ବେଜିଂ: ଅନେକ ଲୋକ ଏବେ ବି ଅନ୍ଧ ବିଶ୍ୱାସର ବଶବର୍ତୀ । ଚୀନ୍ରେ ଯାତ୍ରା ପୂର୍ବରୁ ମୁଦ୍ରା ଫିଙ୍ଗିଲେ ଶୁଭ ବୋଲି ବିଶ୍ୱାସ ରହିଛି । ଅନେକ ବୃଦ୍ଧ ବୃଦ୍ଧା ଏବେବି ଏପରି କରୁଛନ୍ତି । ଦକ୍ଷିଣ ଚୀନ୍ରେ ଜଣେ ୮୦ ବର୍ଷୀୟା ବୃଦ୍ଧା ବିମାନ ଯାତ୍ରାକରୁଥିଲେ । ସେ ବିମାନ ଭିତରକୁ ପ୍ରବେଶ କରିବା ସମୟରେ ଏହାର ବାହାରେ ଥିବା ବିମାନର ଇଞ୍ଜନ ମଧ୍ୟକୁ ୯ଟି ଚୀନ ମୁଦ୍ର ଫିଙ୍ଗି ଦେଇଥିଲେ ।
ସେଠାରେ ଉପସ୍ଥିତ ଥିବା ବିମାନର କର୍ମଚାରୀ ଏହା ଦେଖଥିଲେ । କୌଣସି ଅଘଟଣ ନ ହେବା ପାଇଁ ଇଞ୍ଜନ ମଧ୍ୟରୁ ସମସ୍ତ ମୁଦ୍ରାକୁ ଖୋଜି ବାହାର କରାଯାଇଥିଲା । ଏଥିପାଇଁ ପ୍ରାୟ ୫ ଘଣ୍ଟା ସମୟ ଲାଗିଥିଲା । ସେହି ସମୟରେ ବିମାନରେ ୧୫୦ ଜଣ ଯାତ୍ରୀ ଥିଲେ । ବିମାନ ବନ୍ଦର କର୍ତ୍ତୃପକ୍ଷ ଏ ବିଷୟରେ ସେଠାକାର ପୁଲିସରେ ଅଭିଯୋଗ କରିଥିଲେ । ଯାତ୍ରା ଶୁଭ ହେବା ପାଇଁ ଏପରି କରିଥିବା ବୃଦ୍ଧା ଜଣକ ପୁଲିସକୁ ସୂଚନା ଦେଇଛନ୍ତି । ତେବେ ତାଙ୍କର ଏହି ଅନ୍ଧ ବିଶ୍ୱାସ ପାଇଁ ଯାତ୍ରୀଙ୍କ ସମେତ ବିମାନ ବନ୍ଦରର କର୍ମଚାରୀମାନଙ୍କୁ ଦୀର୍ଘ ୫ ଘଣ୍ଟା ହଟହଟା ହେବାକୁ ପଡିଥିଲା ।
