ରୋଷ୍ଟଭ୍-ଅନ୍-ଡନ୍ : ଫିଫା ବିଶ୍ୱକପ୍ର ପ୍ରିକ୍ୱାର୍ଟରଫାଇନାଲରେ ପ୍ରବେଶ କରିଛି ମେକ୍ସିକୋ। ଶନିବାର ଗ୍ରୁପ୍ ‘ଏଫ୍’ ମ୍ୟାଚ୍ରେ ଦକ୍ଷିଣ କୋରିଆକୁ ୨-୧ ଗୋଲ୍ରେ ମେକ୍ସିକୋ ପରାସ୍ତ କରିଛି। ମେକ୍ସିକୋ ପାଇଁ କାର୍ଲୋସ ଭେଲା ଓ ହାଭିଏର୍ ହର୍ଣ୍ଣାଣ୍ଡେଜ୍ ଗୋଲ୍ ଦେଇଥିବା ବେଳେ ମ୍ୟାଚ୍ର ଶେଷ ମିନିଟରେ କୋରିଆର ସୋନ୍ ହ୍ୟୁଙ୍ଗ୍-ମିନ୍ ଦର୍ଶନୀୟ ଗୋଲ୍ ଦେଇଥିଲେ। ପ୍ରଥମ ମ୍ୟାଚ୍ରେ ଚମ୍ପିଆନ୍ ଜର୍ମାନୀକୁ ହରାଇଥିବା ମେକ୍ସିକୋ ୨ୟ ବିଜୟ ସହ ଶେଷ ୧୬ଟି ଦଳ ମଧ୍ୟରେ ସ୍ଥାନପାଇଛି। ଅନ୍ୟପକ୍ଷରେ କ୍ରମାଗତ ୨ୟ ପରାଜୟ ପରେ ଏସୀୟ ଦେଶ କୋରିଆ ନକ୍ଆଉଟ୍ ଦୌଡ଼ରୁ ବାଦ୍ପଡ଼ିଛି।
ମ୍ୟାଚ୍ ଆରମ୍ଭରୁ ମେକ୍ସିକୋ ଆକ୍ରମଣ କରିଥିଲା। ମେକ୍ସିକୋକୁ ୪ ମିିନିଟରେ ଫ୍ରିକିକ୍ ଓ ୭ ମିନିଟରେ କର୍ଣ୍ଣର ମିଳିଥିଲେ ହେଁ ଏହା ବେକାର ହୋଇଥିଲା। ୯ମ ମିନିଟ୍ରେ ମେକ୍ସିକୋ ଅଧିନାୟକ ଆଣ୍ଡ୍ରେସ୍ ଗ୍ୱାର୍ଡାଡୋଙ୍କୁ ଫାଉଲ୍ ହେବାରୁ ଏହି ଉତ୍ତର ଆମେରିକୀୟ ଦେଶକୁ ଫ୍ରିକିକ୍ ମିଳିଥିଲା। ତେବେ କୋରିଆ ଡିଫେଣ୍ଡର ଏହାକୁ ବେକାର କରି ଦେଇଥିଲେ। ୧୨ ମିନିଟରେ ମେକ୍ସିକୋକୁ ଏକ ଚମତ୍କାର ସୁଯୋଗ ମିଳିଥିଲା। ମିଗୁଏଲ୍ ଲାୟୁନ୍ ମାରିଥିବା କର୍ଣ୍ଣର କିକ୍କୁ ମେକ୍ସିକୋର ହାଭିଏର୍ ହର୍ଣ୍ଣାଣ୍ଡେଜ୍ ହେଡ୍ କରିଥିଲେ ହେଁ ବଲ୍ ଗୋଲ୍ପୋଷ୍ଟ ବାହାରେ ଚାଲି ଯାଇଥିଲା। ୧୩ ମିନିଟରେ କୋରିଆ ଏକ ସୁନ୍ଦର ସୁଯୋଗ ପାଇଥିଲା। ତେବେ ମେକ୍ସିକୋ ଡିଫେଣ୍ଡର ହର୍ଭିଙ୍ଗ୍ ଲୋଜାନୋ ଗୋଲ୍ପୋଷ୍ଟ ସମ୍ମୁଖରୁ ବଲ୍କୁ ବାହାର କରି ଦେଇଥିଲେ। ଏହିପରି ପ୍ରଥମ ୧୫ ମିନିଟ ମେକ୍ସିକୋର ପ୍ରାଧାନ୍ୟ ଦେଖିବାକୁ ମିଳିଥିଲା। ୧୭ ମିନିଟରେ କର୍ଣ୍ଣରରୁ ମେକ୍ସିକୋ ଖେଳାଳିଙ୍କ ହେଡରକୁ ଯୁବ ଦକ୍ଷିଣ କୋରିଆ ଗୋଲ୍ରକ୍ଷକ ଚୋ ହ୍ୟୁନ୍-ୟୁ ରୋକି ଦେଇଥିଲେ। ୨୩ ମିନିଟରେ କୋରିଆର ଏକ ଆକ୍ରମଣକୁ ମେକ୍ସିକୋ ଡିଫେଣ୍ଡର ବେକାର କରି ଦେଇଥିଲେ। ୨୩ ମିନିଟରେ ମେକ୍ସିକୋ ଗୋଲ୍ ଉପରକୁ ପ୍ରଥମ ଆକ୍ରମଣ ହୋଇଥିଲା।। ସୋନ୍ ହ୍ୟୁଙ୍ଗ୍ ମିନ୍ ମାରିଥିବା ସଟ୍କୁ ମେକ୍ସିକୋ ଗୋଲ୍ରକ୍ଷକ ଗ୍ୱିଲେର୍ମୋ ଓଚୋଆ ବାହାର କରି ଦେଇଥିଲେ। ୨୪ ମିନିଟରେ ମେକ୍ସିକୋକୁ ପେନାଲ୍ଟି ମିଳିଥିଲା। କୋରିଆ ପେନାଲ୍ଟି ବକ୍ସରେ ଜାଙ୍ଗ୍ ହ୍ୟୁନ୍-ସୁଙ୍କ ହାତରେ ବଲ୍ ବାଜିବାକୁ ମେକ୍ସିକୋକୁ ପେନାଲ୍ଟି ମିଳିଥିଲା। ଏଥିରୁ ମେକ୍ସିକୋର କାର୍ଲୋସ ଭେଲା ଗୋଲ୍ଦେବାରେ ଆଦୌ ତ୍ରୁଟି କରିନଥିଲେ। ୨ ମିନିଟ ପରେ କାର୍ଲୋସ ଭେଲା ଗୋଲ୍ ଉପରକୁ ଏକ ଜୋରଦାର ସଟ୍ ମାରିଥିଲେ ହେଁ କୋରିଆ ଗୋଲ୍ରକ୍ଷକ ଚୋ ହ୍ୟୁନ୍-ୟୁ ଏହାକୁ ବାହାର କରି ଦେଇଥିଲେ। ଏହିପରି ମଧ୍ୟାନ୍ତର ସୁଦ୍ଧା ମେକ୍ସିକୋ ୧-୦ ଗୋଲ୍ରେ ଆଗୁଆ ରହିଥିଲା। ୫୦ ମିିନିଟରେ ହର୍ଭିଙ୍ଗ୍ ଲୋଜାନୋଙ୍କ ସଟ ଗୋଲ୍ପୋଷ୍ଟ ଉପରେ ଚାଲି ଯାଇଥିଲା। ୬୬ ମିନିଟରେ ହାଭିଏର୍ ହର୍ଣ୍ଣାଣ୍ଡେଜ୍ ଏକ ଦର୍ଶନୀୟ ଗୋଲ୍ଦେଇ ମେକ୍ସିକୋକୁ ୨-୦ରେ ଆଗୁଆ କରିଥିଲେ। ହର୍ଭିଙ୍ଗ ଲୋଜାନୋଙ୍କଠାରୁ ପାସ୍ ପାଇ କୋରିଆ ଡିଫେଣ୍ଡରଙ୍କୁ ଡଜ୍ ମାରି ହର୍ଣ୍ଣାଣ୍ଡେଜ୍ ଗୋଲ୍ ଦେଇଥିଲେ। ମେକ୍ସିକୋ ପାଇଁ ହର୍ଣ୍ଣାଣ୍ଡେଜ୍ଙ୍କର ଏହା ୫୦ତମ ଗୋଲ୍ ଥିଲା। ତେବେ ଇଞ୍ଜ୍ୟୁରି ସମୟରେ କୋରିଆ ଚଳିତ ବିଶ୍ୱକପ୍ର ଅନ୍ୟତମ ଦର୍ଶନୀୟ ଗୋଲ୍ ଦେଇଥିଲା। ଦୂରରୁ ସ୍ୱିଙ୍ଗ୍ କରିଥିବା ସଟ୍ମାରି ଏହି ଅତି ଦର୍ଶନୀୟ ଗୋଲ୍ଟି ଦେଇଥିଲେ ସୋନ୍ ହ୍ୟୁଙ୍ଗ୍-ମିନ୍।
