କୋଏମ୍ବାଟୁର : କଂଗ୍ରେସର ବରିଷ୍ଠ ନେତା ତଥା ପୂର୍ବତନ କେନ୍ଦ୍ର ଅର୍ଥମନ୍ତ୍ରୀ ପି. ଚିଦମ୍ବରମ୍ଙ୍କ ଜଣେ ସମ୍ପର୍କୀୟ ସି. ଶିବମୁର୍ତ୍ତିଙ୍କୁ ଅପହରଣ ପରେ ହତ୍ୟା କରାଯାଇଛି। ଏହି ଘଟଣାରେ ଭେଲୋର ନିକଟରୁ ତିନି ଜଣଙ୍କୁ ଗିରଫ କରାଯାଇଥିବା ପୁଲିସ ବୁଧବାର ପ୍ରକାଶ କରିଛି। ଅଭିଯୁକ୍ତମାନେ ହେଲେ କୋଏମ୍ବାଟୁରର ଗୌତମ୍, ବିମଳ ଏବଂ ମଣିଭାରତୀ। ମୃତ ଶିବମୂର୍ତ୍ତି ଚିଦମ୍ବରମ୍ଙ୍କ ସମ୍ପର୍କୀୟ ଭଉଣୀଙ୍କ ଜ୍ୱାଇଁ ବୋଲି ଜଣାପଡିଛି। ଅଭିଯୁକ୍ତମାନେ ୪୫ ବର୍ଷ ବୟସ୍କ ଶିବମୂର୍ତ୍ତିଙ୍କୁ ସୋମବାର ରାତିରେ ତିରୁପୁରରୁ ଅପହରଣ କରି ମେଟୁପାଲାୟାମକୁ ନେଇଯାଇଥିଲେ। ପରେ ସେମାନେ ତାଙ୍କୁ ହତ୍ୟା କରି ହୋସୁର ନିକଟସ୍ଥ ଏକ ହ୍ରଦ ନିକଟରେ ମୃତଦେହ ପୋତି ଦେଇଥିଲେ। ଶିବମୂର୍ତ୍ତି କାର୍ଯ୍ୟାଳୟରୁ ଘରକୁ ନ ଫେରିବାରୁ ପରିବାର ଲୋକେ ଜୁନ୍ ୨୫ରେ ନିଖୋଜ ମାମଲା ରୁଜୁ କରିବା ପରେ ପୁଲିସ ଅନୁସନ୍ଧାନ ଆରମ୍ଭ କରିଥିଲା। ପୁଲିସ ଜିପିଆର୍ଏସ୍ ଦ୍ୱାରା ମଧ୍ୟ ରାତି ସୁଦ୍ଧା ଅଭିଯୁକ୍ତଙ୍କ କାର୍କୁ ଭେଲୋରଠାରେ ଠାବ କରିଥିଲା। ଅଭିଯୁକ୍ତଙ୍କ ବୟାନକୁ ଭିତ୍ତି କରି ପୁଲିସ ଅନ୍ୟ ଜଣେ ବ୍ୟକ୍ତିଙ୍କୁ ଗିରଫ କରିବାରେ ସଫଳ ହୋଇଛି।
