ପୁରୀ : ହିନ୍ଦୁ ଧର୍ମରେ ବିଷ୍ଣୁଭକ୍ତ ଭାବରେ ଶ୍ରୀଚୈତନ୍ୟଙ୍କ ନାମ ଶ୍ରେଷ୍ଠ ସ୍ଥାନରେ ରହିଛି। ଶ୍ରୀଜୀଉଙ୍କ ଅନବସର ସମୟରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ ନ ପାଇ ଶ୍ରୀଚୈତନ୍ୟ ସମୁଦ୍ର କୂଳେ କୂଳେ ଆସି ବ୍ରହ୍ମଗିରିର ଅଲାରନାଥ ପୀଠରେ ପହଞ୍ଚିଥିଲେ। ଅଲାରନାଥଙ୍କ ରୂପରେ ଚତୁର୍ଦ୍ଧାମୂର୍ତ୍ତି ବିଷ୍ଣୁଙ୍କୁ ଦେଖି ସେ ଭାବବିହ୍ୱଳ ହୋଇ ପ୍ରଣିପାତ କରୁଥିବାବେଳେ ତାଙ୍କର ଗଭୀର ଭକ୍ତିରେ ପଥର ତରଳିଯାଇ ତାଙ୍କ ସର୍ବାଙ୍ଗଚିହ୍ନ ପଥର ଦେହରେ ଖୋଦିତ ହୋଇଯାଇଥିଲା। କଠିନ ପଥର ଉପରେ ଶ୍ରୀଚୈତନ୍ୟଙ୍କ ସେହି ସର୍ବାଙ୍ଗ ଚିହ୍ନ “ଚୈତନ୍ୟ ଚକଡା’କୁ ଉଦ୍ଧାର କରାଯାଇ ବୈଷ୍ଣବ ଧର୍ମାବିଲମ୍ବୀ ଭକ୍ତମାନଙ୍କ ଦର୍ଶନ ପାଇଁ ମନ୍ଦିର ବେଢା ପରିସରରେ ସ୍ୱତନ୍ତ୍ର ଭାବେ ସ୍ଥାନିତ କରାଯାଇଛି। ବୈଷ୍ଣବ ଧର୍ମାଲମ୍ବୀଙ୍କ ପାଇଁ ଅଲାରନାଥ ଦେବଙ୍କ ସହ “ଚୈତନ୍ୟଚକଡା’ ଏକ ପୂଣ୍ୟତୀର୍ଥ ଭାବେ ପରିଗଣିତ ହୋଇଛି। କିମ୍ବଦନ୍ତୀ ଅନୁଯାୟୀ ଶ୍ରୀଚୈତନ୍ୟ ଜୀବନର ଶେଷ ୧୮ବର୍ଷ ଭକ୍ତିଆନ୍ଦୋଳନର ମୁଖ୍ୟ ପୁରୋଧାଭାବେ ଶ୍ରୀକ୍ଷେତ୍ରରେ ଅବସ୍ଥାନ କରି ବୈଷ୍ଣବ ଧର୍ମର ସ୍ରୋତକୁ ପ୍ରଖରତର କରିଚାଲିଥିଲେ। ଅନବସର ସମୟରେ ଜଗନ୍ନାଥଙ୍କ ଦର୍ଶନ ନ ପାଇ ଶ୍ରୀଚୈତନ୍ୟ ଅଲାରନାଥଙ୍କୁ ଦର୍ଶନ କରି ତାଙ୍କ ଭକ୍ତିର ବିରହ ଜ୍ଜ୍ୱାଳାକୁ ପ୍ରଶମିତ କରିଥିଲେ। ଏହି ସମୟରେ ବହୁ ଚୈତନ୍ୟପ୍ରେମୀ ଭକ୍ତ ଓ ସାଧୁସନ୍ଥ ଅଲାରନାଥ ଦର୍ଶନ ପାଇଁ ବ୍ରହ୍ମଗିରିକୁ ଆସିଥାନ୍ତି। ହିନ୍ଦୁ ଧର୍ମାବଲମ୍ବୀମାନେ ବିଶ୍ୱାସ କରନ୍ତି ଅନବସର ସମୟରେ ଅଲାରନାଥଙ୍କୁ ଦର୍ଶନ ଦ୍ୱାରା ଶ୍ରୀଜଗନ୍ନାଥଙ୍କୁ ବର୍ଷସାରା ଦର୍ଶନ କରିବାର ସମପରିମାଣ ଫଳ ପ୍ରାପ୍ତି ହୋଇଥାଏ। ଶ୍ରୀଚୈତନ୍ୟଙ୍କ ଆଦର୍ଶରେ ଅନୁପ୍ରାଣୀତ ହୋଇ ଗୌଡୀୟ ସମ୍ପ୍ରଦାୟର ଭକ୍ତ ପୁରୀରୁ ପଦଯାତ୍ରା କରି ସଂକୀର୍ତ୍ତନ ଓ ହରିବୋଲ ଧ୍ୱନି ମଧ୍ୟରେ ଅଲାରନାଥ ପୀଠରେ ପହଞ୍ଚିଥାନ୍ତି। ଶ୍ରୀଚୈତନ୍ୟଙ୍କ ସର୍ବାଙ୍ଗ ଚିହ୍ନକୁ ଦର୍ଶନ କରି ଆନନ୍ଦରେ ଆତ୍ମହରା ହୋଇଥାଆନ୍ତି। ଅନବସରରେ ଅଲାରନାଥଙ୍କୁ ଦର୍ଶନ ପାଇଁ ଆସୁଥିବା ହଜାର ହଜାର ଶ୍ରଦ୍ଧାଳୁ ଚୈତନ୍ୟ ଚକଡାକୁ ଦର୍ଶନ କରି ଆତ୍ମତୃପ୍ତି ଲାଭ କରିଥାନ୍ତି।
Popular Categories
Previous article
Next article