଣୀ ନିଆଯାଇ ଏହି କାର୍ଡରେ ସ୍ଥାନିତ କରାଯାଇଛି। ଏହାଦ୍ବାରା ଆଉ କେହି ଜମିଜମା କାଗଜପତ୍ରକୁ ନେଇ ବିବାଦରେ ଫସିବାର ଆଶଙ୍କା ରହିବ ନାହିଁ। ପୁନଶ୍ଚ ବର୍ଷ ବର୍ଷ ଧରି ଚାଲିଥିବା ସମ୍ପତ୍ତି ବିବାଦର ଅନ୍ତ ଘଟିବା ଆଶା କରାଯାଉଛି। ଏସଭିଏମଆଇଟିଭିଏ ଯୋଜନାରେ ସରକାର ଜମି ମାଲିକଙ୍କ ପାଇଁ ଏହି ସୁବିଧା କରିଛନ୍ତି। ଏଭଳି ଅଭିନବ ବ୍ୟବସ୍ଥାର ପ୍ରାଥମିକ ପ୍ରସ୍ତୁତି ଶେଷ ହୋଇଛି। ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶର ୭୬୩ ଗାଁର ୧୩୨,୦୦୦ ଲୋକଙ୍କୁ ଭୂସମ୍ପତ୍ତିର ବିବରଣୀ ଥିବା ଏଭଳି କାର୍ଡ ପ୍ରଦାନ କରିଛନ୍ତି। ହରିୟାଣାର ୨୨୧, କର୍ଣ୍ଣାଟକର ୨, ମହାରାଷ୍ଟ୍ରର ୧୦୦, ମଧ୍ୟପ୍ରଦେଶର ୪୪, ଉତ୍ତରପ୍ରଦେଶର ୩୪୬ ଗାଁର ଲୋକେ ଏହି ଭୂସମ୍ପତ୍ତି କାର୍ଡ ପାଇବେ। ସୂଚନାଯୋଗ୍ୟ ଯେ ଏହି ଡ୍ରୋନ୍ ମ୍ୟାପିଂ କାର୍ଯ୍ୟ ଗତ ଏପ୍ରିଲ୍ ୨୪ରେ ପ୍ରଧାନମନ୍ତ୍ରୀଙ୍କ ଦ୍ବାରା ଆରମ୍ଭ ହୋଇଥିବା ‘ଏସଭିଏମଆଇଟିଭିଏ’ ପ୍ରକଳ୍ପରେ କାର୍ଯ୍ୟକାରୀ ହେଉଛି। ୨୦୨୪ସୁଦ୍ଧା ୬.୪୦ ଲକ୍ଷ ଗାଁର ମ୍ୟାପିଂ କରାଯିବା ଲକ୍ଷ୍ୟ ରଖାଯାଇଛି।
